I TEITEN ier fite pükü million semirit ra nom fän watteen riäfföü seni än aramas kirikiringaü me kawetengaü. Chommong ra ussun itä slave lon ekkewe leenien angang mi efeiengaü. Ekkoch aramas ra sü faar, me eriäniir pwe repwe sounfiu ika chon amömö inisiir. Pwal eü, chommong semirit rese chüen lükülük woon ekkewe watte pokiten ar kokkongaü me föri sokkopaten föfför mi ngaü ngeniir.

Chommong mi tongei ekkewe semirit ra lolileniesini osukosuker. Ekkewe semirit ra weweiti pwe ra küna kirikiringaü pokiten tipemmong me föfföringaüen aramas, nge a kon weires repwe weweiti pwata emön Kot mi tong a mutatä ena sokkun pwüngüngaü. Neman repwe meefi pwe Kot a fen pöütalo ekkewe semirit me eli esap fokkun äfänniir. Mei pwüng ena ekiek? Iwe met, Kot esap tongei semirit ren ekkeei napanap a fis ngeniir? Met ewe Paipel a apasa ussun?

Jiowa a Apwüngü ekkewe mi Kirikiringaü

Esap otaen Jiowa Kot pwe ekkewe semirit repwe küna riäfföü seni ekkewe aramas mi kirikiringaü. Pokiten ewe föfförün ü ngeni lon Ichen me än aramas tunalo än Jiowa we nemenem mi tekia, a eselipato eü mettoch mi kon alolilen, än ekkewe semirit küna riäfföü me osukosuk watte seni ekkewe aramas mi kirikiringaü.​—Keneses 3:11-13, 16; Än Salomon Afalafal 8:9.

Kot a fokkun oput ekkewe mi kirikiringaü ngeni iir mi apwangapwang me osupwang. Chommong ekkewe mwu loom, iir kewe sap  chon angang ngeni Jiowa ra asoresini nöür kewe semirit, nge Jiowa a apasa pwe ei sokkun föfför ‘esap allük ngeniir, esap pwal nom lon an ekiek.’ (Jeremaia 7:31) Kot a öüröüra nöün kewe aramas loom: “Pun are oua ariaföüür [ekkewe mi mäsen], nge ir repwe siö ngeniei, üpwe fokun aüselinga ar siö. Üpwe fokun song ngenikemi.”​—Ekistos 22:22-24.

Jiowa a Tongei Ekkewe Semirit

Eü pisekin ännet pwe Jiowa a äfänni ekkewe semirit a ngeni ekkewe sam me in ekkewe kapasen emmwen mi tipatchem. Ekkewe semirit ra määritä lon eü famili mi lükülüköch, ra määritä ngeni aramas mi äsimaü me napanapöch. Ina popun, ewe Chon Förikich a föratä ewe kokkotun pwüpwülü an epwe nonnom tori mälo. Iwe, lon ena kokkot “eman mwän epwe likiti saman me inan o pachei ngeni pwülüan, nge ekewe ruoman repwe wiliti eu chök inis.” (Keneses 2:24) Ewe Paipel a äiti ngenikich pwe lisowu a chök mumu ngeni ekkewe mi pwüpwülü pwe ika repwe nöünöü ekkewe semirit repwe küna tümün lon lükülüköch.​—Ipru 13:4.

Ewe Paipel a menlapei lamoten än sam me in emiriti nöür kewe ren an apasa: “Nau eu lifang seni ewe Samol mi Lapalap, ir eu liwin mi öch. Ekewe ät eman a nöüni lupwen an alüal ra usun chök ekewe föün esefich lepöün eman sounfiu.” (Kölfel 127:3, 4) Ekkewe semirit iir liffang mi aüchea seni Kot me a mochen repwe manauöch. Jiowa a fokkun pesei sam me in pwe repwe emmweniöchü nöür kewe lon eü napanap mi mürinnö ussun chök emön chon nikäppich a fokkun angöch le apara mesan an we nikäppich. Än Jiowa kapas a erä: “Ämi sam me in ousap föri ngeni nöümi kana mine repwe song ren. Nge oupwe tümwünüöchür fän ämi fönöör o öüröürer lon ach Samol.”​—Efisus 6:4.

Iei pwal eü än Jiowa pwäratä tong ngeni semirit ren an äiti ngeni sam me in repwe tümünü nöür kewe seni ekkewe sokkun aramas mi föfföringaü ngeni semirit. Lon Israel loom, a eü allük pwe pwal mwo ekkewe “semirit” repwe rongorong ngeni ewe Allük kapachelong ekkewe kapasen emmwen ussun föfför mi mürinnö me föfför mi ngaü ussun lisowu. (Tuteronomi 31:12; Lifitikos 18:6-24) Kot a mochen pwe ekkewe sam me in repwe föri ükükün ar tufich le tümünü nöür kewe seni emön epwe eriäfföür me kirikiringaü ngeniir.

Eü Äpilükülük fän iten ekkewe Semirit

Föfförün Jises ngeni ekkewe semirit a pwäratä än Jiowa enletin tongei semirit pun Jises a fen äppirü unusen napanapen Jiowa kewe meinisin. (Jon 5:19) Ekkewe aposel ra pinei ekkewe sam me in pwe resap aosukosuka Jises ren nöür kewe semirit, nge Jises a fen apwüngüür me erä: “Oupwe mwüt ngeni ekewe semirit pwe repwe feito rei . . . Mürin Jesus a romi ekewe semirit, a iseis pöün won eman me eman leir o a afeiöchüür.” (Mark 10:13-16) Ewer, a mmen aüchea ekkewe semirit fän mesan Jiowa me Nöün we.

Ina minne, Jiowa epwele mwöküt me angasalo ekkewe semirit mi küna riäfföü ren an nöünöü, Jises Kraist, ewe King mi kefilitä. Ekkewe chon eriäfföüü aramas mi tipemmong me ekkewe mi kirikiringaü repwe ninniilo. (Kölfel 37:10, 11) Nge ren ekkewe mi mosonoson mi kükkütta Jiowa, ewe Paipel a apasa: “Epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.”​—Pwarata 21:3, 4.

Iei mwo, atun sia witiwiti pwönüetään än Jiowa pwon, Kot a fen pwäratä an we tong ngeni ekkewe mi küna riäfföü pun a awora älillis pwe repwe meefi lükülüköch me atufichiir le arap ngeni I. Jiowa a pwonei: “Üpwe kütta chokewe mi pöütüla o aliwini chokewe mi malechela, üpwe filiti kinasen chokewe mi kinas o apöchöküla chokewe mi apwangapwang.” (Isikiel 34:16) Ren an we Kapas, an we ngün mi fel me ewe mwichefelin chon Kraist, Jiowa a aururu ekkewe semirit mi riäfföü me mwelele. A ifa me watteen pwapwaan ach silei pwe ikenäi pwal lon mwachkkan “ewe Sam mi eäni tong me ewe Kot mi echipakich lon mettoch meinisin . . . akachipakich lon ach riaföü meinisin.”​—2 Korint 1:3, 4.

[Credit Line]

© Mikkel Ostergaard/​Panos Pictures