Smita, * ti gunaa de 35 iza ni guleza ndaaniʼ guidxi Daca (Bangladés), nabé binibiáʼ binni laabe purtiʼ nacháʼhuibe. Guiráʼ binni binibiáʼ laabe casi ti gunaa runi dxiiñaʼ ne nayecheʼ bibaniné xheelaʼ ne gucanebe binni guiziidiʼ de Dios. Peru ni málasi guca huará Smita ne biaʼ ti semana despué gútibe, ni bizaacabe que nabé bininani binnilídxibe.

James ne xheelaʼ, biaʼ 35 iza guirópacaʼ, laaca binibiáʼ binni laacabe cásica binibiaʼcaʼ Smita. Raca caadxi iza yegánnacabe caadxi xhamígucabe ni nabeza ruaa nisadóʼ, ladu oeste de Estados Unidos, peru maʼ qué nibiguétacabe ra lídxicabe ni nuu Nueva York. Gúticabe lu ti accidente ne carru ne pur ngue nabé naná yuubaʼ biaanané binnilídxicabe ne ca xhamígucabe.

Tutiica zanda gudii cuenta guiráʼ ladu nga nuu yuubaʼ ne stale cosa malu: lu ca guerra ca huayati stale soldadu ne binni ni que guzaabiʼ gastiʼ; cani rucheené ley ne cani runiná stobi cunitilucaʼ xquendanabani mil de binni ni qué guzaabiʼ gastiʼ; lu ca accidente ra rati stale binni ne ca guendahuará malu ni maʼ qué rianda ca runiná cani binni nahuiiniʼ o huaniisi, pobre o ricu; zaqueca ca desastre natural ni runitilú guidubi naca ti guidxi, guendaracananalaʼdxiʼ ne guiráʼ cosa ni cadi jneza ni raca ndaaniʼ Guidxilayú riʼ guiráʼ si dxi ridúʼyanu cani. Zándaca huadíʼdiluʼ lu ca guendanagana riʼ.

Nga runi, gastiʼ naca guinabadiidxaluʼ laaca lii:

• Xiñee rizaaca binni nachaʼhuiʼ cosa malu.

• Ñee Dios napa donda la?

• Ñee ni málasi ridiʼdiʼ binni yuubaʼ la? o binni runi xiixa para guizaaca cani.

• Ñee pur ni runibiáʼcabe casi karma ca nga rizaaca cani la? Riguíxenu ni maʼ bíninu ante la?

• Pa nuu ti Dios ni napa stale poder, xiñee qué rulabe cani nachaʼhuiʼ yaʼ.

• Ñee ziuu dxi guiree guiráʼ yuubaʼ ne guiráʼ cosa malu la?

Para guicábinu ca guendarinabadiidxaʼ ca, primeru guicábinu xhupa riʼ: Xiñee rizaaca stale cosa malu. Ne, xi chiguni Dios para cuee cani.