IEI alon Lisa: * “Án pwiich kewe Chón Kraist kirekiréch a fókkun achchúngúei.” Lisa a fós usun met a akkomw luki i ngeni ewe enlet. Pwal ina usun ren Anne, a erá: “Me akkomwan, ua fókkun sani ewe enlet pokiten án ekkewe Chón Pwáraatá kirekiréch, nge esap ren ar asukul.” Iei, iir me rúúemén ra pwapwa le ákkálleani ewe Paipel me ekilonei, nge ewe napanap kirekiréch ina met a fókkun achchúngúúr.

Ifa usun sia tongeni pwári kirekiréch mi achchúngú letipen aramas? Sipwe pwóróus wóón ifa usun sipwe pwári ena lón ach kapas me féffér. Mwirin, sipwe pwóróus wóón ié kewe itá sipwe pwári kirekiréch ngeniir.

Än Salomon Fos sópwun 31 a áweweei pwe emén fin pwúpwúlú mi lipwákéch epwe eáni kapas mi kirekiréch. (SalF. 31:26) A mut ngeni ena napanap an epwe nemeni minne a apasa me ngingiin an kapas. Mi pwal lamot án ekkewe sam repwe kapas fán kirekiréch. Lape ngeni ekkewe sam me in ra silei pwe ar arochongaw lón ar kapas a tongeni eletipechou néúr we me eli esap mochen aúseling ngeniir. Ina minne, atun ekkewe sam me in ra kapas fán kirekiréch, epwe ámecheresi án néúr we epwe aúseling me álleasochis.

Ikaamwo esap kich sam are in, nge met kich meinisin sipwe féri pwe sipwe eáni kapas fán kirekiréch? Ewe áeúin kinikinin lón ei wokisin Än Salomon Fos 31:26 a tongeni álisikich, a erá: “A eäni kapasen tipachem.” A wewe ngeni pwe sipwe mirit le filiéchú minne sipwe apasa me ngingiin ach kapas. Epwe álilliséch ika sipwe pwisin eisinikich, ‘Minne upwele apasa epwe asonga aramas, are epwe efisi kinamwe?’ (SalF. 15:1) Ewer, a eú alen tipachem ach sipwe lóóm ekiek mwen ach sipwe fós.

Iei met pwal eú mwutun a apasa: “Mi wor aramas ra fos, nge resap ekieki och. Ekei sokun fos ra akinasa aramas, usun efoch ketilas a akinasa eman.” (SalF. 12:18) Atun sia ekieki ifa usun ach fós me ngingiich a tongeni apwapwaai are eletipechou ekkóch, iwe a tongeni amwékútúkich le nemeni ach fós. Ewer ach eáni ena napanap kirekiréch a tongeni álisikich ach sisap eáni ekkewe kapas mi ámmetek me arochongaw. (Ef. 4:31, 32) Sipwe siwili ach ekiek me kapas mi ngaw ngeni ekkewe esin kapas mi kirekiréch me ekinamwe. Jiowa a isetiw eú leenien áppirú ren ei mettóch atun a anúkúnúkú néún we chón angang Elias atun a meefi niwokkus. Ewe chónláng mi tupuni Jiowa a fós ngeni lón “eu möngüngü mi leüökükün.” (1 King 19:12) Iwe nge, ach kirekiréch esap chék pwá lón ach kapas, nge a pwal lamot an epwe pwá lón ach féffér. Ifa usun?

Sia áppirú Jiowa ren ach eáni kirekiréch lón ach kapas me féffér. (Ef. 4:32; 5:1, 2) Lisa, ewe sia fen pwóróus usun me mwan, a apwóróusa án ekkewe Chón Pwáraatá kirekiréch ngeniir. A erá: “Atun a weiweitá án ai we famili epwe mwékút seni leeniem, ruu pean pwúpwúlú lón ewe mwichefel ra asésé seni ar angang pwe repwe álisikem le anúkúnúkú pisekim kewe. Lón ena atun, usaamwo nge emén chón káé Paipel!” Ekkena féfférún  kirekiréch a amwékútú Lisa le etittinafichi ewe enlet.

Anne, ewe sia fen pwóróus usun me mwan, a pwal aúcheani án ekkewe Chón Pwáraatá kirekiréch ngeni. Iei alon: “Pokiten ese éch féfférún aramas ngeniei, iwe ua fókkun lúkúlúkúmmang ngeni aramas.” A pwal erá: “Atun ua chuuri ekkewe Chón Pwáraatá, ua lúkúlúkúmmang ngeniir. Ua ekieki, ‘Pwata ra pwári ar áfánniei?’ Nge enletin kirekiréchún ewe mi wisen káé ngeniei a amwékútúei le lúkúlúk wóón.” Met mwirilóón? “Mwirin, ua poputá le ekiekifichi minne ua káé.”

