Biiyaʼ guiraʼ ni nuu lu sitiu riʼ

guyé lu índice

Xiñee rúninu Guendaroxhi stiʼ Señor

Xiñee rúninu Guendaroxhi stiʼ Señor

«Cásica cayuni nu rarí yanna gueela la? zacaca nga racaladxe guni tu para guietenalaʼdxi tu naa» (1 CORINTIOS 11:24)

1, 2. Xi biʼniʼ Jesús gueelaʼ 14 stiʼ nisán iza 33. (Biiyaʼ dibuju ni zeeda ra ruzulú tema riʼ.)

NDAANIʼ guidxi Jerusalén cayuni beeu llena 14 stiʼ nisán iza 33. Jesús ne ca apóstol stiʼ cayúnicaʼ Pascua. Ca judíu rúnicaʼ saa riʼ ti biaje lu ti iza para guietenaláʼdxicaʼ gulee Dios laacaʼ de esclavu Egipto raca 1,500 iza ante. Biluxe si saa riʼ, bizulú Jesús sti saa cubi né ca 11 apóstol stiʼ. Ca xpínnibe naquiiñeʼ gúnicaʼ ni ti biaje lu ti iza para guietenaláʼdxicaʼ guendaguti stiʼ Jesús (Mateo 26:1, 2).

2 Bizulú Jesús saa cubi riʼ né ti oración. Óraque bitiidibe pan ni qué gapa levadura que lu náʼ ca apóstol stibe ne gúdxibe laacaʼ: «Laicaa ne lagó». Despué gucuaabe ti copa vinu, bibiguetaʼ biʼniʼ orarbe ne gúdxibe laacaʼ: «Laguéʼ ni, irá xixé tu» (Mateo 26:26, 27). Nuu xi riníʼ pan ne vinu riʼ. Gueelaʼ que bisiidiʼ Jesús ca apóstol stiʼ xi riníʼ cani ne bisiidibe laacaʼ stale cosa risaca.

3. Xi guendarinabadiidxaʼ zacábinu lu tema riʼ.

3 Ni gucalaʼdxiʼ Jesús nga guietenalaʼdxiʼ ca xpinni guendaguti stiʼ guiráʼ iza. Ra gudiʼdiʼ tiempu biree lá saa riʼ «endaró xhi» stiʼ Señor (1 Corintios 11:20). Ca dxi riʼ laaca runibiáʼ binni ni casi dxi rietenaláʼdxinu guendaguti stiʼ Cristu. Tema riʼ zacabi  ca guendarinabadiidxaʼ riʼ: Xiñee naquiiñeʼ guietenaláʼdxinu guendaguti stiʼ Jesús. Xi riníʼ pan ne vinu. Ximodo zanda chuʼnu listu para gúninu saa riʼ. Tuu nga cani naquiiñeʼ gó pan ne gueʼ vinu dxi rietenaláʼdxinu guendaguti stiʼ Cristu. Ximodo rusihuinni ca xpinni Cristu rudiicaʼ xquíxepeʼ Dios pur guendanabani ni chigudiibe laacaʼ.

XIÑEE RIETENALÁʼDXINU GUENDAGUTI STIʼ JESÚS

4. Xi zabeendunu pur guti Jesús pur laanu.

4 Cumu bichee Adán la? guiranu rucheʼnu ne rátinu (Romanos 5:12). Para guilanu de pecadu ne guendaguti, naquiiñeʼ chuʼ tu quixe pur laanu nezalú Dios. Cumu guiranu ralenenu donda la? guirutiʼ zanda quixe pur laanu (Salmo 49:6-9). Peru Jesús qué gapa pecadu. Bidiibe xquendanabánibe pur laanu ne zacá gunda gudíxebe Dios pur pecadu stinu. Pur ni biʼniʼ Jesús zanda guilanu de lu náʼ guendaruchee ne guendaguti, ne zacá gápanu guendanabani ni qué zaluxe (Romanos 6:23; 1 Corintios 15:21, 22).

