Met Kot A Föri?

‘O Jiowa, pwota ka chök ütä me toau? Pwota ka okopola lupwen äm nom lon riaföü?’ *​—KÖLFEL 10:1.

A CH rong ekis chök pworausen fönüfan a affata pwe sia nom lon “fansoun riaföü.” Iwe, lupwen a kküü pwisin manauach föfförün atai allük, aksiten, are mäloon emön attongach, eli sipwe eis, Kot a küna met a fis? A äfännikich? Epwe mi fen chüen nom?

Iwe nge, ka fen ekieki ika mi mwääl met sia lükü usun Kot? Äwewe chök: Anchangei mwo emön kükkün semirit a song pun seman we a lo angang. A pwositi seman na, iwe, a mochen epwe liwinsefälito ren. A meefi pwe seman na a likitalo. Unusen rän, a chök ekkeis, “Ifa i Papa?”

A mecheres ach sipwe küna mwäällin ekiekin ena ät. Pun lon ena chök atun, seman we a lo angang fän iten tufichin unusen an famili. Iwe, atun sia apasa, “Ifa I Kot”? a pwal mwääl ach ekiek?

Äwewe chök, ekkoch ra mochen pwe Kot epwe mwittir nielo chon föfföringaw. Nge pwal ekkoch ra ekieki pwe i a usun emön Santa Claus lon läng a kan awora liffang, äwewe chök, ach angang, pwülüwach, are winnach.

Me ren iir me ruu ekkena ekiek, ika Kot ese mwittir apwüngü chon föfföringaw are apwönüetä ach tingor, weween, ese meefi ach riäfföü are osupwang. Iwe nge, a fokkun mwääl ekkena ekiek! Pwüngün pwe lon chök ei atun, Jiowa Kot a fen akkangang le awora tufichin unusen ewe familien aramas, inaamwo ika rese weweiti met a föfföri.

Iwe, met chök Kot a föfföri? Ren an epwe pölü ena kapas eis, a lamot sipwe nesefäliti lepoputään uruwoon aramas lupwen a ngawolo ewe riri lefiler me Kot, nge sap minne esap tongeni fförsefäl.

A Watte Pwününgawen Tipis

Anchangei mwo eü imw a ta fite, fite ier. A pwangetiw osun, a ta asaman me etippan kewe, me a mök kinassan. Me mwan, ena imw a mürinnö, nge iei ese chüen ling. Pokiten a kon watte taan ena imw, esap tongeni mwittir fförsefäl.

Iei, ekieki mwo ükükün watteen feiengawen aramas lupwen Setan a etipetipa Atam me If pwe repwe ü ngeni Kot wonu ngeröü ier loom. Me mwan, ewe äkkäeüin pean aramas ra pwapwaiti pöchökkülen  inisiir me ewe äpilükülükün manau esemuch fitifengen me mwirimwiriir kewe. (Keneses 1:28) Iwe nge, lupwen ra tipis, usun itä Atam me If ra efitikokooi ewe familien aramas resaamwo uputiw.

Kosap ekieki pwe a chök kükkün pwününgawen ena föfförün ü ngeni Kot. Ewe Paipel a apasa: “Iwe, ren eman mwän [Atam] tipis a tolong lon fanüfan, nge an tipis a atoto mäla.” (Rom 5:12) Me lükün än tipis atoto mälo, a pwal angawa ach riri ngeni Kot, pöchökkülen inisich, ekiekich, me letipach. Ina minne, sia usun chök ewe imw mi tatakkis. Ewe mwän mi pwüng itan Jop a äweweöchü nonnomuch lupwen a apasa pwe aramas ra manau ‘fansoun mochomoch, nge manauer a uren weires.’​—Hiop 14:1.

Nge itä Kot a likitalo ewe familien aramas mwirin än Atam me If tipis? Aapwi! Pwüngün pwe seni ena fansoun tori iei, Semach we lon läng a fen akkangang fän iten ewe familien aramas. Ren ach sipwe wewefichiti met a föfföri fän äsengesich, sipwe ppii ülüngät mettoch a lamot ren fförsefälin eü imw me ifa usun ra riri ngeni met Kot a föri pwe epwe aunusöchusefäli aramas.