A fókkun chúng letipen Lisa me Anne ren án chón ewe mwichefel féfférún kirekiréch ngeniir, iwe ina met a álisiir le mochen káé usun ewe enlet. A pwal álisiir le lúkúlúk wóón Jiowa me néún kewe aramas.

Eli ekkóch aramas ra kan eáni kapas mi kirekiréch me emelimel pokiten ina eérenien fénúer. A mmen éch án ekkóch aramas pwári fáiro me súfél pokiten eérenien fénúer are ina pwúkún napanaper. Nge ika sia féri ena  pokiten chék ina eéreniach are napanapach, iwe eli sise wesewesen áppirú án Kot kirekiréch.​—Apépé ngeni Föför 28:2.

Kirekiréch mi enlet, ina uwaan án Kot we ngún mi fel. (Kal. 5:22, 23) Ina popun, ren ach sipwe pwári kirekiréch mi enlet, a lamot ach sipwe mut ngeni án Kot we ngún mi fel an epwe nemeni ach féffér me kapas. Atun sia féri ena, sia áppirú Jiowa me Jesus. Kich Chón Kraist sia enletin áfánni aramas. Me sia féri ena pokiten sia tongei Jiowa Kot me aramas. Iwe, ach kirekiréch ina eú napanap mi fókkun echipwér, a pop seni letipach me Kot a pwapwa ren.

A tongeni mecheres ach sipwe pwári kirekiréch ngeni chókkewe ra fen kirekiréch ngenikich are chókkewe sia sissileer. (2 Sam. 2:6) Eú alen ach féri ena, ina ren ach kilisou ngeniir. (Kol. 3:15) Nge met ika sia meefi pwe ese fich ngeni emén ach sipwe pwári kirekiréch ngeni?

Ekieki ei: Jiowa a isetiw eú leenien áppirú mi fókkun múrinné ren an pwári kirekiréch are úméúméch mi somwoló, me an we Kapas a áiti ngenikich eú lesen mi lamot usun ach pwári ena napanap. Néún Chón Kraist we Tesin Krik a fen néúnéú ena kapas “úméúméch mi somwoló” fán chómmóng. Ifa usun Kot a pwári kirekiréch?

Ekieki usun ekkewe fite fite million aramas Jiowa a fen pwáppwári an kirekiréch ngeniir ren an awora minne mi lamot ngeniir pwe repwe manaw. (Mat. 5:45) Ren enletin, Jiowa a fen pwári an kirekiréch ngeni aramas pwal mwo nge me mwen ar silei i. (Ef. 2:4, 5, 8) Áwewe chék, a awora minne mi múrinné seni meinisin ren an fang Néún we áláemén fán iten aramas meinisin. Ewe aposel Paulus a makkeei pwe Jiowa a awora ewe méén kepich pokiten “watten än Kot we ümöümöch.” (Ef. 1:7) Pwal och, inaamwo ika sia tipis me eletipechou Jiowa, nge a sópweló le emmwenikich me asukulakich. An we káit me kapas a usun en “chimwo.” (Tut. 32:2) Sise fókkun tongeni unusen liwini ngeni an féfférún kirekiréch meinisin. Me sia silei pwe ika Jiowa ese pwári an kirekiréch mi somwoló ngenikich, iwe esap wor ach ápilúkúlúk fán iten mwachkkan.​—Apépé ngeni 1 Petrus 1:13.

Ese wor tipemwaramwar pwe sia fókkun aúcheani án Jiowa kirekiréch me a apéchékkúlakich. Pokiten ena, sisap lifilifil lón ach pwári kirekiréch nge sipwe fen achocho le áppirú Jiowa ren ach pwári kirekiréch iteiten rán. (1 Tes. 5:15) Atun sia pwáppwári kirekiréch, sia usun eú ekkei sia arakich wóón lón fansoun patapat. Sia eú minen ourur ngeni chón ach famili, chienach Chón Kraist, chienach chón angang, chón sukul me chón óruch.

Ekieki ié kewe lón óm famili are lón ewe mwichefel repwe feiéch pokiten óm pwári kirekiréch lón óm kapas me féffér. Eli emén lón óm mwichefel a fókkun need álillis ren túmúnún imwan are an atake, are álillis le ló shopping. Pwal och, atun ka chuuri emén lón ewe angangen afalafal mi osupwangen álillis, ka tongeni álisi?

Ren ach sipwe áppirú Jiowa, amwo ewe napanap kirekiréch epwe nemeni ach kapas me féffér fansoun meinisin.