Job 13:1-28
13 ”Ukhamäskapuniwa, nayranakajajj taqe akanakwa uñji,jiñchunakajas istʼiwa, ukatsti amuyaraktwa.
2 Kuntï jumanakajj yatipkta ukanaksa yatiraktwa,janirakiw jumanakat minusäkti.
3 Ukampis nayajj Taqe Chʼamani Diosampiw parlañ munirista,Dios nayraqatanwa naya pachpa arjjatasiñ munirista.+
4 Ukampis jumanakajj kʼarinakampiw qʼañuchapjjestajja,taqe jumanakajj jan kunatak serviri qollirinakäpjjtawa.+
5 Jumanakatï jan kun arsus amukïpjjasmajja,yatiñanïpjjatam uñachtʼayapjjasma.+
6 Mirä amp suma, kunanaktï nayajj arskä ukanak istʼapjjeta,ruwtʼasitanakajs istʼapjjakitaya.
7 ¿Jumanakajj Diosan sutipjjarut jan cheqapäki uka juchañchir arunak parlapjjäta,jupan sutipjjaruch kʼarinak parlapjjäta?
8 ¿Jupa toqetti saytʼasipjjäta?
¿Jumanakajj cheqpach Diosar arjjatañti yantʼapjjäta?
9 Diosatï jumanakar uñakipapjjeristam ukhajj ¿jupajj jumanakat kusisispati?+
¿Kunjamtï mä jaqer engañaski ukhamti juparojj engañapjjasma?
10 Jumanakatï engañonakampi Dios toqet saytʼapjjäta, uk imtʼañs munapjjarakïta ukhajja,+jupajj toqenoqapjjätamwa.
11 ¿Janit jupan jachʼa Diosätapajj jumanakar wal ajjsarayapkätamjja?
¿Janit jupan wal ajjsarayañapajj jumanakar katuntapkätamjja?
12 Jumanakan yatiñani arunakamajj* qhellar uñtat säwi arunakakiwa,arsutanakamajj ñeqʼet lurat fácil pʼakisir escudonakar uñtasitakiwa.
13 Naya nayraqatan amukïpjjam, ukhamat parlañajataki.
¡Kunatï nayar pasañapäki ukajj pasitpan!
14 ¿Kunatsa naya pachpajj niyapun vidaj aptʼasta?*
¿Kunatsa nayajj niya jiwañan uñjasta?
15 Diosajj jiwaykchitaspasa, nayajj jupar confiyaskakiristwa,+jupa nayraqatanwa jan juchanïtaj uñachtʼayirista.
16 Jupasti nayan salvirijaruw tukurakispa,+kuna laykutejj janiw khiti jan wali jaqes* jupa nayraqatankkaspati.+
17 Arunakaj wali amuyumpi istʼapjjam.
Kuntï arskä uk istʼapjjam.
18 Jichhajj uñjapjjam, juicioj qalltañapatakiw nayajj wakichtʼasta.
Razonanïtajs yatiraktwa.
19 ¿Khitirak nayamp jiskhisispasti?
¡Nayajj amukïrista ukhajj jiwjjeristwa!*
20 Diosajay, nayajj pä toqetwa jisktʼasiñ munirisma,*ukhamat jan mayampis jumat imantasjjañajataki:
21 jathi amparam nayat apaqtʼasikitaya,jumar ajjsarañas janirak nayar sint ajjsarayitpanti.+
22 Jum nayraqat arsum, nayasti jaysarakïmawa,jan ukajj nayar parlayita, jumasti nayaruw jaysarakitäta.
23 ¿Kunas nayan pantjasitanakajasa juchanakajasa?
Jan wal luratajsa juchajsa uñachtʼayita.
24 ¿Kunatsa jumajj ajanum imantasta?+
¿Kunatsa nayarojj enemigomarjam uñjista?+
25 ¿Thayan apat mä laphirut sustjañ munta?
Jan ukajj ¿mä waña pajaruch arknaqañ munta?
26 Jumajj naya contra arsutanak qellqaskaktawa,wayna tiempojan juchanak luratajatwa tʼaqesiyistajja.
27 Jumaw kayunakaj cepor* katuntayistajja,taqe thakinakajwa uñakiptajja,kayu taktʼatanakajsa mayat maya arktaraktajja.
28 Ukhamasti jaqejj* ñusantiwa, kunjamtï mä kunas ñusantki ukhama,thuthan tukjat isir uñtata.
Notanaka
^ Jan ukajja, “Jumanakan arsutanakamajj”.
^ Hebreo arunjja, “¿Kunatsa jañchij laka chʼakhanakajamp aptjja?”.
^ Jan ukajja, “janiw khiti apostatas”.
^ Ukajja, “Maynitï uk luraspajja, nayajj amukëjjeristwa, jiwjjarakiristwa” sasaw jaqokipasirakispa.
^ Hebreo arunjja, “Payak nayarojj jan luristati”.
^ Hebreo arunjja, “jupajj”. Inas Job chachat parlaskchi.
