¿KUNANSA nayra profetanakjamätanjja? Nayraqatjja kunas mä profetajj uk amuytʼañäni. Uka toqetjja, Perspicacia para comprender las Escrituras librojj akham siwa: “Khiti toqnamtï Diosajj amtanakapsa, munañapsa yatiyki ukawa”, mä arunjja “Diosat parlir jaqewa” sasa. Nayra profetanakajja, Diosan arsutanakapatwa parlapjjäna. Janiw profecianakak parlapkänti jan ukasti, Diosan yatichäwinakapatsa, leyinakapatsa, jaqenakaru markanakaru juzgañ amtki uka toqetsa yatiyapjjarakïnwa. Jiwasajj janis profecianak arskstanjja, Bibliat parlasaw Jehová Diosat yatiyirïtas uñachtʼaytanjja (Mat. 24:14).

Jehová Diosatsa, amtanakapat yatiyañasa, mä suma bendicionawa. ¿Kunatsa? Alajjpachan jalanaqaskir angelaruw yatiyañ yanaptʼasktanjja (Apo. 14:6). Ukampis, jan walinakan uñjasisaw Diosan arunakap yatiyañ jan askit uñjjsnati. Amuytʼañataki, inas mä luräwi katoqasajj jan sum jikjjatasksnati, jan ukajj aynachtʼata qarita ukham jikjjatasiraksna. Nayra tiempon jakir profetanakajj ukhamarak jikjjatasipjjäna. Ukampis janipuniw aynachtʼapkänti, Jehová Diosaw luräwinakap phoqañatakejj yanaptʼäna. Jichhajj kimsa profetanakat yatjjatañäni, kunsa jupanakat yateqsna uksa uñjarakiñäniwa.

Awisajj sapür luräwinakaw aynachtʼayistaspa, ukatwa yatiyirejj jan sarañ munjjsnati. Taqeniw samartʼañ muntanjja, Jesusasa arkirinakapas samartʼapjjarakïnwa (Mar. 6:31). Ezequiel chachat amuytʼañäni, israelitanakajj Babiloniar apat uñjasipkäna ukhaw profetjam servïna. Jerusalén marka mä ladrillor dibujañapatakiw Diosajj Ezequielar mayïna. Ukatsti uka markajj soldadonakampi muyuntat uñjasiñapäkäna ukwa uñachtʼayañapäna. Ezequielajj chʼeqäjjatwa 390 urunak iknoqañapäna, ukatjja 40 urunakarakiw kupëjjat iknoqañaparakïna. Diosajj Ezequielar sänwa: “Nayasti ñachʼantarakïmawa, jan maysat maysaru jithikipstaskañamataki, ukhamat uka tʼaqhesiñ urunakama tukuyañkama” sasa (Eze. 4:1-8). Kunatsa uk luräna ukwa israelitanakajj yatiñ munapjjäna.  Uksti Ezequielajj mä mara jilaw sapür luräna. ¿Kunas Diosan mayitap phoqañatakejj Ezequielar yanaptʼpachäna?

Ezequielajj kunatsa profetjam uttʼayatäna uk sum amuyäna. Profetjam uttʼaykäna ukhajja, Jehová Diosajj jupar sänwa: “[Israelitanakajj] parlatamarojj istʼapjjpas janis istʼapjjpan [...] jupanakajj yatipjjaniwa mä profetan jupanak taypin utjatapa” sasa (Eze. 2:5). Ezequielajj kuna amtampis profetjam uttʼayatäna uk sum amuyasajja, taqe chuymaw profetat irnaqañatak chʼamachasïna. Jerusalenajj soldadonakampi muyuntataw uñjasiñapäna, uk uñachtʼayañapatak Diosajj maykäna uk taqe chuymaw phoqäna. Tiempompejja, “Jerusalén markajj uñisirin amparaparu jaltʼatap[wa]” jupasa Babiloniar apatäpkäna ukanakas yatipjjäna. Uk uñjasaw israelitanakajj jupanak taypin mä profeta utjatap amuyapjjäna (Eze. 33:21, 33).

Jehová Diosajj niyaw Supayan apnaqat akapach tʼunjani sasaw yatiytanjja. Awisajj qaritas jikjjataskstanjja, Diosan arunakap yatiyirisa, yateqañ munapki ukanakar visittʼirisa, yatichiris sarapuntanwa. Qhepa urunakat parlir profecianak phoqasiskir uñjasajja, ‘Diosajj munañapsa amtanakapsa’ jiwas toqe yatiyatapat wal kusistanjja.

Jan aynachtʼañatakejja, Diosaw qollan ajayupampi yanaptʼistu. Ukampis jaqenakan jan istʼañ munapjjatapat aynachtʼsnawa. Ukhamanakanjja, Jeremías profetat amuytʼañasawa. Juparojj Diosan arunakap yatiyatapatjja, israelitanakajj jan wali arunakampi jiskʼachasaw chuym ustʼayapjjäna. Ukatwa mä kutejj akham säna: “Janiw jukʼampi Tatitut amtkjjäti, janirakiw jupan sutipatsa parlkjjäti” sasa. Jeremiasajj jiwasjam jaqerakïnwa. Ukhamsa jikjjataskchïnjja, yatiyaskakïnwa ¿kunatsa? Diosan arunakap parlañ toqet akham sänwa: “Chuymajjanjja ninjamaw nakhantitu, chʼakhanakamppacha jawqʼjarakitu. Nayajj uka ninjja pachparu imtʼañ munta, ukampis janiw imtʼañjamäkiti” sasa (Jer. 20:7-9).

