Masalimo 86:1-17
Lipopelo lya Daudi.
86 Atejele liwiwi lyawo,* wawo Yehofa, soni anjanje,Pakuŵa une ndili jwakulagasika soni jwakulaga.
2 Awuchenjele umi wangu ligongo ndili jwakulupichika.
Amkulupusye jwakutumichila jwawo jwakwadalila wawojo,Pakuŵa wawojo ali Mlungu jwangu.
3 Alosye une umbone mtima, wawo Yehofa,Pakuŵa lisiku lililyose ngusinaŵenda wawojo.
4 Atendekasye kuti jwakutumichila jwawo asangalale,*Pakuŵa une ngalawuchile kwa wawojo, wawo Yehofa.
5 Pakuŵa wawojo Yehofa ali ŵambone soni ŵakoseka kukululuka.Wawojo akusalosya chinonyelo chakulupichika kwa wosope ŵakusaŵilanga pa wawojo.
6 Apikane lipopelo lyangu, wawo Yehofa.Soni atejele liwiwi lyawo pangwaŵenda mwakuchondelela kuti angamuchisye.
7 Chinjaŵilanga wawojo palisiku lyachinjisimana ni yakusawusya,Pakuŵa chachinjanga.
8 Pangali Mlungu jwinesoni jwakulandana ni wawojo, wawo Yehofa.Pangali jwalijose jwatesile masengo mpela gatesile wawojo.
9 Mitundu josope ja ŵandu jaŵajipanganyisye wawojoJichiyika ni kutindiŵala pameso pawo, wawo Yehofa,Soni jemanjaji chachilichimbichisya lina lyawo.
10 Pakuŵa wawojo ali ŵakulungwa soni akusatenda yindu yakusimonjesya.Wawojo jika ni ŵali Mlungu.
11 Anjiganye matala gawo, wawo Yehofa.
Une chinjijenda mwakamulana ni maloŵe gawo gagali gasyesyene.
Ambe mtima wangagaŵikangana kuti nalijogopeje* lina lyawo.
12 Wawo Yehofa Mlungu, une ngusinachimbichisya ni mtima wangu wosope,Soni chinjilichimbichisya lina lyawo mpaka kalakala.
13 Chinjitenda yeleyi ligongo chinonyelo chawo chakulupichika chakusalosya une chili chekulungwa,Soni akulupwisye umi wangu ku Malembe* gakusokoka.
14 Wawo Mlungu, achalume ŵakulikwesya anjimuchile.Gulu ja ŵandu ŵangasa jikuwusakulasakula umi wangu,Soni ngakusamala yakuti wawojo apali.*
15 Nambo wawojo Yehofa, ali Mlungu jwambone mtima soni jwakwatendela ŵane chanasa,Jwangatumbila chitema, jwagumbala ni chinonyelo chakulupichika soni jwakudalilichika.*
16 Agalawuchile kwa une ni kulosya umbone mtima wawo.
Ampe machili gawo jwakutumichila jwawo,Soni amkulupusye mwanache jwa kapolo jwawo jwamkongwe.
17 Alosye une chimanyisyo cha* umbone wawo,Kuti wosope ŵakuŵengana ni une achiwone chimanyisyocho ni kutenda sooni.
Pakuŵa wawojo Yehofa, ni ŵali ŵakungamuchisya soni ŵakumyalasya.
Maloŵe Gamwiŵanda
^ Kapena kuti, “Ajiname kuti ambikane.”
^ Kapena kuti, “kuti umi wa jwakutumichila jwawo usangalale.”
^ Kapena kuti, “Awutendekasye mtima wangu wosope kuti ulijogopeje.”
^ Alole Kugopolela kwa Maloŵe Gane.
^ Kapena kuti, “Soni nganiŵaŵika wawojo pasogolo pawo.”
^ Kapena kuti, “soni jwakusatenda yaŵechete.”
^ Kapena kuti, “umboni wa.”
