«Irá ni guni tu la? laguni ni de idubi ladxidó to, casi ñaca xhiiña [Jiobá] cayuni tu.» (COL. 3:23)

1-3. 1) Ñee purtiʼ si guti Jesús pur laanu maʼ cadi naquiiñeʼ gudiʼnu ofrenda Jiobá la? Bisiéneni. 2) Xi naquiiñeʼ gúʼyanu ora gudiʼnu ca ofrenda stinu.

 LU PRIMÉ siglu que bisiene Jiobá ca binni ni nuu ndaaniʼ xquidxi maʼ cadi naquiiñeʼ gúnicabe guiráʼ ni zeeda lu Ley gucuaa Moisés, purtiʼ bixhiá guendaguti stiʼ Jesús ni (Rom. 10:4). Ngue runi, ca maniʼ ne xcaadxi cosa rudii ca judíu casi ofrenda, maʼ cadi caquiiñeʼ gúnicabe ni purtiʼ maʼ qué risácacani. Biquiiñeʼ Ley que para gacaneni ca judíu gánnacaʼ tuu nga Cristu, zaqué nga gúpani laacabe casi tuuxa ni rusiniisi ti baʼduʼ (Gál. 3:24).

² Peru qué riníʼ diʼ nga maʼ qué zazaláʼdxinu gudiʼnu ofrenda Dios. ¡Naquiiñeruʼ gúninu cani! Guidúʼyanu xi guníʼ apóstol Pedru naquiiñeʼ gúninu: «Usigaʼde tu laabe ni riale ndaani ladxidóʼ to. Nga huaxa ziulaʼdxi be icaa be, ne zanda guni tu ni purti runi cre tu Jesucristu» (1 Ped. 2:5). Ne apóstol Pablu guníʼ zeeda gaca guidubi xquendanabáninu casi ti ofrenda para Dios, purtiʼ maʼ bidiʼnu ni laabe (Rom. 12:1).

³ Xi ofrenda nga rudii ca xpinni Cristu Jiobá yaʼ. Ora rusigáʼdecabe laabe xiixa, ne ora ruchaacabe modo nabánicabe para gúnicabe jma lu xhiiñaʼ Dios. Nga runi, galán guiduʼyaʼ chaahuinu pa ziuuláʼdxibe ca ofrenda gudiʼnu laabe ne guietenaláʼdxinu xi gunábabe ca israelita gúnicaʼ.

CA OFRENDA RUDIʼNU GUIRÁʼ DXI

4. Xi naquiiñeʼ guietenaláʼdxinu ora gúninu xhiiñanu.

⁴ Nuu biaje raca nagana para laanu guiénenu rusihuinni ca cosa ni rúninu guiráʼ dxi xi clase ofrenda cudiʼnu Jiobá. Zándaca rúninu caadxi cosa ne riníʼ íquenu qué zuxheleʼ cani laanu de Dios. Casi  ora gusianu ralídxinu, ora riuunu scuela, ora maʼ nuunu ra dxiiñaʼ, ora maʼ zisinu ne ora rúninu xcaadxi cosa. Peru pa maʼ bidiʼnu laanu Jiobá o cá íquenu gúninu ni la? risaca gúninu ca dxiiñaʼ stinu modo riuulaʼdxiʼ Jiobá. Nácanu xpinni Dios dxi ne gueelaʼ, nga runi, naquiiñeʼ gúninu ni na Stiidxaʼ Dios lu xquendanabáninu. Pablu guníʼ: «Irá ni guni tu la? laguni ni de idubi ladxidó to, casi ñaca xhiiña [Jiobá] cayuni tu, cadi xhiiña binni» (biindaʼ Colosenses 3:18-24).

5, 6. Xi cadi naquiiñeʼ guiaandaʼ laanu ora cuinu xi lari gácanu ne ora chigúninu xiixa.

