Miqueas 6:1-16
6 Mirä amp suma, kuntï Jehová Diosajj siski uk istʼapjjam.
Sartasipjjam, qollunak nayraqatar quejanak apanipjjam,jiskʼa qollunakajj arunakam istʼapjjpan.+
2 Qollunaka, Jehová Diosan quejap istʼapjjam,oraqen suma uttʼayat cimientonakapa,+ istʼapjjam,kuna laykutejj Jehová Diosajj markap contrajj mä quejaniwa.
Jïsa, Israel contraw jupajj quejap akham sasin presentaski:+
3 “Nayan markaja, ¿kunarak nayajj jumar lursmasti?
¿Kunarak jumar qariyañatakejj nayajj lurtsti?+
Mirä amp suma, naya contra qhanañcham.
4 Kuna laykutejj nayaw Egipto oraqet jumar irpsunsma,+esclavökayäta uka oraqetwa nayajj irpsunsma,+nayajj Moisesampiru, Aaronampiru, Miriamampiruw juman ukar khitanta.+
5 Nayan markaja, mirä amp suma, kuna jan walinaktï Moab markankir Balac reyejj lurañ amtkäna uk amtasikimaya,+Beor chachan Balaam yoqapajj Balac reyirojj kuntï siskäna uk amtasikimaya,+kuntï Sitim+ lugarat Guilgal+ markakam paskäna uk amtasikimaya,ukhamat Jehová Diosan cheqapar luratanakap yatiñamataki” sasa.
6 ¿Kunampirak Jehová Dios nayraqatar sarästi?
¿Kunampirak alajjpachankir Dios nayraqatan altʼasïsti?
¿Enterpach nakhantayat ofrendanakampit saräjja,mä marani torillonakampit saräjja?+
7 ¿Waranqa waranqa orqo ovejanakampejj Jehová Diosajj kusisitäniti?
¿Walja aceitempejj kusisitäniti?+
¿Kutkatasitajatjja jilïr yoqall wawajarut churäjja?
¿Juchachasitajat pachpa wawajarut churäjja?+
8 Kunatï walïki ukwa Diosajj jumar sistamjja,¿kunsa Jehová Diosajj jumat suyaski?*
Akakwa Diosajj jumat suyi: ¡kunatï cheqapäki uk lurañama,*+ jan jaytjasiñarojj munasiñama,*+altʼat chuymampi*+ Diosamamp sarnaqañama!+
9 Jehová Diosajj markankir jaqenakarojj wali jachʼatwa artʼi,khitinakatï yatiñanïpki ukanakajja sutimarojj ajjsarapjjaniwa.
Castigañatak vararojj wali atencionamp istʼapjjam, khititï castigañatak vara apanki ukarus istʼapjjarakim.+
10 ¿Jan walinak luras jikjjataskäna uka wali valorani yänakajj* jan wali jaqen utapankaskakiti?
¿Jan phoqatäki uka ajjtaskañ efá* medidajj jan wali jaqen utapankaskakiti?
11 ¿Falso balanzanak apnaqasajj janit nayajj juchanïkiristjja?
¿Engañjañatak pesañ qalanak apnaqasajj janit nayajj juchanïkiristjja?+
12 Kuna laykutejj wali utjirin jaqenakapajj nuwasiñanakampi phoqantatäpjjewa,markachirinakapas kʼarinakwa parlapjje,+lajjranakapasa lakanakapasa engañjapjjewa.+
13 “Ukatwa nayajj jumar castigäma,+juchanakam kawsajja qʼala tukjataw uñjasiyäma.
14 Jumajj manqʼätawa, ukampis janiw sisktʼaskätati,manqʼat awtjatäskakïtawa.+
Kunanaktï jumajj apaskäta ukanakjja janiw mä seguro lugarar apaskätati,kunanaktï apaskäta ukanakjja enemigonakamaruw nayajj churäjja.
15 Jumajja jathanakwa satäta, ukampis janiw cosechkätati.
Aceitunanakwa jumajj takïta, ukampis janiw aceitemajj utjkaniti.
Uvasanakwa jumajj takïta, ukampis janiw vino umkätati.+
16 Kuna laykutejj jumanakajj Omrí chachan leyinakapwa arkapjjtajja, Acab+ chachana ukhamarak familiapana taqe jan wali luratanakapwa arkapjjtajja,jupanakan ewjjanakaparjamaw lurapjjaraktajja.
Ukatwa nayajj jumanakar castigapjjäma.
Kunanaktï nayajj jumanakar lurapkäma ukanak uñjasajja jaqenakajj musparapjjaniwa.+
Jumanakajj markanakan jiskʼachäwinakapwa aguantapjjarakïta”.+
Notanaka
^ Jan ukajja, “modestia”.
^ Jan ukajja, “suma chuymampi jan jaytjasa munasiñ uñachtʼayañama”. Hebreo arunjja, “munasiñat jan jaytjasiñar munasiñama”.
^ Jan ukajja, “cheqap sarnaqer jaqëñama; jan khitirus yaqhachirïñama”.
^ Jan ukajja, “jumar mayampi maytamjja”.
^ Jan ukajja, “cosasanakajj”.
^ Apéndice B14 uñjjattʼäta.