5. 1) Ximodo bisihuinni Jiobá ne Jesús nadxiicaʼ laanu. 2) Xiñee naquiiñeʼ chuunu dxi rietenaláʼdxinu guendaguti stiʼ Jesús.

5 Jiobá ne Jesús bisihuínnicaʼ guizáʼ nadxiicaʼ binni guidxilayú. Jiobá bidii ni caquiiñenu para guilanu (Juan 3:16). Ne Jesús guná bidii xquendanabani. Ni dxandíʼ nga maca nadxiibe binni ante gueedabe lu Guidxilayú (Proverbios 8:30, 31). ¡Guizáʼ rudiʼnu xquíxepeʼ pur ni biʼniʼ Jiobá ne Jesús pur laanu! Nga runi riuunu ra rietenaláʼdxinu guendaguti stiʼ Jesús guiráʼ iza. Zacá rúninu ni na mandatu riʼ: «Zacaca nga racaladxe guni tu para guietenalaʼdxi tu naa» (1 Corintios 11:23-25).

XI RINÍʼ PAN NE VINU

6. Casi modo bisiene Jesús, xii nga pan ne vinu riquiiñenu dxi rietenaláʼdxinu guendaguti stibe.

6 Últimu gueelaʼ gudoxhi Jesús né ca apóstol stiʼ bisiénebe laacaʼ xi riníʼ pan ne vinu. Ora guníʼ Jesús: «Ndi nga cuerpu stinneʼ» ne ora guniʼbe: «Ndi nga rini stinne ni chi ixii pur stale binni», nuu tu runi cré guca ti milagru, beeda gaca cuerpu stibe pan ne rini stibe beeda gaca vinu (Marcos 14:22-24). Peru cadi zacá diʼ ni, purtiʼ nuuné Jesús laacabe gueelaʼ que. Racá ridúʼyanu bisiene Jesús pan que riniʼni cuerpu stibe ne vinu que riniʼni rini stibe.

7. Xi riníʼ pan ni qué gapa levadura ni riquiiñeʼ dxi rietenaláʼdxinu guendaguti stiʼ Jesús.

7 Gueelaʼ que biquiiñeʼ Jesús pan ni qué gapa levadura ni riquiiñecabe lu Pascua (Éxodo 12:8). Ora rieeteʼ levadura lu Biblia nuu biaje riníʼ ni pecadu (Mateo 16:6, 11, 12; Lucas 12:1). Nga runi pan ni qué gapa levadura ni biquiiñeʼ Jesús que riniʼni cuerpu stibe ni qué gapa donda (Hebreos 7:26). Nga runi riquiiñenu pan ni qué gapa levadura dxi rietenaláʼdxinu guendaguti stiʼ Jesús.

8. Xi riníʼ vinu ni riquiiñenu dxi rietenaláʼdxinu guendaguti stiʼ Cristu.

8 Vinu ni biquiiñeʼ Jesús que riniʼni rini stiʼ. Ngaca nga ni riníʼ vinu ni riquiiñenu ora rietenaláʼdxinu guendaguti stiʼ Cristu. Guti Jesús pur laanu fuera de Jerusalén. Raqué bidiibe xquendanabánibe para «ixá stonda stale binni» (Mateo 26:28; 27:33). Ximodo zanda gusihuínninu rudiʼnu xquíxepeʼ pur ni bíʼnibe yaʼ. Ra chuʼnu listu ante guietenaláʼdxinu guendaguti stiʼ Cristu. Guidúʼyanu ximodo zanda gúninu ni.

XIMODO ZANDA CHUʼNU LISTU

9. 1) Xiñee naquiiñeʼ guidúʼndanu ni biʼniʼ Jesús ante gatiʼ. 2) Xi runi sentirluʼ pur guti Jesús pur laanu.

