AKA jaqinakax jan walin uñjasipxi. Jan jiwañatakix tʼijtxapxañapawa. Israel markat uñaqir jutirinakawa, yanaptʼaski uka warmix Rahab satawa, utapax Jericó markan uyu patxapankänwa. Kunjamsa ukax pasatayna uk uñjañäni.

Israelitanakax Jordán jawir niy makatañatakïxapxänwa Canaanar mantañataki. Ukat janïr makatkasaxa, Josué tatax pä uñaqa akham sasa khitäna: ‘Uñjanipxam kunjamataynas uka uraqixa ukhamaraki Jericó markasa’ sasa.

Uñaqanakax Jericor mantasax Rahaban utaparuw puripxäna. Ukampisa, Jericó apnaqiriruw mä jaqix akham säna: ‘Masärmax pä israelitaw uñaqir jutapxatayna’ sasa. Uk istʼasax Rahaban utaparuw jaqinak khitäna akham sasa: ‘¡Utamat uka tatanakax mistunipxpan!’ sasa. Ukampis Rahabax uta patxaruw imantäna. Ukat akham sänwa: ‘Jïsa, jutapxatayna, ukampis janiw kawkit jutapxatapsa yatkti. Chʼamakäxi ukhaw sarxapxi, janïr markan punkupax jistʼantask ukhawa. ¡Arktapxma, katjapxätawa!’ sasa. Iyaw sasaw chhukstanipxäna.

Sarxapxipanxa, jankʼakiw Rahabax uta patxar makatasin uñaqanakar akham säna: ‘Aka uraqxa Jehová Diosax churapxätam ukxa yattwa’ sasa. ‘Diosax Wila Lamar Qut wañtʼayäna Egiptot mistunipxañamataki uksa istʼapxtwa, kunjamsa Sehón ukat Og sat apnaqirinakaru jiwarayapxta uksa yatipxaraktwa. Nayax jumanakar yanaptʼapxsmawa, ukat mirä amp suma, nanakarux khuyaptʼayapxarakitaya. Awkijarusa, taykajarusa, jilanakajarusa kullakanakajarusa janiy jiwayapxistati’ sasa.

Uñaqanakaxa qhispiyapxämaw sasaw arsuwayapxäna. ‘Aka wila wiskhampiw aka ventanamar chinkatäta, ukatsti utamarux familiam jawsthapïta. Aka markar mantanipkä ukhaxa, aka wiskha uñjasaxa janiw utamankirinakatxa khitsa jiwayapkäti’ sasa. Uñaqanakax kuttʼxapxän ukhaxa, Josué tataruw kunas pasatayna uk yatiyapxäna.