Bibel paboahon taringot ajal ni portibi on: ”Sian mula ni hasiangan on rasirasa nuaeng ndang adong dope masa na songon i . . . Aut unang diorui angka ari i, ndang tagamon malua agia sada jolma.” (Mateus 24:21, 22) Alai dijanjihon Debata do torop na laho malua: ”Jala na laho salpu do portibi on . . . , alai na mian ro di salelenglelengna do na mangulahon lomo ni roha ni Debata.”—1 Johannes 2:17.

Molo naeng malua hita jala ’mian ro di salelenglelengna,’ aha na ingkon taulahon? Na ingkon papunguonta do arta asa malua? Daong. Tangkas do dipaboa Bibel ndang arta na dihaporluhon. Molo tajaha: ”Antong, anggo masarsar do hape saluhutna on, nda lam sumurung ma parange na badia dohot hadaulaton ni angka na paimaimahon jala mangkasiholi haroro ni ari ni Debata.” (2 Petrus 3:10-12) ”Saluhutna on” na dipaboa di ayat on dohot ma i pamarenta dohot rayatna—pamarentaon na jahat dohot sude na satolop tu pamarentaon i, ndang tu Debata. Tangkas ma molo arta na tapapungu ndang boi paluahon hita sian ari i.

Sasintongna, molo hita maraleale jala patuduhon angka parange na palashon roha ni Jahowa, boi ma malua hita. (Sepania 2:3) Unang ma taihuthon pingkiran ni torop jolma saonari jala unang ma leas hita tu angka tanda na patuduhon molo hita mangolu di ari parpudi. Alai tongtong ma hita ”paimaimahon jala mangkasiholi haroro ni ari ni Debata.” Sitindangi Ni Jahowa boi paboahon hatorangan sian Bibel tu hamu songon dia asa malua sian haroro ni ari ni Debata.