9 Ti modo para chuʼnu listu ora guietenaláʼdxinu guendaguti stiʼ Cristu nga guidúʼndanu lu Biblia ra cá cani bíʼnibe ante gátibe. Ximodo zanda gúninu ni yaʼ. Ti modo nga iquiiñenu programa ni zeeda lu folletu Guidúʼndanu Stiidxaʼ Dios guiráʼ dxi. Nabé risaca guidúʼndanu ca relatu ni zeeda lu Biblia.  Xiñee yaʼ. Purtiʼ zacá zaníʼ íquenu xi ribeendunu ra beeda gatiʼ Jesús pur cada tobi de laanu. Ndiʼ nga ti modo jma jneza chuʼnu listu para guietenaláʼdxinu guendaguti stiʼ Cristu. Ti hermana guníʼ: «Né stale gana ribézadu ganda dxi rietenaláʼdxinu guendaguti stiʼ Cristu. Cada iza tiidiʼ jma risácani para laadu». Laabe nánnabe guiráʼ ca textu ra rieeteʼ guti Jesús pur laanu ne laaca nánnabe gusiénebe cani. Peru dede dxiruʼ guti bixhózebe nga biénebe pabiáʼ risaca guendaguti stiʼ Jesús para laanu. Ne ngue guizáʼ gudixhedxí ni ladxidoʼbe.

Ti modo zanda chuʼnu listu dxi rietenaláʼdxinu guendaguti stiʼ Cristu nga guidúʼndanu ca textu ni zeeda lu Biblia ra cá ni bizaaca ca dxi ca (Biiyaʼ párrafo 9)

10. Xiruʼ zanda gúninu para chuʼnu listu ora guietenaláʼdxinu guendaguti stiʼ Cristu.

10 Sti modo zanda chuʼnu listu nga gucheechenu diidxaʼ jma. Zanda gácanu precursor auxiliar beeu ca. Zacá zuni invitarnu jma binni para cheʼ ra rietenaláʼdxinu guendaguti stiʼ Cristu. Ora guinínenu xcaadxi binni de Dios, de Xiiñiʼ ne ora rábinu laacaʼ zanda gápacaʼ ti guendanabani ni qué zaluxe la? ziuʼnu nayecheʼ purtiʼ maʼ bíninu ni racalaʼdxiʼ Dios (Salmo 148:12, 13).

11. Xiñee guníʼ Pablu nuu xpinni Cristu de Corinto ró pan ne reʼ vinu neca «nanna cadi cayuni ni na Dios».

11 Ora riuʼnu listu para guietenaláʼdxinu guendaguti stiʼ Cristu, laaca naquiiñeʼ guiníʼ íquenu ni gudxi apóstol Pablu ca xpinni Cristu de Corinto (biindaʼ 1 Corintios 11:27-34). Laabe guniʼbe nuu binni zó ne zeʼ vinu neca «nanna cadi cayuni ni na Dios». Bisiénebe binni ni guni zacá cusihuinni «cuchee né cuerpu ne rini sti Señor». Guxuíʼlunu nuu ti xpinni Cristu ni bibí né espíritu santu cayuni cosa malu ne neca zacá gó pan ne gueʼ vinu. Apóstol Pablu guníʼ «zusaba ná Dios» ni bibí ca pur cani cayuni. Ca dxi bibani Pablu, stale xpinni Cristu de Corinto cayúnicaʼ cosa malu. Nuu de laacaʼ dede maʼ nisiaasicaʼ ora maʼ cayaca Guendaroxhi stiʼ Señor, purtiʼ gudocaʼ ne güeʼcaʼ stale ante gácani ne ora maʼ cayácani. Cani bibí riʼ bisihuínnicaʼ maʼ qué risaca para laacaʼ Guendaroxhi stiʼ Señor. Ngue runi, maʼ qué niná Dios ñócabe pan ne ñéʼcabe vinu.

12. 1) Xi bichaaga Pablu Guendaroxhi stiʼ Señor. 2) Xi gúdxibe cani guca invitar. 3) Pa guchee ti xpinni Cristu ni ro pan ne reʼ vinu, xi naquiiñeʼ guni.

