Ingkon mangihuthon poda ni Bibel do halak Kristen tingki laho paluahon diri sian parjahat. Angka prinsip on patuduhon, sala do molo halak Kristen mamangke sinjata songon pistol, sinapang, manang sinjata na asing laho paluahon diri sian parjahat. Rimangi ma angka prinsip na di toru on:

Ringkot do ngolu ni jolma di Jahowa. Si Daud mandok, ”Di lambungmi do mual hangoluan.” (Ps. 36:10) Alani i, molo adong halak Kristen na laho mangalinggomi dirina manang artana, ingkon marsitutu do ibana asa unang parohon utang mudar na mambahen ibana martanggung jawab alani hamatean ni sasahalak.—5 Mus. 22:8; Ps. 51:15.

Tutu, manang aha pe na di pangke sasahalak laho mangalinggomi dirina, boi do i parohon utang mudar. Alai, gabe ummura do pamatehon sasahalak molo adong sinjata. * Molo diida adong sinjata, olo do lam garang parjahat i jala boi parohon jea.

Ndang na laho gabe alat paluahon diri umbahen disuru Jesus angka siseanna asa mamboan podang di borngin andorang so mate ibana. (Luk. 22:36, 38) Gariada diorai Jesus do siseanna mamangke podang dohot antuhantuk, nang pe mangadopi halak na marsinjata. (Luk. 22:52) Dung dipangke si Petrus podang laho mangalo naposo ni sintua malim, didok Jesus ma tu si Petrus, ”Pasarung podangmi.” Dung i, dipaboa Jesus ma prinsip na mangurupi halak Kristen saonari, i ma ”ai na manintak podang, mago ma bahenon ni podang”.—Mat. 26:51, 52.

Disurirangkon do di Mika 4:3, ’Patopahonon ni [naposo ni Debata] ma podangnasida bahen bajak, jala hujurnasida bahen sasabi.’ Ingkon ditanda do naposo ni Debata i siboan dame. Tontu diihuthon nasida do poda ni Debata na dipasahat marhite Apostel Paulus na mandok, ’Unang baloshon hamu na jahat alo ni na jahat.’ Jala ”dame maradophon halak saluhutna”. (Rom 12:17, 18) Gari si Paulus, nang pe mangadopi ”panamun”, ndang dilaosi ibana prinsip ni Bibel laho paluahon dirina. (2 Kor. 11:26) Gariada pos do rohana tu Jahowa. Jala diboto ibana, poda ni Bibel do na dumenggan ”sian [sinjata] tu parporangan”.—Pjm. 9:18.

Di halak Kristen, ummarga do hangoluan sian arta. Taboto, ”ndada sian arta [ni sasahalak] ngoluna”. (Luk. 12:15) Molo nunga lambok hita mangkatai, alai ndang ditangihon parjahat na marsinjata i, taihuthon ma poda ni Jesus na mandok, ”Unang alo hamu na jahat!” Lapatanna, tapasombu ma ibana mambuat na dihalomohon rohana. (Mat. 5:39, 40; Luk. 6:29) * Alai, dumenggan do molo taihuthon poda ni Bibel asa unang ’patudutuduhon na adong di  hita’. Molo taulahon songon i, dao ma parjahat sian hita. (1 Joh. 2:16) Jala, denggan do molo ditanda halak hita Sitindangi Ni Jahowa na parroha dame.—Poda 18:10.

Dijaga halak Kristen do panggora ni roha ni donganna. (Rom 14:21) Olo do ra tarsonggot manang tartuktuk pigapiga donganta, molo diboto nasida adong dongan sahaporseaonna nampuna sinjata laho paluahon dirina sian parjahat. Nang pe adong di hita surat izin sian pamarenta taringot sinjata i, alai holong tu dongan mangonjar rohanta asa unang gabe partuktuhan di nasida.—1 Kor. 10:32, 33; 13:4, 5.

Ingkon gabe sitiruon na denggan do halak Kristen tu na asing. (2 Kor. 4:2; 1 Ptr. 5:2, 3) Molo adong halak Kristen na mamangke sinjata laho paluahon dirina sian parjahat, lehonon ni sintua ma poda na sian Bibel tu ibana. Alai molo tongtong dope disimpan ibana sinjata i, ndang sitiruon na denggan ibana. Alani i, ndang boi be dilehon tu ibana tugas dohot hak na sumurung di huria. Jala marlangku do on tu halak Kristen na mamboan sinjata alani parkarejoanna. Dumenggan do molo dilului ibana karejo na asing. *

Ingkon pilliton ni halak Kristen do cara na dumenggan laho mangalinggomi dirina, keluargana, dohot artana jala parkarejoan na songon dia laho ulahononna. Alai tingki mamillit i, ingkon ihuthononna do prinsip ni Bibel. Ala holongNa do umbahen na dilehon Debata prinsip i tu hita. I do alana, sasahalak na togu paralealeonna tu Jahowa ndang manimpan sinjata laho mangalinggomi dirina sian parjahat. Diboto nasida do, molo marpos ni roha tu Jahowa jala mangihuthon poda na sian Bibel, dapot nasida ma ngolu na dame salelengna.—Ps. 97:10; Poda 1:33; 2:6, 7.