UÑTAM mä palomaw khä jaqir sarxataski. Uka jaqix Jesusawa. Niya 30 maranïxiwa. Ukat jupampi chikäski uka jaqix Juan satawa. Jupa tuqitxa mä jukʼa yatiqxtanwa. ¿Mariax Elisabetar tumptʼir sarkäna ukhax Elisabetan purakapankaskir wawax kusisiñat unxtäna uk amttati? Uka wawax Juanänwa. Ukampis ¿Juanampi Jesusampix kuns lurasipki?

Juanax Jordán jawir umaruw Jesusar chhaqantayaskäna. Ukhamaw bautisasiñaxa. Umar chhaqantayasin waysusa. Ukhamwa Juanax jaqinakaru bautisäna; ukatwa Bautisir Juan sataxa. Ukampis ¿kunatsa Jesusar bautispachäna?

Kunattix Jesusaw bautisit säna, ukatwa bautisäna. Arrepentisitap uñachtʼayañ munir jaqinakaruw Juanax bautisäna. Ukampis ¿Jesusax juchanïnti? Jesusax janiw juchanïkänti, alaxpachat jutiri, Diosan Wawapächïnxaya. Ukhamasti janiw arrepentisitapat bautisayaskänti, ukhamasti kunatsa bautisayaspachäna uk yatxatañäni.

Juanampi bautisayasiri janïr jutkasaxa, Jesusax carpinterünwa. Mä carpinteroxa lawata kʼulluta mesanak sillanaka qunuñanak luririwa. Marian chachapaw carpinterünxa, jupaw Jesusarux ukham lurañ yatichäna. Ukampis Diosax janiw Wawaparux khitankänti carpinterüñapatakixa. Diosax mä amtampiw khitanïna, ukhamasti kunti lurañapäkäna uka tiempox purinxänwa. Ukatwa, Jesusax Juanarux bautisit sänxa, ukhamata Awkipan munañapa lurañatak jutatapa uñachtʼayañataki. ¿Ukax Diosatak askïnti?

Jïsa, kunapachatï Jesusax umat mistunkäna ukhaxa, mä aruw alaxpachat akham sir istʼasïna: ‘Akaw Wawajaxa, kawkiritix chuymaj kusisiyki ukaxa’ sasa. Ukatxa, alaxpachaw jistʼartäna ukatwa aka palomax Jesusxar sarxatäna. Ukampis janiw chiqa palomäkänti, jan ukasti Diosan qullan ajayupänwa.

Bautisatäxasinxa Jesusax kunayman tuqit lupʼiñapänwa, ukhamasti 40 uruw wasarar saräna. Ukat Supayaw jupan ukar saräna. Diosan kamachinakap pakʼintayañ laykuxa kimsa kutiw Supayax Jesusar yantʼäna. Ukampis Jesusax janiw juchar purkänti.

Ukatxa Jesusax wasarat kuttʼxasaxa, mä qhawqha jaqinakampiw uñtʼasïna, jupanakaw nayrïr arkirinakapjama uñtʼatäpxixa. Yaqhipanakax akham satäpxiwa: Andrés, Pedro (Simón satarakïnwa), Felipe ukat Natanael (Bartolomé satarakïnwa). Jesusampi arkirinakapampixa Galilea tuqiruw sarapxäna. Natanaelan Caná markaparuw puripxäna, ukat uka markanxa mä casarasïwiw utjäna, ukanwa nayrïr milagrop Jesusax luräna. ¿Kuna milagrsa lurpachäna uk yattati? Umwa vinoptayäna.