12 Pablu guníʼ zeeda gaca Guendaroxhi stiʼ Señor casi ti guendaró ra nuu stale invitadu. Ne gúdxibe cani guca invitar que: «Qué zanda di gue tu ruaa copa sti Señor ne copa sti ca binidxabaʼ, ne qué zanda di cui tu ruaa mexa sti Señor ne ruaa mexa sti  ca binidxabaʼ» (1 Corintios 10:16-21). Pa ti xpinni Cristu ni ró pan ne reʼ vinu dxi rietenaláʼdxinu guendaguti stiʼ Cristu gucheené Dios la? naquiiñeʼ gabi ni ca binnigola (biindaʼ Santiago 5:14-16). Ne pa gusihuínnibe maʼ guca arrepentirbe zanda gobe pan ne guebe vinu dxi guietenaláʼdxinu guendaguti stiʼ Cristu. Ne zacá zusihuínnibe runi respetarbe guendaguti stiʼ Jesús (Lucas 3:8).

13. Xiñee naquiiñeʼ guni orarnu ne guiníʼ íquenu paraa chiguibáninu.

13 Ante guietenaláʼdxinu guendaguti stiʼ Cristu, guiranu naquiiñeʼ guni orarnu ne guiníʼ ique chaahuinu paraa racalaʼdxiʼ Dios guibáninu despué. Racaláʼdxinu gusihuínninu runi respetarnu guendaguti stiʼ Jesús. Nga runi, pa cadi nácanu de cani bibí né espíritu la? qué zadoʼno pan ne qué zeʼnu vinu ora guietenaláʼdxinu guendaguti stiʼ Cristu. Yanna, tuu nga cani zanda gó pan ne gueʼ vinu yaʼ.

TUU NGA CANI ZANDA GÓ PAN NE GUEʼ VINU

14. Ora maʼ cayetenaláʼdxinu guendaguti stiʼ Cristu, xi runi cani nuu lu pactu cubi.

14 Biʼniné Jiobá ca israelita ti pactu. Runibiáʼcabe ni casi pactu stiʼ Ley. Peru despué guníʼ Dios zuni ti pactu cubi. Biblia na: «¡Biiyaʼ! Zeeda dxi, na Jiobá, ne dxandipeʼ zuneʼ ti pactu cubi ne ca binnilidxi Israel ne ca binnilidxi Judá; cadi casi pactu bineniáʼ ca bixhoze gólatu dxi gunaazeʼ nacaʼ para gulee laacaʼ Egipto, “pactu stinneʼ ni laacabe bichiácabe, neca naa beeda gacaʼ casi xheelacabe”, nga nga ni guníʼ Jiobá.» «Purtiʼ ndiʼ nga pactu ni zuneniáʼ ca binnilidxi Israel tiidiʼ si ca dxi que, na Jiobá. Zudiéʼ laacabe ley stinneʼ ne zaguaani ndaaniʼ ladxidóʼcabe. Ne zeeda gacaʼ Dios stícabe, ne laacabe zeeda gácacabe xquidxeʼ.» «Ne maʼ qué zusiidiʼ cada binni xcompañeru ne qué zusiidiʼ biʼchiʼ, ne guiníʼ: “¡Lagunibiáʼ Jiobá!”, purtiʼ guirácabe zunibiáʼcabe naa, dede ni nahuiiniʼ hasta ni huaniisi —zacá nga guníʼ Jiobá—. Purtiʼ zutiidelaʼdxeʼ donda stícabe, ne maʼ qué zietenalaʼdxeʼ cani» (Jeremías 31:31-34). Últimu gueelaʼ gudoxhinebe ca apóstol stibe guniʼbe sicaríʼ de vinu que: «Copa ri nga rini stinne ne ra ixii ni zaguixhe Bixhoze ti modo cubi chuʼ né binni laa tobi si» (1 Corintios 11:25). Biʼniné Dios cani bibí né espíritu pactu cubi riʼ (Gálatas 6:15, 16). Ra bidii Jesús guendanabani stiʼ nga gunda guca pactu cubi que (Lucas 22:20). Laabe nga riníʼnebe Dios pur cani bibí. Ne cani bibí ni ruzuubaʼ diidxaʼ ni nuu lu pactu cubi ca ziuunecaʼ laabe guibáʼ (Hebreos 8:6; 9:15). Nanna dxichi cani bibí nuucaʼ lu pactu cubi ca. Nga runi, ora maʼ cayetenaláʼdxinu guendaguti stiʼ Cristu, rócabe pan ne réʼcabe vinu.

