Taqe jaqenakajj kusisita jakasipjjaspa ukwa Diosajj muni. Ukatwa jaqenakar munasitap layku aka Oraqsa ukat taqe kunanakatï ukan utjki ukanak lurawayi. Ukat kunanakatï jaqenakar tʼaqhesiyki ukanaksa niyaw chhaqtayjjani, ukhamat sum jakasjjapjjañapataki. Jeremías 29:11 liytʼäta.

Nuwasiñanaksa, usuñanaksa ukat jiwañanaksa janipuniw gobiernonakajj chhaqtayirjamäpkiti. Ukampis suma yatiyäwinakaw utji: niyaw Diosajj taqe uka gobiernonakar tʼunjani, ukat mä gobierno uttʼayarakini. Ukanwa, Diosan markapajj kʼumara ukat wali sum jakasjjapjjani. Isaías 25:8; 33:24 ukat Daniel 2:44 liytʼäta.

Tʼaqhesiñanak jan utjañapatakejja, Diosaw aka Oraqpachat jan wali lurir jaqenakar tukjani (Sofonías 2:3). ¿Kunapachas uk lurani? Cheqansa, kunanakatï jichhürunakan jaqenakar wal tʼaqhesiyki ukanakajj Biblian qellqatajjänwa. Ukhamajj niyaw Diosajj taqe jan wali jaqenakar tukjani, ukwa kuntï jichhürunakan pasaski ukajj uñachtʼayistu. 2 Timoteo 3:1-5 liytʼäta.

Bibliat yatjjatasaw Diosat jukʼamp yateqañäni, kunjamtï mä munasir awkejj mä carta wawanakapar apaykejja, ukar uñtasitaw Diosan Arupajja. Jichhürunakanjja, kunjams sum jakassna ukat jutïrinsa kunjamsa wiñay jakañ jikjjatsna ukanakwa Bibliajj qhanañchi. Cheqansa, Bibliat yatjjataskatamajj janiw taqenir kusisiykaniti. Ukampis jan ukanakampi aynachtʼamti, yateqatamajj janiw inamayäkaniti, walja bendicionanakwa katoqäta. Proverbios 29:25 ukat Apocalipsis 14:6, 7 liytʼäta.