Jaqenakan jan istʼañ munapjjatapat aynachtʼañäni ukhajja, suma yatiyäwinak yatiyktan ukwa amtañasa. Ukhaw ‘chuymasan ninas nakkaspaʼ ukham amuyañäni, ukatakisti Biblia sapür liyiñaw yanaptʼistani.

Yaqhep cristianonakajj Diosat yaqha luräwinak katoqasajja, kunjamsa uk phoqapjjani jan ukajj kunatsa uka luräwi jupar churapjje uk jan sum amuyasajj llakisipjjewa. Oseas profetajj inas ukham jikjjatasirakchïna. Jehová Diosajj jupar sänwa: “Jumajj saram ukatsti yaqha chachanakampi sarnaqer warmi katusim, jupampisti wawanakanïpjjarakim” sasa (Ose. 1:2). Casarasiñsa amtkasma ukham amuytʼañäni. Warmimäkani ukajj yaqha chachanakampiw sarnaqani sasin Jehová Diosajj siristam ukhajja, ¿kunjamakis jikjjatasisma? Oseas profetajj Jehová Diosar istʼänwa. Ukatwa Gómer warmimp casarasïna, jupampisti mä wawanïnwa. Tiempompejj Gómer warmejj mä phuchani ukhamarak mä yoqanirakïnwa, inas uka wawanakajj jan Oseas profetankchïnti. Diosajj janïräkipanwa juparojj warmipat akham säna: ‘Munirinakaparuw arkani’ sasa. Diosajj janiw ‘muniripa’ sasin siskiti jan ukasti ‘munirinakapa’ sasaw säna. Ukatsti nayra chachapar kuttʼañwa munani sasaw sarakïna. ¿Jumajj kunsa lurasmäna? ¿Uka warmimpi wasitat chikañ munasmänti? Jehová Diosajj uk lurañapatakiw Oseas profetar mayïna, janiw ukakïkänti uka warmimpi chikäskakiñatakejj walja qollqwa churäna (Ose. 2:7; 3:1-5).

Oseas profetajj inas akham jisktʼaschïna: “¿Kunatsa Diosan mayitap phoqañajäspa?” sasa. Ukham jisktʼaskasasa Diosan mayitaparjamaw luräna. Uka profetan sarnaqäwipajja, kunjamsa Diosajj israelitanakan jaytanukutajj jikjjatasïna ukwa amuytʼayistu. Qhepatjja, jupanakat yaqhepajj Diosatakjamaw sarnaqjjapjjäna.

Jichhürunakanjja, Diosajj janiw yaqha chachanakampi sarnaqer warmimpi casarasiñapatakejj  khitirus maykiti. Ukampis ¿Kunsa Oseas profetan sarnaqäwipat yateqsna? Jupajj Diosan mayitap phoqänwa. Jiwasajj ukhamarakiw Diosan mayitap phoqañatakejj utat uta, callenakana yatiyañatak chʼamachasiñasa (Hech. 20:20). Ukham yatiyañajj chʼamakïspawa. Amuytʼañataki, jiwasampi Bibliat yateqapkäna ukanakat waljanejja, Bibliat yateqañ wals munapkchïnjja, janipuniw utat uta yatiyir sarkäti sasaw sapjjäna. Ukampis tiempompejj yatiyjjapjjänwa. Ukajj yateqaskayawa.

¿Kunsa Oseas chachat yateqaraksna? Uka chʼama luräwi jan phoqañatakejj inas Diosar maychispäna, ukampis phoqänwa. Jupajj kuna luräwtï katoqkäna uk jan qellqkaspäna ukhajja, janiw khitis uk yatkaspänti. Awisajja, inas Jehová Diosat yaqhanakar yatiyañasajj wakischini, ukampis yatiytanti janicha uk janiw khitis yatkaniti. Anna kullakat parltʼañäni, jupajj Estados Unidos markanwa mä colegion yateqaskäna. Yatichiripajj kuna toqettï qellqañ munapkasma uka toqet qellqtʼat mä trabajo apanipjjäta sasaw mayïna. Sapa mayniw uka toqet arstʼañapäna, yateqer masinakaparus sumwa amuytʼayapjjañapäna. Anna kullakajj inas jan lurkchispänti. Ukampis Diosas mayninakar yatiyañatak maykaspa ukhamwa amuyäna. Yateqer masinakapajj kamsapjjanisa uka toqet lupʼisajja, Jehová Diosatwa kullakajj yanaptʼa mayisïna. Ukham lurasajja, ¿kunjamakis jikjjatasïna? Jehová Diosat parlañ horasätapwa amuyäna. Ukatwa aka toqet qellqäna: “¿Jaqenakajj monot jutatätanwa siski ukajj cheqäpachati?”.

Anna kullakajj yateqer masinakapar parlañ qalltkäna ukhajja, jupanakat mayniw wal jisktʼäna, jupasti monot jutatätanwa sasaw amuyäna. Anna kullakajj jisktʼanakapar sum qhanañchäna. Yatichiripajj ukham qhana, sum qhanañchatapat wal muspharasajj premio churäna. Uka urut aksaruw wal jisktʼkäna uka yateqer masiparojj Diosan luratanakapat parläna. Diosat yatiyasajja, Anna kullakajj akham siwa: “Jichhajj jan ajjsarayasisaw yatiyjjta” sasa.

Ezequiel, Jeremías, Oseas profetanakajja, janiw jupanakan askipak thaqapkänti. Jiwasajj janis profetäkstanjja, jupanakat yateqasiñäni ukhajj Diosan mayitanakap phoqañäniwa. Ukhamajj Bibliat sapaki jan ukajj familian yatjjatkasajja, ¿janit yaqha profetanakat yatjjatkaraksna? Sarnaqäwinakapat lupʼiñaw jupanakat yateqasiñatak yanaptʼistani.