⁵ Neca cadi cayuni adorarnu Dios ora maʼ cayúninu xhiiñanu guiráʼ dxi, Pablu cayabi laanu gúninu cani «de idubi ladxidó [no], casi ñaca xhiiña [Jiobá]» cayúninu. Naquiiñeʼ gucaa nga laanu guiníʼ íquenu ximodo nabáninu. Galán guinabadiidxanu laca laanu: «Ñee nabaneʼ casi modo naquiiñeʼ guibani ti xpinni Cristu ne racuáʼ lari jneza la? Ñee zatuí luaʼ guiniéʼ testigu stiʼ Jiobá naa pur cani runeʼ ne pur modo nabaneʼ la?». ¡Nabé triste nga guizaacanu zacá! Qué racaláʼdxinu gúninu xiixa ni gucaa binni guiníʼ mal de Dios (Isa. 43:10; 2 Cor. 6:3, 4, 9).

⁶ Yanna guzéʼtenu de cani rúninu ne guidúʼyanu pa cayúninu cani «de idubi ladxidó [no], casi ñaca xhiiña [Jiobá]» cayúninu. Ora maʼ zidúʼndanu cani, guietenaláʼdxinu guleza Jiobá gudii ca israelita que ni jma galán nápacaʼ (Éxo. 23:19).

MODO NAQUIIÑEʼ GUIBÁNINU

7. Xi guiráʼ naquiiñeʼ gúninu ora maʼ bidiʼnu laanu Jiobá.

⁷ Ora rudiʼnu xquendanabáninu Jiobá, jneza nga ni riguixhe íquenu gúninu. Ca diidxaʼ ca riníʼcani rúninu ni nabe primé lu xquendanabáninu (biindaʼ Hebreos 10:7). Dxandíʼ, nga nga ni jma galán gúninu. Ne maʼ bidiʼnu cuenta zabeendunu ni galán pa gúninu stipa pur guidúʼyanu xi racalaʼdxiʼ Dios gúninu ne despué gúninu cani lu xquendanabáninu (Isa. 48:17, 18). Nácanu ti guidxi nayá ne nayecheʼ purtiʼ zinándanu ejemplu stiʼ Jiobá, Dios ni rusiidiʼ laanu (Lev. 11:44; 1 Tim. 1:11, NM).

8. Ximodo biʼyaʼ Jiobá ofrenda stiʼ ca israelita, ne xiñee naquiiñeʼ guietenaláʼdxinu ni.

⁸ Ca ofrenda bidii ca israelita que biiyaʼ Jiobá nayá cani (Lev. 6:25; 7:1). Diidxaʼ hebreu ni biquiiñeʼ para guníʼcabe «nayá», riquiiñecabe ni para guiráʼ cosa ni maʼ bireechú para Dios si. Nga runi, pa racaláʼdxinu chuulaʼdxiʼ Jiobá ca ofrenda stinu la? naquiiñeʼ guixélenu de guiráʼ cosa malu nuu lu guidxilayú riʼ. Qué zanda diʼ gannaxhiinu nin ti cosa ni nanalaʼdxiʼ Bixhózenu (biindaʼ  1 Juan 2:15-17). Cadi naquiiñeʼ gúninu o gaca xhamígunu tuuxa ni gucaa laanu gúninu ti cosa malu nezalú Dios (Isa. 2:4; Apo. 18:4). Ne laaca cadi naquiiñeʼ gúʼyanu cosa dxabaʼ ni gucaa laanu guiníʼ íquenu cosa malu (Col. 3:5, 6).

9. Xiñee naquiiñeʼ gácanu nachaʼhuiʼ né binni.

⁹ Sicaríʼ gudxi Pablu ca xpinni Cristu: «Cadi usiaanda tu aca tu nachaʼhui ne binni, ne udii tu tindaa de ni napa tu cani qué gapa, purti casi ñaca nusigaʼde tu ni Dios ne nga nga ni riulaʼdxiʼ» (Heb. 13:16). Pa gúninu ni jneza ne gúninu stipa pur gacanenu sti binni, zuuyaʼ Jiobá cani casi ofrenda ni riuulaʼdxiʼ. Rusihuínninu dxandíʼ discípulo stiʼ Jesús laanu ora gannaxhiinu binni (Juan 13:34, 35; Col. 1:10).

CA OFRENDA RUDIʼNU ORA RUNI ADORARNU DIOS

10, 11. Ximodo ruuyaʼ Jiobá modo rucheechenu diidxaʼ ne modo runi adorarnu laa, ne xi naquiiñeʼ gucaa nga laanu gúninu.