1 Mwirin än ewe minne kä imwan a cheki taan ewe imw, a ekieki ika epwe förisefäli are atai.

Mwirin ewe föfförün ü ngeni lon Ichen, Jiowa Kot a affata met a fen aotalo pwe epwe aunusöchusefäli aramas. Iei alon ngeni Setan, ewe chon poputääni ewe föfförün ü ngeni: “Üpwe afiukemi me ewe fefin, pwal mwirimwirum me mwirimwirin. Men epwe puri mökürom, nge en kopwe küw apilipilin pechen.”​—Keneses 3:15.

Ren alon na, Jiowa a pwonei pwe epwe nielo ena chon poputääni ewe föfförün ü ngeni lon Ichen. (Rom 16:20; Pwarata 12:9) Pwal och, Jiowa a oesini pwe ewe “mwirimwir” epwap pwä epwe seläni aramas seni tipis. * (1 Jon 3:8) Ekkena pwon ra affata eü pworaus mi enlet mi wenewenen lamot, weween, Kot epwe aöchüsefäli förian kewe, nge esap atai. Nge a lamot watteen fansoun ren ewe angangen aöchüsefäli aramas.

2 Emön sou anapanapa imw a kan chüngani liosun ewe imw epwe fförsefäl.

Jiowa Kot a ngeni chon Israel eü pinukun allük me anapanapa eü imwen fel ikewe repwe fel ngeni ie. Ewe Paipel a apasa: “Ekei mettoch meinisin ngünüen chök ekewe mettoch repwe feito me mürin.” (Kolose 2:17) Ra usun chök och lios, pun ra liosuetä och mettoch mi fokkun lapalap seni.

 Äwewe chök, chon Israel ra eäni asor man ren omusomusen ar tipis. (Lifitikos 17:11) Ena föfför a liosuetä ewe asor mi lapalap epwap fis fitepükü ier mwirin pwe epwe enletin seläni aramas. * Napanapen ewe imwen fel mangaku me ewe imwenfel chon Israel ra fel ngeni Kot lon ra liosuetä met ewe Messaia epwe föri atun epwe feito, seni an eäni asor manauan tori an feitä läng.​—Ppii ewe  lios lon pekin taropwe 7.

3 A filitä emön chon kaü imw epwe äppirü ewe chünga me fförsefäli ewe imw.

Jises, ewe Messaia mi pwonetiw, epwe apwönüetä met än Chon Israel kewe asor ra liosuetä me asoresini pwisin manauan fän iten an epwe seläni aramas. Jon Papatais a kör ngeni Jises “ewe Lamen Kot a uweela tipisin chon fanüfan.” (Jon 1:29) Jises a etiwa wisan na. A apasa: “Üa feitiu seni läng pwe üpwe föri letipen ewe mi tiniei, nge sap püsin letipei.”​—Jon 6:38.

Iei letipen Kot pwe Jises esap chök “fangala manauan fänäsengesin chomong aramas pwe möön manauer” nge epwe pwal etiwa nöün kewe chon käeö ar repwe eti i lon an we Mwu. (Mattu 20:28; Luk 22:29, 30) Kot epwe äeä ena mwu le apwönüetä met a fen aotalo fän iten aramas. Pworausen än Kot Mwu a iteni “kapas allim” pun a äweweei pwe Kot a föri eü mwu lon läng epwe nemenalo fönüfan!​—Mattu 24:14, TF; Taniel 2:44. *

A Sopwelo ewe Angangen Fförsefäl

Me mwen än Jises feitä läng, a allük ngeni nöün kewe chon käeö: “Oupwe feilo asoulangalo chon fonu meinisin, oupwe papataisir fan iten ewe Sam, me ewe Nau, me ewe Ngun mi Fel.  . . O nengeni, ngang upwe nonnom remi ran meinisin, tori le sopolon ei fansoun.”​—Mattu 28:19, 20, TF.

