Revista ni cayuundaluʼ riʼ bizulú biree ni dede lu beeu julio iza 1879. Dede dxi ca nabé huachaa ca tiempu ca, ne revista riʼ laaca (biiyaʼ foto ni cá luguiáʼ ca). Dede lu revista Torre stiʼ ni rapa riʼ zuuyaluʼ zadxaa caadxi cosa luni. Xi laacani yaʼ.

Ndaaniʼ stale guidxi zeʼ dxi jma ruyubi binni xiixa ni racalaʼdxiʼ ganna lu Internet ne jma riuuláʼdxicabe iquiiñecabe ni. Ti clic si gudiicabe maca rihuinni stale ni gúʼndacabe ne lu Internet si nuu cani. Yanna riʼ zanda guʼndaʼ binni stale libru, revista ne periódicu lu Internet.

Pur ni bizéʼtenu ca maʼ bichaʼdu caadxi cosa ni nuu lu yaza stidu (www.jw.org/zai) lu Internet ti chuulaʼdxiʼ binni chuʼ luni ne cadi gaca nagana para laa guyubi xiixa luni. Racá zanda guʼndaʼ binni ca guiʼchiʼ ni nuu lu jma de tapa gayuaa diidxaʼ, ne dede beeu riʼ laaca zanda gúʼndacabe ca tema ni maca huaree lu ca revista stidu, peru yanna maʼ zanda gúʼndacabe cani lu Internet. *

Cumu lu Internet si nga zaree ca tema ca la? revista Torre stiʼ ni rapa ca maʼ qué zaca ni de 32 yaza, sínuque maʼ zaca ni de 16 yaza. Yanna riʼ ribiʼxhiʼ revista ca lu 204 diidxaʼ, cumu maʼ huaxiéʼ yaza nápani la? maʼ zanda guibiʼxhiʼ ni lu xcaadxi diidxaʼ.

Pur modo chigaca revista riʼ yanna ribézadu ganda gacaneni jma binni ganna de cani zeeda lu Stiidxaʼ Dios para guilacaʼ. Naguixhe íquedu dede biaʼ gándatiʼ gusiene chaahuidu binni ne modo chuulaʼdxiʼ guiziidiʼ lu ca revista ca ne lu Internet, ti zacá gacaneni ca binni ni runi respetar Biblia ne racaláʼdxicaʼ gánnacaʼ xipeʼ nga rusiidini.

Cani bicaani