I ngéda bikristen bi bisu, man juu li bôt, “baôma ni mañ mi ntôñ” i Yérusalem, ba bé bot Juu li bakena ntôñ. Bon ba bé yoñ makidik makeñi inyu likoda li miñhook mi bikristen. (Minson mi baôma 15:2) Kiki ba bé wan bitilna, ba wahak mbuu mpubi le won u éga bo, bobasôna ba bé kiñ yada i yoñ makidik. (Minson mi baôma 15:25) I ndémbél i yon di noñ i len ini.

Djob a ngwélél bo inyu boñ sômbôl yé. Bilôk bikéé bi mbot Juu li bakena ntôñ bi yé miñhook. Ba gwé ngandak gwéha inyu Bañga i Djob. Ba gwé yak ngandak pék inyu yoñ makidik ma ma mbéñge nson wés ni mam ma mbuu. Ba nkodba hiki sonde inyu wan kii i nsômbla lôktata i pes mbuu ni nkoñ isi wonsôna. Nlélém kiki i hiai hi bisu, ba ñom biniigana bi umne i Bibel, ni njel maléta, bagwélél ba makiiña, tole bagwélél bape. Hala a nhôla litén li Djob i bana maada ikété mahoñol ni maboñok. (Minson mi baôma 16:4, 5) Juu li bakena ntôñ li ñéga ngôôba bijek bi mbuu, li nti makénd inyu bugus nson u ñañ nlam u Ane, li nti ki kunde inyu téé bet ba ñéga makoda.

Ba nwas le mbuu u Djob won u éga bo. Bet ba yé i Juu li Bakena Ntôñ ba mbéñge ndig Yéhôva, Nwet ngiinda yosôna ni Yésu, nu a yé Ño ntoñ, le ba éga bo. (1 Korintô 11:3; Efésô 5:23) Ba ntehe bé bomede kiki baénél litén li Djob. Bo, lôñ yada ni miñhook mi bikristen nwomisôna, “ba noñ Man Ntômba [Yésu] to he a nke.” (Masoola 14:4) Juu li Bakena Ntôñ li nti mayéga inyu masoohe més inyu yap.

• Bonjee ba bé Juu li bakena ntôñ i hiai bisu?

• Lelaa Juu li bakena ntôñ li noñ sômbôl i Djob i len ini?