Ni gusiiditu ca xiiñitu

Ñee huayuni sentirluʼ qué rinácabe guidxaagacabe lii la?

ORA qué rinácabe guidxaagacabe ti binni la? runi sentir cucaanácabe laa, zándaca runi sentirbe zacá purtiʼ gadxé raza laabe o de gadxé guidxi laabe, o pur modo riniʼbe o pur cani rúnibe. Ñee huayuu dxi guni sentirluʼ zacá la? a...

Guidúʼyanu historia stiʼ ti hombre ni biʼniʼ sentir zacá. Labe Mefibóset. Pa huayuu dxi guni sentirluʼ zacá la? zaziidiluʼ stale cosa de laabe. Tuu nga Mefibóset. Ne xiñee biʼniʼ sentirbe qué rinácabe guidxaagacabe laabe.

Mefibóset nga xiiñiʼ Jonatán, ne Jonatán nga ti hombre ni nabé guca xhamigu David. Ante guuticabe Jonatán lu ti guerra gunábabe David gaca nachaʼhuiʼ né ca binnilídxibe. Gudiʼdiʼ si iza, dxi maʼ naca David rey, bietenalaʼdxiʼ ni gunabaʼ xhamigu laa. Ca dxi que nabániruʼ Mefibóset. Dede nahuiinibe bizaacabe ti desgracia ne pur laani maʼ qué ñanda nizabe galán biaʼ dxi bibánibe. Ñee maʼ bidiiluʼ cuenta xiñee biʼniʼ sentirbe qué rinácabe guidxaagacabe laabe la?...

David gucalaʼdxiʼ ñaca nachaʼhuiʼ né xiiñiʼ Jonatán, ngue runi biyubi modo para chuʼ Mefibóset gaxha de laa ndaaniʼ guidxi Jerusalén ne gulee ti lugar para laabe lu mexaʼ stiʼ. Ne bisaanabe lu naʼ ti hombre ni láʼ Zibá, laa ne ca xiiñiʼ ne ca siervu stiʼ para guni tendercaʼ Mefibóset. Rihuinni dxíchica gupa David Mefibóset. Ñee nannuʼ xi guca despué la?...

Gupa David guendanagana né ca binnilidxi. Xiiñibe Absalón gucalaʼdxiʼ nibee laabe de rey  ne maʼ laa ñuu lugar stibe. David gupa xidé bixooñelú ne stale hombre yenanda laa neza zeʼ. Neca ñuulaʼdxiʼ Mefibóset ninanda laacabe, peru qué ñanda ñebe purtiʼ qué rizabe galán.

De raqué bisiguii Zibá David ne gudxi laabe qué niná Mefibóset ninanda David purtiʼ gucalaʼdxiʼ ñaca rey lugar stibe. Triste guininu ni, peru biʼniʼ cré David ni gudxi Zibá laa, ngue runi bidiibe laa guidubi layú stiʼ Mefibóset. Qué nindaa biluxe guendanagana ni gupané David xiiñiʼ ne bibiguetaʼ Jerusalén. Oraqueruʼ nga gúnnabe de ruaa Mefibóset ximódopeʼ nga guca ca cosa que ne gudíxhebe gaca stiʼ Mefibóset ne Zibá layú que. Ximodo raʼbuʼ biʼniʼ sentir Mefibóset yaʼ...

Qué niguicheruaa Mefibóset ne qué niníʼ ique cadi jneza ni gudixhe ique rey que guni. Laabe nánnabe nabé maʼ gudiʼdiʼ David lu stale guendanagana ne racalaʼdxiʼ chuʼdxí guidxi que. Ngue runi gudxi Mefibóset Zibá guiaanané guidubi layú que. Ni jma risaca para Mefibóset nga maʼ bibiguetaʼ cayuni mandar David, siervu stiʼ Jiobá, ndaaniʼ guidxi Jerusalén.

Nabé gupa Mefibóset stale guendanagana ne stale biaje biʼniʼ sentirbe bicaanácabe laabe. Peru Jiobá gunnaxhii laabe ne gupa laabe. Xi rizíʼdinu de historia riʼ yaʼ... Rizíʼdinu ti cosa: neca gúninu ni jneza, zándaca ziuu tu guiníʼ ni cadi dxandíʼ de laanu. Jesús guníʼ: «Pa gaca nanalaʼdxi binni laatu la? laguietenalaʼdxi nirudóʼ uca nanalaʼdxi cabe naa». Guca nanaláʼdxicabe Jesús dede biiticabe laa. Cadi guiaandaʼ laanu pa guzúʼbanu diidxaʼ la? zannaxhii Jiobá, Dios ni dxandíʼ laanu ne laaca zannaxhii Xiiñibe Jesús laanu.

RA GUIUUNDAʼ BIBLIA

1 Samuel 20:15-17, 41, 42

2 Samuel 4:4; 9:1-10; 19:24-30

Juan 15:18

[Cani cá ñee yaza]