¹⁰ Tobi de ca modo rácanu nachaʼhuiʼ nga ora gusíʼdinu binni ni «runi cre nu». Ñee ruyúbinu modo gucheechenu diidxaʼ cada biaje ganda gúninu ni la? Pablu guníʼ rusisácanu Dios ora rúninu zacá, «purti ra udxiʼba nu laa pur irá ni huayuni para laanu la? casi ñaca cusigaʼde nu laa xiixa galán» (Heb. 10:23; 13:15; Ose. 14:2). Galán guiníʼ íquenu pabiáʼ tiempu riquiiñenu para gucheechenu stiidxaʼ Reinu ne ximodo zanda gúninu dxiiñaʼ ca jma jneza. Ne stale biaje rudiicabe laanu conseju lu Guendaridagulisaa stiʼ Dxiiñaʼ Stinu. Peru ni naquiiñeʼ guietenaláʼdxinu nga «cusigaʼde nu [Dios] xiixa galán» ora rucheechenu diidxaʼ, ne pur nga naquiiñeʼ gúninu stipa pur gácani jma jneza. Neca gadxé gadxé modo nabáninu naquiiñeʼ gánnanu rihuinni pabiáʼ rusisácanu xhiiñaʼ Dios pur tiempu ni ribeenu para gucheechenu diidxaʼ.

¹¹ Laanu, ca xpinni Cristu ribeenu tiempu guiráʼ semana para guni adorarnu Jiobá stúbinu ne ra nuu ca binni ridagulisaa. Ne Jiobá nga gudixhe gúninu zacá. Dxandíʼ nga maʼ cadi zinándanu ley ra na guiziiláʼdxinu sábadu o chuunu Jerusalén para gúninu ca saa ni gunábabe gaca guiráʼ iza. Peru cani biʼniʼ ca binni que dxiqué, zeeda gácacani caadxi cosa ni rúninu yanna. Laaca ribeza Dios cueenu tiempu para guidúʼndanu Stiidxabe, guni orarnu ne guidagulisaanu  né ca xpinni Cristu. Ne laaca ribézabe guni adorar xaíque stiʼ ti familia Dios né binnilidxi (1 Tes. 5:17; Heb. 10:24, 25). Guiranu naquiiñeʼ guinabadiidxanu laca laanu: «Ñee zanda guyubeʼ modo guneʼ adorar Dios jma jneza la?».

12. 1) Xi zanda gudiʼnu Jiobá ni zeeda gaca casi guʼxhuʼ ni bizaaquicabe lu altar. 2) Ximodo naquiiñeʼ guni orarnu ti gaca ca oración stinu casi guʼxhuʼ ni riuulaʼdxiʼ Dios guicaa.

¹² Sicaríʼ biindaʼ rey David para Jiobá: «Gaca oración stinneʼ casi guʼxhuʼ nezaluluʼ» (Sal. 141:2). Galán cueenu tiempu para guiníʼ íquenu: «Pabiáʼ tiempu ribeeʼ para guneʼ orar Dios, panda biaje runeʼ ni ne xi rinabaʼ laabe». Libru stiʼ Apocalipsis na zeeda gaca oración stiʼ ca xpinni Cristu ni bibí casi «ti xhoʼ naxhi ni [r]iulaʼdxi be icaa be» (Apo. 5:8). Guietenaláʼdxinu dxiqué gunabaʼ Jiobá ca israelita que guzaaquicaʼ guʼxhuʼ lu altar, peru laca laabe nga gúdxibe laacaʼ ximodo gúnicaʼ ni. Pa qué gúnicabe ni modo gudíxhebe gácani la? qué ziuuláʼdxibe ni (Éxo. 30:34-37; Lev. 10:1, 2). Xi rusiidiʼ nga laanu yaʼ. Pa racaláʼdxinu chuulaʼdxiʼ Dios ca oración stinu la? naquiiñeʼ gúninu cani modo nabe.

RUDIʼNU NE RICAANU

13, 14. 1) Ximodo gucané Epafrodito ne ca binni de Filipos Pablu, ne ximodo biiyabe ni bidiicabe laabe. 2) Ximodo zanda chinándanu ejemplu stiʼ Epafrodito ne ca binni de Filipos.

