Tuu nga Jesús

«Casi guiráʼ binni gadxé gadxé ni riníʼ ique de laabe. Cásica cani zinanda Jesús ne zaqueca cani qué runi cré laabe huanabadiidxacaʼ tupeʼ nga gúcabe.» (STAN GUTHRIE, TI HOMBRE NI RUCAA LIBRU)

NABÉ ruyubi binni ganna de Jesús. Rihuinni zacá ni, purtiʼ nabé ridoo ca libru ni caníʼ de laabe, ne jma stale binni riguuya ca película stibe. Peru rinabadiidxaruʼ binni stale cosa de laabe, ne gadxé gadxé ni riniʼcaʼ.

Raca chupa chonna iza, biquiiñeʼ chupa periodista Internet para gunabadiidxacaʼ binni «Tuu nga Jesús» ne gunábacaʼ laacabe guicábicabe. Guidúʼyanu xi bicabi xhupa chonna de laacabe.

● «Ruluíʼ si gúcabe ti rabinu (ti binni ni bisiidiʼ de Dios), ne galán ejemplu bisaanabe purtiʼ gucanebe binni.»

● «Gúcabe ti binni casi laanu ne qué huayuuruʼ tu guibani casi bibánibe.»

● «Gastiʼ ni gusihuinni dxandíʼ bibánibe.»

● «Laabe nga Xiiñiʼ Dios ni gule, ni guti ne biasa de lade gueʼtuʼ para guixá stóndanu. Jesús nabani yanna ne zabiguétabe lu Guidxilayú sti biaje.»

● «Naa runeʼ cré laabe nga tobi lucha xiiñiʼ Dios, binni laabe ne laaca nácabe ti dios.»

● «Ca binni huaniisi ni riníʼ ique casi ti xcuidi nga runi cré ni riníʼcabe de Jesús.»

Cumu gadxé gadxé nga ni bicabi ca binni ca la? qué zanda diʼ guininu jneza bicabi guirácabe. Yanna, ñee nuu xiixa ni zanda gacané laanu gánnanu ni dxandíʼ de Jesús la? Laadu cani rucaʼdu revista riʼ nánnadu Biblia nga Stiidxaʼ Dios, ne laasini zanda gacaneni laanu gánnanu ni dxandíʼ de Jesús (2 Timoteo 3:16). *

Lu sti tema ca zadúʼyanu ximodo cacabi Biblia chupa chonna de ca cosa ni rinabadiidxaʼ binni de Jesús. Ne laapebe guniʼbe zanda guilá «irá tu guni cre» laabe (Juan 3:16). Nga runi, galán gánnaluʼ xi rusiidiʼ Biblia de ca guendarinabadiidxaʼ ca. De racá maʼ lii gúʼyaluʼ pa zaziidiluʼ jma de Jesús ne ximodo zanda gápaluʼ fe laabe.

[Nota]