WASITAT filisteonakax israelitanakamp nuwasir jutapxäna. Davitan kimsa jilanakapax Saulan soldadonakapänwa. Ukatwa tatapax Davitar akham säna: ‘Aka jampʼimpi tʼantʼampi jilanakamatak aparapma. Kunjamäsipkisa uk uñjanim’ sasa.

Soldadonakax samarapxäna ukar purisaxa, nuwasiñatak wakichasisipkän uka taypin jilanakapar Davitax thaqtäna. Ukatxa Goliat sat filisteo jachʼa jaqiw israelitanakar archʼukjañatak mistunïna. 40 uruw ukhama, sapa alwa, sapa aruma, qallasïna siwa. Akham sasa: ‘Jumanakax maynir ajllisipxam nayampi nuwasiñapataki. Jiwayitanixa, nanakax jumanakan esclavonakamaw tukupxä, ukampis nayatï jiwayäxa, jumanakaw esclavonakajat tukupxarakïta. ¿Khitis nayampi nuwasispa?’ sasa.

Davitax yaqhip soldadonakar akham jisktʼäna: ‘¿Aka filisteoru jiwayirirusa, israelitanakat aka jiskʼachäwi apaqirirusa kuns Saulax churani?’ sasa.

Ukat mä soldadoxa, ‘Saulax qamiriptayaniwa, phuchapwa warmitak churarakini’ sänwa.

Ukampis israelitanakax wali jachʼa jaqïpan wal Goliatar axsarapxäna. Niya 3 metronïnwa, ukat jarkʼaqasiñatak escudo apnaqiripasa yaqhänwa.

Yaqhip soldadonakax Saular akham yatiyapxäna, Davitaw Goliatamp nuwasir sarañ muni sasa. Ukampis Saulax ‘janiw sarkasmati, wawäsktawa, jupax nayratpach soldadopunïnwa’ sänwa Davitaruxa. Ukat Davitax sarakïnwa: ‘Nayax awkijan uwijap apasir osorusa leonarus jiwayirïtwa. Aka filisteor jiwayarakikïwa. Jehová Diosaw yanapitani’ sasa. Ukat Saulax ‘sarmaya, Diosaw jumampïskani’ sänxa.

Davitax jawirat phisqa qala wayaqapar irantasïna. Ukat uka jachʼa jaqimpi nuwasiriw saräna. Goliatax Davitar uñjasax wal larusïna. Davitar jiwayañax janiw chʼamäkanit sasaw säna.

‘Makatita, jamachʼinakaru animalanakaru janchim manqʼarayä’ sasaw Goliat chachax säna. Ukampis Davitax sänwa: ‘Jumasti espadampi, lanzampi, flechampiw nayamp nuwasir juttaxa, ukampis nayax jumampi nuwasirix Jehová Diosan sutipampiw jutta. Jichhüruw Jehová Diosax jumar amparajaru churitani, nayaw jiwayäma’ sasa.

Davitax Goliat uñkatataw tʼijüna. Wayaqapat mä qal irsusax qʼurawaparuw uskuntäna, ukat taqi chʼamapampiw qʼurawtʼäna. ¡Parat waktʼayäna, ukhamwa Goliatar jiwayäna! Filisteonakax suma nuwasir jaqipan jiwatap uñjasax tʼijtxapxänwa. Israelitanakax arktasin jiwarayapxäna.