¹³ Pa stale o pa huaxiéʼ bueltu rudiʼnu para gaca xhiiñaʼ Jiobá lu guidubi Guidxilayú, guiráʼ ni rudiʼnu zeeda gácacani ofrenda para laabe (Mar. 12:41-44). Guidúʼyanu xi biʼniʼ ca binni ridagulisaa de Filipos ni guyuu lu primé siglu. Biseendacabe Epafrodito Roma para gacané Pablu ne laaca biseendacabe bueltu para laabe. Cadi ngue diʼ nga primé biaje gúcacabe nachaʼhuiʼ né laabe. Biseendacabe ni ra nuu Pablu para cadi chuʼ xizaa pur ni iquiiñeʼ, ti ganda gápabe jma tiempu para gucheechebe diidxaʼ. Ximodo biiyabe ni bisigáʼdecabe laabe que yaʼ. Biiyabe ni casi «ti ofrenda cusigaʼde[cabe] Dios ne casi ti xhoʼ naxhi ni ziulaʼdxi be icaa be» (biindaʼ Filipenses 4:15-19). Bidii Pablu xquíxepeʼ laacabe pur gúcacabe nachaʼhuiʼ né laa ne laaca guyuulaʼdxiʼ Jiobá ni bíʼnicabe.

¹⁴ Ca dxi riʼ, laaca rusisaca Jiobá bueltu ni rudiʼnu para gaca xhiiñabe lu guidubi naca Guidxilayú. Pa gúninu xhiiñaʼ Reinu primé lu xquendanabáninu la? zudii Jiobá guiráʼ ni caquiiñenu para guibáninu ne zacanebe laanu ti gaca fe stinu naguidxi (Mat. 6:33; Luc. 6:38).

MODO RUSIHUÍNNINU RUDIʼNU XQUÍXEPEʼ DIOS

15. Xii nga cani rucaa lii gudiiluʼ xquíxepeʼ Jiobá.

¹⁵ Zaquiiñenu stale tiempu para guzéʼtenu guiráʼ razón nápanu para gudiʼnu xquíxepeʼ Jiobá. Ñee cadi naquiiñeʼ gudiʼnu xquíxepeʼ laabe guiráʼ dxi pur guendanabani cudiibe laanu la? Rudiibe guiráʼ ni caquiiñenu: ni guidoʼno, ni gácunu, ra gásinu ne bi ricaanu. Laaca riquiiñebe Biblia para gusiidibe laanu guiráʼ ni naquiiñeʼ gánnanu ti gápanu fe ne cuézanu gúnibe guiráʼ ni maʼ guniʼbe. Ora guiníʼ íquenu tuu nga Jiobá ne xi guiráʼ huayúnibe pur laanu, rucaa nga laanu guni adorarnu laabe ne gudiʼnu ofrenda ni gusisaca laabe (biindaʼ Apocalipsis 4:11).

16. Ximodo rusihuínninu rudiʼnu xquíxepeʼ pur guendaguti stiʼ Cristu.

¹⁶ Casi bidúʼyanu lu tema ni gudídinu ca, guendaguti stiʼ Cristu nga ti cosa sicarú bisigaʼdeʼ Dios binni. ¡Nabé rusihuinni Jiobá nadxii laanu ora biʼniʼ ni! (1 Juan 4:10.) Ximodo gusihuínninu rudiʼnu xquíxepeʼ laabe yaʼ. Pablu bicabi: «Tobi si guti pur iráʼ [...]. Nga runi, intiica  guni du, runi du ni purti nadxii du Cristu. Cristu guti pur irá nu ti biaʼ dxi ibani nu ma cadi ibani nu para laanu sínuque para laabe. Laabe nga guti be ne bibani be para laanu» (2 Cor. 5:14, 15). Né ca diidxaʼ ca cayabi Pablu laanu zusisácanu guendanachaʼhuiʼ stiʼ Dios pa iquiiñenu xquendanabáninu para gusisácanu laabe ne Xiiñibe. Ximodo zanda gudiʼnu xquíxepeʼ Dios ne Cristu yaʼ. Ra guzúʼbanu stiidxacabe, gucheechenu diidxaʼ né stale gana ne gacanenu binni gaca discípulo (1 Tim. 2:3, 4; 1 Juan 5:3).