15. 1) Tu guiráʼ nga nuu lu pactu stiʼ Reinu. 2) Pa guzuubacabe diidxaʼ, xi ndaayaʼ zápacabe.

15 Cani bibí nánnacaʼ laaca nuucaʼ lu pactu stiʼ Reinu (biindaʼ Lucas 12:32). Biʼniné Jesús pactu riʼ ca xpinni ni bibí né espíritu santu, cani guná gucaná casi gucanabe (Filipenses 3:10). Ca dxi riʼ, cani bibí né espíritu santu laaca nuucaʼ lu pactu riʼ. Guirácabe zápacabe ndaayaʼ de gácacabe rey guibáʼ ne qué zusaana de guni mandarnécabe Jesús (Apocalipsis 22:5). Nga runi zanda gócabe pan ne guécabe vinu dxi rietenaláʼdxinu guendaguti stiʼ Cristu.

16. Bisiene né chupa chonna si diidxaʼ ni rieeteʼ lu Romanos 8:15-17.

16 Laaca nanna dxichi cani bibí nácacaʼ xiiñiʼ Dios ne zanda gocaʼ pan ne guecaʼ vinu ora rietenaláʼdxinu guendaguti stiʼ Cristu (biindaʼ Romanos 8:15-17). Pablu na cani bibí né espíritu santu rábicaʼ Dios «¡[Abba], Bixhoze!». Diidxaʼ abba zeedani de ti diidxaʼ arameu. Riquiiñecabe diidxaʼ riʼ casi ora guiníʼcabe «apá», ne laaca riníʼcabe ni de respetu, casi ora riníʼcabe «bixhozeʼ». Modo rábicabe Jiobá, rusihuinni ni nadxiicabe laa ne Dios maʼ gucuaa laacabe casi xiiñiʼ. Espíritu santu stiʼ Dios rabi  laacabe nácacabe binni ni bibí. Nga runi cani bibí ca nanna dxíchicaʼ maʼ gucuaa Dios laacaʼ casi xiiñiʼ. Nga qué riníʼ diʼ qué racaláʼdxicabe guibánicabe lu Guidxilayú. Peru nánnacabe pa qué gucheenécabe Dios dede dxi gáticabe, zuni mandarnécabe Jesús casi rey guibáʼ. Laaca nánnacabe Jiobá nga gulí laacabe, ti Dios nayá. Ca dxi riʼ, maʼ xcaadxi si de ca 144,000 ni bibí riaana lu Guidxilayú (1 Juan 2:20; Apocalipsis 14:1). Nabé gaxha runi sentírcabe nuucabe de Jiobá, ngue runi rábicabe laabe: «¡[Abba], Bixhoze!».

RUDIʼNU XQUÍXEPEʼ PUR GUENDANABANI NI CHIGUDII DIOS LAANU

17. 1) Xi maʼ guníʼ Dios zudii ca xpinni Cristu ni maʼ bibí. 2) Ximodo nanna cani bibí maʼ gulí Dios laacaʼ.

17 Maʼ gudxi Dios cani bibí zabánicaʼ sin qué chuʼ dxi gáticaʼ guibáʼ. Pa nácaluʼ tobi de cani bibí, gatigá bizeeteʼ ndaayaʼ riʼ lu ca oración stiluʼ. Laaca zuni sentirluʼ para lii chupa chonna textu ni zeeda lu Biblia. Casi ora rieeteʼ chiguichaganáʼ Jesús xnovia, nánnaluʼ lii nga tobi de cani zeeda gaca novia ca ne maʼ racaláʼdxiluʼ gácani (Juan 3:27-29; 2 Corintios 11:2; Apocalipsis 21:2, 9-14). Ne ora rieeteʼ nadxii Dios cani bibí la? nánnaluʼ lii nga caníʼnebe. Ne ora rieeteʼ lu Biblia xipeʼ naquiiñeʼ guni cani bibí la? espíritu santu stiʼ Dios rucaani lii guzuubaluʼ diidxaʼ. Espíritu santu stiʼ Dios rabi lii racalaʼdxiʼ Dios guibániluʼ guibáʼ.

