“Mjitichisye soni mmanyilile kuti unejo ndili Mlungu. Mitundu josope ja ŵandu jichingwesya; Chilambo chapasi chichingwesya.”—Salimo 46:10, New World Translation.

 “Mjile jii, ni m’manyilile kuti ndili Mlungu. Mitundu ja ŵandu jikunjimbichisya, ŵa mchilambo chapasi akulumba.”—Salimo 46:10, Buku Jeswela.

 Mlungu akumlimbikasya jwalijose kuti amtumichileje jwalakwe soni kuti amanyilile kuti jwalakwejo ali jwakuŵajilwa kulamulila chilambo chosope chapasi. Myoyo mundu jwakusaka kuti chatame ni umi kwangamala, akusosekwa kwitichisya kuti Mlungu akwete machili soni udindo wakwalamulila ŵandu.—Chiwunukuko 4:11.

 “Mjitichisye soni mmanyilile kuti unejo ndili Mlungu.” Mabaibulo gane gagopolele mbali jandanda ja lilembali kuti “mjile jii.” Yeleyi yitendekasisye ŵandu kuganisya mwakulemwecheka kuti lyeleli lili lilamusi lyakuti atendeje woga kapena akaŵechetaga chilichose pali mu chalichi. Nambope maloŵe ga Chihebeli gaŵagagopolele kuti “mjitichisye soni mmanyilile kuti unejo ndili Mlungu,” gali maloŵe gele Yehofa a Mlungu akwaŵenda ŵandu ŵa mitundu josope kuti aleche kumsisya jwalakwejo soni kuti ajitichisye kuti Mlungu ali jwakuŵajilwa kumtumichila.

 Maloŵe gakuŵenda gakulandana ni gelega, gakusimanikwasoni pa Salimo 2. Palilembali, Mlungu jwasasile kuti chachajonanga ŵandu ŵakumsisya jwalakwejo. Nambope ŵandu ŵakusamanyilila kuti Mlungu ali jwakuŵajilwa kulamulila, akusamdalila jwalakwejo kuti ŵalongoleleje, ŵapeje machili, soni lunda. Ŵandu ŵeleŵa ‘akusatilila kwa AMBUJE’ pakusimana ni yakusawusya mwamti akusaŵa ŵakusangalala soni akusakola chiteteyo.—Salimo 2:9-12.

 “Mitundu josope ja ŵandu jichingwesya; Chilambo chapasi chichingwesya.” Munyumamu, ŵandu ŵamkwesisye Yehofa Mlungu pandaŵi jaŵakamulichisye masengo machili gakwe gekulungwa pakwakulupusya ŵandu ŵakwe. (Ekisodo 15:1-3) Kusogoloku, ŵandu chachimkwesya mnope Yehofa pandaŵi jele jwalijose pachilambo chapasi chachiwujitichisya ulamusi wakwe soni kumtumichila jwalakwe.—Salimo 86:9, 10; Yesaya 2:11.

 Buku jine jasasile kuti Salimo 46 “jili nyimbo jakumyamichila Mlungu ligongo lya machili gakwe gekulungwa gakusagakamulichisya masengo pakwachenjela ŵandu ŵakwe.” Ŵandu ŵa Mlungu paŵajimbaga nyimboji, ŵalosyaga kuti akusamdalila Yehofa kuti mpaka ŵachenjele soni kwakamuchisya. (Salimo 46:1, 2) Maloŵega gakumbusyagasoni kuti Yehofa jwaŵaga ni jemanjajo ndaŵi syosope.—Salimo 46:7, 11.

 Jwamasalimo jwalimbikasisye ŵanduŵa kuti aganichisyeje yindu yakusimonjesya yatesile Yehofa. Kuganichisya yeleyi kukakamuchisye jemanjaji kukulupilila kuti Yehofa akwete machili gakwachenjela. (Salimo 46:8) Salimoji jikusasalasoni kuti Mlungu ni jwampaka amasye ngondo. (Salimo 46:9) Mpaka tusale kuti kalakala Yehofa jwamasisye ngondo paŵachenjelaga ŵandu ŵakwe myala mwa adani ŵawo. Nambope, Baibulo jikusatusalila kuti pachangakaŵapa Mlungu chachimasya ngondo syosope syasikutendekwa pachilambopa.—Yesaya 2:4.

 Ana Yehofa akwakamuchisyape ŵakutumichila ŵakwe masiku agano? Elo akwakamuchisya. Niligongo lyakwe ndumetume Paulo jwalimbikasisye Aklistu kuti amdalileje Mlungu kuti ŵakamuchisye pandaŵi jakusaka chikamuchisyo. (Ahebeli 13:6) Yayili mu Salimo 46 yikutulimbikasya kuti tukakayichilaga yakuti Mlungu akwete machili gakutuchenjela. Salimoji jikusatulimbikasyasoni kuti tumwoneje Mlungu kuŵa “kwakutilila kwetu ni machili getu.”—Salimo 46:1.

 Alolele kafidiyo kejipika kuti amanyilile yayili mu buku ja Masalimo.