17, 18. Xi huayuni stale xpinni Cristu para gudiicaʼ Jiobá ofrenda ni gusisaca laabe. Bizeeteʼ ti ejemplu.

¹⁷ Ñee zanda gudiʼnu ofrenda jma galán Dios para gusisácanu laa la? Stale xpinni Cristu riníʼ ique xi guiráʼ maʼ biʼniʼ Jiobá pur laacaʼ ne riguixhe íquecaʼ guchaacaʼ modo nabánicaʼ. Zacá jma randa rucheechecabe stiidxaʼ Reinu ne rúnicabe xcaadxi dxiiñaʼ ndaaniʼ xquidxi Dios. Caadxi de laacabe raca precursor auxiliar ti beeu o chupa chonna beeu lu ti iza. Xcaadxi raca precursor regular. Ne xcaadxi racané ra cuí yoo ra gaca adorar Jiobá. Cadi dxandíʼ zacá nga rusihuínnicabe risaca para laacabe ni biʼniʼ Dios la? Pa gúninu cani maʼ bizéʼtenu ca purtiʼ racaláʼdxinu gudiʼnu xquíxepeʼ laabe de guidubi ladxidoʼno la? ziuuláʼdxibe cani.

¹⁸ Stale xpinni Cristu rúnicaʼ stipa pur gúnicaʼ ni na Jiobá purtiʼ runi sentircaʼ nuzaabicaʼ laabe xiixa. Guzéʼtenu ejemplu stiʼ ti gunaa xpinni Cristu ni láʼ Morena. Laabe biniisibe ndaaniʼ Religión Católica, peru qué ñanda nusiénecabe laabe tuu nga Dios ne xi pur nabani binni, ngue runi guyebe ndaaniʼ xcaadxi religión ni beeda de Asia peru laaca qué ñanda ñacanécabe laabe. Dxiruʼ maʼ biindané ca testigu stiʼ Jiobá laabe Stiidxaʼ Dios nga gunda biénebe cani. Nabé bisisácabe cani biziidibe lu Biblia ne bisiecheʼ cani laabe. Ngue runi gudixhe íquebe gúnibe xhiiñaʼ Dios ne guiráʼ stipa stibe para gudiibe xquíxepeʼ laa. Cadi xadxí de guyuunísabe gúcabe precursora auxiliar, ne despué gúcabe precursora regular. Maʼ zinebe treinta iza de cayúnibe jma lu xhiiñaʼ Dios ne yanna rúnibe dxiiñaʼ Betel.

19. Ximodo zanda gutálenu ca ofrenda ni rudiʼnu Jiobá.

¹⁹ Stale xpinni Cristu qué randa rácacaʼ precursor. Peru biaʼ tiica ganda gúninu lu xhiiñaʼ Jiobá, guiranu zanda gudiʼnu laabe ofrenda ni chuuláʼdxibe. Ximodo zanda gúninu ni yaʼ. Pur modo laanu, ora chinándanu ca conseju zeeda lu Biblia, ne cadi guiaandaʼ laanu nácanu xpinni Jiobá guiráʼ ora. Pur fe stinu, ora rusihuínninu dxandíʼ zaca guiráʼ ni maʼ gudixhe Dios guni. Pur ca cosa galán gúninu, jmaruʼ si ora gucheechenu stiidxaʼ Reinu. Jesús bizeeteʼ, de ndaaniʼ ladxidóʼ binni nga riree ni riníʼ. Ne cumu nayecheʼ nuu ladxidoʼno pur guiráʼ ni maʼ bidii Jiobá laanu la? rudiʼnu xquíxepeʼ laa. Ximodo rúninu ni yaʼ. Ora qué rusaana de gudiʼnu ofrenda ni gusisaca laabe ne gúninu ni de guidubi ladxidoʼno.

[Guendarinabadiidxaʼ stiʼ párrafo]

[Ni caníʼ yaza 25]

Ñee rucaa guendanachaʼhuiʼ stiʼ Jiobá laanu gudiʼnu ofrenda ni gusisaca laa la?

[Imagen ni zeeda lu yaza 23]

Ñee ruyúbinu modo gucheechenu diidxaʼ cada biaje ganda gúninu ni la?