18. 1) Xi maʼ guníʼ Dios chiguicaa «xcaadxi dendxu». 2) Xi runi sentir «xcaadxi dendxu» pur ca ndaayaʼ chiguicaacaʼ.

18 Maʼ guníʼ Dios zudii guendanabani ni qué zaluxe ndaaniʼ ti paraísu lu Guidxilayú riʼ ti gran muchedumbre de «xcaadxi dendxu» (Apocalipsis 7:9; Juan 10:16). Pa nácaluʼ tobi de cani naca de «xcaadxi dendxu», riécheluʼ ora gúʼndaluʼ lu Biblia ra cayeeteʼ de Paraísu. Racaláʼdxiluʼ guibanineluʼ binnilídxiluʼ ne ca xhamíguluʼ sin qué chuʼ tu guniná laatu ndaaniʼ Guidxilayú riʼ. Racaláʼdxiluʼ gúʼyaluʼ ximodo chindee Dios guendarindaana, guendapobre, yuubaʼ, guendahuará ne guendaguti (Salmo 37:10, 11, 29; 67:6; 72:7, 16; Isaías 33:24). Racaláʼdxiluʼ guidxaagaluluʼ binnilídxiluʼ ni maʼ guti (Juan 5:28, 29). Guizáʼ rudiiluʼ xquíxepeʼ Jiobá pur ca ndaayaʼ sicarú ni chigudii lii riʼ. Laaca rudiiluʼ xquíxepeʼ pur bidii Jesús xquendanabani pur laanu. Nga runi neca qué roloʼ pan ne qué reʼluʼ vinu rieluʼ dxi rietenaláʼdxinu guendaguti stiʼ Cristu.

ÑEE ZIELUʼ DXI GUIETENALÁʼDXINU GUENDAGUTI STIʼ CRISTU LA?

19, 20. 1) Xi naquiiñeʼ gúninu pa racaláʼdxinu gápanu ti guendanabani ni qué zaluxe. 2) Xiñee qué racaláʼdxiluʼ guiaadxaluʼ dxi rietenaláʼdxinu guendaguti stiʼ Cristu.

19 Guiráʼ binni zanda gapa ti guendanabani ni qué zaluxe. Nuu tu zabani guibáʼ ne xcaadxi zabani lu Guidxilayú. Xi naquiiñeʼ gúninu pa racaláʼdxinu gápanu guendanabani ni qué zaluxe yaʼ. Naquiiñeʼ gusihuínninu nápanu fe Jiobá, Jesucristu ne laaca nápanu fe lu guendaguti stiʼ Jesús. Nga runi, ora maʼ cayetenaláʼdxinu guendaguti stiʼ Cristu guiníʼ íquenu ni cayabi Dios zudii cada tobi de laanu ne pabiáʼ risaca guendaguti stiʼ Jesús. Lu iza 2015, millón de binni de guidubi naca Guidxilayú zietenaláʼdxicaʼ guendaguti stiʼ Cristu viernes 3 stiʼ abril guiaaziʼ si Gubidxa. Zácani ndaaniʼ ca Yoo stiʼ Reinu o xcaadxi lugar.

20 Ante chuunu ra rietenaláʼdxinu guendaguti stiʼ Cristu, naquiiñeʼ guiníʼ íquenu pabiáʼ risaca ni gudixe Dios pur laanu. Zacá zusihuínninu cudiʼnu xquíxepeʼ Jesús. Ne pa gucaadiaga chaahuinu ora maʼ cayaca ni, zusihuínninu nadxiinu xcaadxi binni. Ximodo yaʼ. Ra guinínenu laacabe pabiáʼ nadxii Dios laanu ne xi naguixhe íquebe para binni guidxilayú (Mateo 22:34-40). Nga runi, nin tobi de laanu qué racaláʼdxinu guiaadxanu dxi rietenaláʼdxinu guendaguti stiʼ Cristu.