Ewe angangen aunusöchusefäli aramas ese muchulo atun Jises a mälo. Epwe sopwosopwolo tori ewe “fansoun sopolan,” lupwen än Kot we Mwu epwe poputä le nemeni fönüfan. Sia silei pwe iei ewe fansoun pun a pwönütä än Jises oesini usun esissillen ewe “fansoun sopolan.” *​—Mattu 24:3-14; Luk 21:7-11; 2 Timoti 3:1-5.

Ikenäi, lon 236 fönü, Chon Pwäratä Jiowa ra älleasochisi än Jises allük pwe repwe afalafala ewe kapas allim usun än Kot we Mwu. A fför ei puk pwe epwe älisuk le käeö usun ena Mwu me met epwe föri. Iteiten maram a katowu Ewe Leenien Mas, iwe, lon pekin taropwe 2, a apasa: “Ei puk . . . a kan aururu aramas ren ewe kapas allim pwe än Kot we Mwu, wesewesen eü nemenem lon läng, epwele amoielo minne mi ngaw meinisin me siwili ei fönüfan ngeni eü paratis. A pesei aramas pwe repwe lükü Jises, ewe emön a mälo pwe sipwe tongeni küna manau esemuch me a nennemenem iei lon ewe wis Kingen än Kot we Mwu.”

Iwe, pwüngün pwe lon ei fansoun, ka chüen rongorong usun föfföringawen terrorist are minen efeiengaw, are pworaus ämäirü a kküü manauom. Nge om käeö Paipel epwe alükülükuk pwe Kot ese likitalo aramas. Paipel a apasa pwe “esap wesewesen toau seni eman me eman leich.” (Fofor 17:27) Iwe, epwe wesewesen pwönütä an we pwon pwe epwe fförsefäli mettoch meinisin mi pöüt seni popuch kewe.​—Aisea 55:11.

[Ekkewe pwóróus fan]

 [Lios/Ekkewe sasing lón pekin taropwe 7]

 (Ren unusen napanapan, ppii ewe puk)

“Liosun ewe mi Enlet” Met ewe Imwenfel a Liosuetä

EWE RONGEN ASOR

Än Kot tipemecheres le etiwa än Jises asor.​—IPRU 13:10-12.

EWE SAMOLFEL MI LAPALAP

Jises.​—IPRU 9:11.

1 Lon ewe Ränin Asoren Omusomusen Tipis, ewe samolfel mi apalap a eäni eü asor fän iten tipisin ekkewe aramas.​—LIFITIKOS 16:15, 29-31.

1 Lon Nisan 14, lon ewe ier 33, Jises a asoresini manauan fän itach.​—IPRU 10:5-10; 1 JON 2:1, 2

EWE LEENI MI PIN

Än Jises kepit ren ewe ngün mi fel pwe epwe eäni ewe äpilükülükün manau lon läng.​—MATTU 3:16, 17; ROM 8:14-17; IPRU 5:4-6.

EWE TTIT MANGAKU

Inisin Jises, ewe minen eppet mi äimufeseni manau woon fönüfan me manau lon läng.​—1 KORINT 15:44, 50; IPRU 6:19, 20; 10:19, 20.

2 Ewe samolfel mi lapalap a feilo pekiloon ewe ttit mangaku mi äimufeseni ewe Leeni mi Pin seni ewe Leeni mi Unusen Pin.

2 Mwirin än Jises manausefäl, a ‘feilo pekiloon ewe mangaku’ ren an feitä läng le “nonom mwen mesen Kot iei fänäsengesich.”​—IPRU 9:24-28.

EWE LEENI MI UNUSEN PIN

Läng.​—IPRU 9:24, TF.

3 Atun ewe samolfel mi lapalap a nonnom lon ewe Leeni mi Unusen Pin, a osupwatiw chchaan ewe asorun man mwen ewe pworofel.​—LIFITIKOS 16:12-14.

3 Ren än Jises mwei aüchean chchaan we, a awora ewe minen omusomusen ach tipis.​—IPRU 9:12, 24; 1 PITER 3:21, 22.