Cani ruundaʼ revista riʼ racaláʼdxicaʼ gánnacaʼ

Ñee zanitilú Guidxilayú riʼ lu iza 2012 la?

▪ «Stale binni ni runi cré apocalipsis málasi bidxacaʼ ndaaniʼ ti guidxi stiʼ Francia [...]. Ca binni riʼ riníʼ íquecaʼ dxandíʼ zanitilú Guidxilayú 21 stiʼ diciembre 2012, purtiʼ nacaʼ dxi ca nga riluxe ti tiempu de 5,125 iza ni zeeda lu calendariu yooxhoʼ stiʼ ca maya.» (BBC News.)

Lu siglu XXI riʼ stale binni rusiidiʼ xi chiguizaaca Guidxilayú riʼ, casi ca xaíque stiʼ ca religión ni nacaʼ maʼ chiguinitilú ni, zaqueca cani nacaʼ científicu laacaʼ ne xcaadxi binni ni riníʼ xi chiguizaaca despué. Intiica guiníʼ ca binni ca, xadxiruʼ ziuu Guidxilayú riʼ. Dxandipeʼ la? qué zanitilú ni lu iza 2012, ne qué ziuu dxi guinitilú ni.

Biblia na: «Riluxe ti generación, ne ruzulú sti generación, peru guidxilayú riʼ qué ziuu dxi guiluxe» (Eclesiastés 1:4). Laaca galán guiníʼ íqueluʼ ni na ca diidxaʼ ni zeeda lu Isaías 45:18: «Ndiʼ nga ni maʼ guníʼ Jiobá, [...] ni bizáʼ guidxilayú ne ni biʼniʼ ni, Laabe, ni gudixhestí ni, ne cadi bizáʼsibe ni, sínuque bizaʼbe ni para cueza binni luni: “Naa nga Jiobá, ne gástiruʼ stobi”».

Guníʼ ique ejemplu riʼ: ti hombre ni nadxii xiiñiʼ, gulee stale tiempu para bizáʼ ti barcu huiiniʼ quiteʼ xiiñiʼ para gusiecheʼ laabe. Yanna, ñee nuxuuxebe ni despué de nusigáʼdebe ni xiiñibe la? coʼ njaʼ. Purtiʼ pa ñúnibe zacá, nusihuínnibe nabé malu laabe. Cásica biʼniʼ hombre ca, Dios laaca bizáʼ Guidxilayú riʼ para guibani binni luni. Laabe gúdxibe Adán ne Eva: «Lagapa xiiñitu ne lagaca stale ne laguchá guidxilayú riʼ ne laguni dxiiñaʼ luni». Biblia laaca cuzeeteʼ despué «biiyaʼ Dios guiráʼ ni biʼniʼ ne, ¡biaguʼyuʼ!, nabé galán cani» (Génesis 1:27, 28, 31). Dios caʼruʼ guchaa ni gudixhe guni né Guidxilayú riʼ, nga runi qué zudiibe lugar guinitilú ni. Sicaríʼ guniʼbe de cani maʼ bizabiruuabe gúnibe: «Stiidxaʼ [...] qué zabiguetaʼ ni ra nuaa sin gácani, sínuque zúnini ni racalaʼdxeʼ, ne dxandíʼ zácani purtiʼ para nga biseendaʼ ni» (Isaías 55:11).

Peru Jiobá maʼ guníʼ zunitilú ca binni ni «[cu]nitilú guidxilayú» (Apocalipsis 11:18). Ne Biblia caníʼ: «Cani runi jneza ca nga zabánicaʼ lu guidxilayú riʼ, ne cani qué gapa donda nga ziaanacaʼ luni. Peru ca malu ca la? zaruugucaʼ de lu guidxilayú; ne cani rudxii deche, ziaaxhacaʼ luni» (Proverbios 2:21, 22).

Padxí gaca ni na ca diidxaʼ ca yaʼ. Nin tobi de laanu qué ganna. Ne Jesús peʼ guníʼ: «Padxí ne pora la? iruti ganna, nin ca ángel ni nuu ibáʼ, dede nin naa qué gannaʼ, sínuque Bixhoze siaʼ nga nanna» (Marcos 13:32). Ca testigu stiʼ Jiobá qué riguíxhecaʼ padxí gunitilú Dios binni malu. Neca nuucabe listu para gúʼyacabe «seña» ni gusihuinni maʼ chiguinitilú ca cosa malu nuu yanna riʼ, ne nánnacabe «mayaca izaa xhi guidxilayú» casi rieeteʼ lu Biblia, peru qué zanda diʼ gánnacabe padxipeʼ «chi iluxe» cani (Marcos 13:4-8, 33; 2 Timoteo 3:1). Ca cosa ca rusaanacabe cani lu náʼ Bixhózecabe ni nuu guibáʼ ne lu náʼ Xiiñiʼ.

Laga guedandá dxi ca, jma nga ricá íquecabe gusiidicabe binni de Reinu stiʼ Dios, ti gobiernu ni chiguni mandar lu guidxilayú dede guibáʼ, ne zuni ni ti paraísu. Dxi ca «cani runi jneza ca zacaacaʼ guidxilayú, ne zabánicaʼ luni guiráʼ dxi» (Salmo 37:29).

[Paraa gucuaacabe imagen ni zeeda lu yaza 13]

Ni bidii Image Science and Analysis Laboratory, NASA-Johnson Space Center