Porang Armagedon, i ma porang terakhir ni Debata mangalo akka pamarettaon ni jolma. Saonari pe, akka pamarettaon ni jolma dohot akka na mendukung pamarettaon ni nasida mangalo do tu Debata. (Psalmen 2:2) Di porang Armagedon ma dimusnahon sude pamarettaon ni jolma.​—Daniel 2:​44.

 Holan sahali do hata “Armagedon” dipaboa di Bibel, i ma di Pangungkapon 16:16. Nungnga dipaboa hian di bukku Pangungkapon, molo “inganan na margoar Armagedon di bahasa Heber”, disi ma “akka raja na di tano on” dipapungu lao “tu porang di ari na balga, i ma ari ni Debata Pargogo na So Hatudosan.”​—Pangungkapon 16:14.

 Ise do na lao marporang di Armagedon? Jesus Kristus ma na mamimpin akka tentara na di surgo lao mangalo akka musu ni Debata. (Pangungkapon 19:11-​16, 19-​21) Musuna i, i ma akka halak na mangalo huaso ni Debata jala na menghina Ibana.​—Hesekiel 39:7.

 Di Timur Tengah do lao terjadi porang Armagedon on? Daong. Porang Armagedon on dang terjadi di sada tempat. Alai, di sude portibi on do porang Armagedon on lao terjadi.​—Jeremia 25:32-​34; Hesekiel 39:17-​20.

 Sipata, Armagedon on didok do “Har–​Magedon” (di Bahasa Heber Har Meghiddohnʹ), na lapatanna “Dolok Megiddo”. Megiddo, i ma sada kota di Israel najolo. Menurut sejarah, jotjot do marporang di kota i. Jala adong do piga-piga porang na hea terjadi disi disurat di Bibel. (Panguhum 5:​19, 20; 2 Raja-Raja 9:​27; 23:29) Alai porang Armagedon, dang na maksudna lao terjadi di sekitar ni kota Megiddo najolo. Alana dang adong dolok na bolak disi, jala Lembah Yizreel na jonok tu kota i pe dang siat lao menampung sude akka musu na marsada lao mangalo Debata. Jadi Armagedon, i ma situasi di sude portibi on tikki marpungu akka bangso di porang terakhir ni nasida lao mangalo pamarettaon ni Debata.

 Songon dia do situasina saleleng porang Armagedon? Dang taboto songon dia cara ni Debata mamakke huasona. Atik na lao dipakke Ibana do songon carana najolo. Misalna, diparo Ibana do udan es, gempa bumi, udan na massai doras, udan api, udan belerang, ronggur, dohot sahit. (Job 38:22, 23; Hesekiel 38:19, 22; Habakuk 3:​10, 11; Sakaria 14:12) Manang dibahen Debata ma bingung akka musuna, gabe marsibunuan ma sesama nasida. Ujungna, gabe sadar ma musuna i na Debata do na marporang mangalo nasida.​—Hesekiel 38:21, 23; Sakaria 14:13.

 Armagedon i do na gabe panutup ni jaman on? Dang na gabe dihancurhon portibi on. Alana, lao gabe inganan ni jolma do portibi on salelengna. (Psalmen 37:29; 96:10; Parjamita 1:4) Jadi tikki Armagedon, dang sude jolma dimusnahon. Alana didok di Bibel, adong do “sada punguan bolon”, i ma naposo ni Debata na lao diselamatton.​—Pangungkapon 7:​9, 14; Psalmen 37:34.

 Hata “portibi” na didok di Bibel, dang holan tano on maksudna disi. Alai sipata, boi do lapatanna halak na jahat na mangalo Debata. (1 Johannes 2:​15-​17) Alai maksudna disi, Armagedon ma na gabe tanda “panutup ni jaman on”.​—Mateus 24:3.

 Andigan do Armagedon i terjadi? Di ujung ni “hasusaan bolon” ma terjadi porang Armagedon. Didok Jesus, “Taringot tu ari dohot jamna dang adong na mamboto i, nang akka suru-suruan na di banua ginjang, nang anak i, holan Ama i do na mamboto.” (Mateus 24:21, 36) Nang pe songon i, dipaboa do di Bibel tanda na lao ro Armagedon, i ma saleleng haroro ni Jesus na dimulai di taon 1914.​—Mateus 24:37-​39.