¿XI ZAZAACA GUIDXILAYÚ STINU?
Bosque ne selva
NACA CA BOSQUE ca casi pulmón stiʼ Guidxilayú, ne zacá ni purtiʼ caquiiñeʼ ni para guibáninu. Rutopa ca yaga ca ti gas ni zándaca guniná laanu, laani nga dióxido de carbono, ne ribeecani oxígeno, ni peʼ caquíʼñenu para guicaanu bi. Ne biaʼ 80% de ca yaga ne ca maniʼ ni nuu lu Guidxilayú, nabánicaʼ ndaaniʼ ca bosque ne ca selva. Sin laacani qué zanda guibáninu.
Canitilú ca bosque ne ca selva
Guiráʼ iza rusábacabe millón de yaga para chuʼ jma terrenu gacaʼ dxiiñaʼ layú. Lu ca últimu 75 iza ni maʼ gudiʼdiʼ ca, guizáʼ stale yaga maʼ bisábacabe ne pur nga biaʼ galaa selva ni nuu lu guidubi Guidxilayú maʼ binitilú.
Cada biaje gunitilúcabe ti bosque la? runítinu guiráʼ ca cosa galán ni rudiini laanu.
Guyáʼ Guidxilayú riʼ para chuʼ guendanabani luni
Guendaridxagayaa modo nagueenda ribiguetaʼ rigaa yaga lu ca bosque ni maʼ binitilúcabe. Lu ca últimu iza riʼ, guizáʼ ridxagayaa ca binni ni rapa ca bosque ca ora ruuyacaʼ pabiáʼ nagueenda ribiguetaʼ rigaa yaga lu ca layú ni runitilúcabe ne rácacani bosque sti biaje. Guidúʼyanu chupa ejemplu:
-
Caadxi binni ni runi investigar de laani biiyacaʼ xi bizaaca caadxi bosque ra bisaba binni ca yaga nuu ndaaniʼ ca ni ne biquiiñecaʼ ca layú riʼ para gúnicaʼ dxiiñaʼ lúcani ne despué maʼ bisaanacaʼ de niquiiñecaʼ ca ni. Ti estudiu ni bíʼnicabe lu chupa mil chupa gayuaa layú stiʼ América ne África Occidental, bihuinni zándaca raríʼ sti chii iza maʼ galán ziuu ca layú ca ne zaca ca ni bosque sti biaje.
Ti estudiu ni bínicabe ni biree lu revista Science, riete cayuuyaʼ ca investigador ca zándaca lu ti gayuaa iza zabigueta ziuu ca layú ca galán sti biaje, ne ziuu guiráʼ clase yaga ne maniʼ lúcani, sin guni binni gastiʼ.
-
Cadi xadxí peʼ, ndaaniʼ guidxi Brasil, biʼniʼ caadxi científicu ti estudiu layú stiʼ ca selva ra maʼ bisaaba binni yaga, biiyacabe jma nagueenda rigaa yaga lu ca layú ca stúbicaʼ, que ca lugar ra ruzuhuaa binni yaga.
Revista National Geographic bizeeteʼ de estudiu ni bíʼnicabe riʼ, bizeeteʼ ni guizáʼ bidxagayaa ca hombre riʼ ora bíʼyacaʼ nin gaayuʼ iza caʼruʼ tidiʼ maʼ gúndani yaga lu guidubi ca layú que sti biaje, sin nuzuhuaa binni yaga lúcani.
Cuyúbicabe xi zanda gaca
Lu guidubi Guidxilayú cuyúbicabe ximodo zanda gápacabe ca selva ne ca bosque ni nuu yanna ne guni chaahuicabe ca ni maʼ biʼniʼ feu binni. Lu ti informe ni bidii Naciones Unidas biete pur guiráʼ stipa ni cayaca riʼ, lu ca últimu 25 iza ni maʼ gudiʼdiʼ riʼ jma de 50% de ca ni rusaba ca yaga ca maʼ bisaana de gúnicaʼ ni.
Peru huaxiéʼ racané ni cayúnicabe riʼ. Lu ti informe ni gulee organización Global Forest Watch ná lu ca últimu iza riʼ cadi cusaana binni de gunitilú ca bosque trópical.
Ca yaga ni rusaaba binni sin permisu para gutoo la? guizáʼ runi ganárcabe bueltu luni. Peru cunitilú ni ca selva ni nuu lu Guidxilayú.
Nuu caadxi binni ni rapa ca bosque naroʼbaʼ ca ne ruuyacabe guiroobaʼ yaga lu xcaadxi layú para ganda chuʼ jma bosque.
Nuu caadxi razón para gápanu esperanza. ¿Xi rusiidiʼ Biblia?
«Jehová Dios a bisindani lu layú guiráʼ clase yaga ni ziuulaʼdxiʼ binni guʼyaʼ ne galán ca ni para gó binni» (Génesis 2:9).
Ora rugá binni yaga stiʼ ca bosque ne ca selva ca para iquiiñeʼ la? ribiguetaʼ rigaacani sti biaje, purtiʼ zacá nga bizáʼ Dios guiráʼ ca ni. Ne racaláʼdxibe gápabe ca ni ne ca cosa sicarú ni nuu lu ca ni.
Biblia rusiidiʼ qué zudii Dios lugar gunitilú binni guiráʼ ca cosa sicarú ni nuu lu Guidxilayú. Biiyaʼ tema ni láʼ «Cayuni prometer Dios laanu zaca chaahuiʼ Guidxilayú stinu», ni zeeda lu yaza 15 stiʼ revista riʼ.
a Jehová nga láʼ Dios (Salmo 83:18).
