ANA akumanyilila kuti kalikandika kali nduni? Jweleju ali Yesu. Agambile kupagwa kwene mu licinga. Licinga lili malo gakusunjila yinyama. Maliya akumgoneka Yesu mwakulila yinyama, mpela mbunda ni yinyama yine. Nambo sambano ligongo cici Maliya ni Yosefe ali amuno ni yinyama? Aga nganigaŵa malo gambone gakupagwila mwanace, ngati m’yoyo?

Elo, nganigaŵa gambone. Akusimanikwa mwelemu pa ligongo lyakuti:. Jwakulamulila jwa Loma, Kayisala Augusito, ŵatamilikasisye lilamusi lyakuti jwalijose ajawule kumsinda kuŵapagwile kuti akalembesye lina lyakwe m’buku. Yosefe ŵapagwile akuno ku Betelehemu. Nambo jwalakwe ni Maliya paŵagambile kopocela, nganijisimanikwa nyumba jakuti agone. M’yoyo ŵasosekwe kwika amuno ni yinyama yawo. Soni lisiku lilili Maliya ŵaŵelece Yesu! Nambo mpela mwakuyiwonela pelepa, Yesujo ali cenene.

Ana akwawona ŵakucinga ŵakwika kukumlola Yesuwo? Jemanjaji ŵaliji kwitinji cilo ali mkusamalila ngondolo syawo, nambo lyawonecele lilanguka lyakuŵala mnope mwakwasungulila. Lyaliji lilayika! Ŵakucingaŵa ŵakwete woga mnope. Nambo lilayikalyo lyaŵecete kuti: ‘Akatenda woga! Ngwete ngani jambone kwa jemanja. Lelo, ku Betelehemu, kupagwile Ambuje Klistu. Jwalakwe cacikulupusya ŵandu! Cakamsimane ali am’ŵijilile yakuwala, soni ali amgonece mwakulila yinyama.’ Kaneko mwakusisimucisya malayika gejinji gakwika nikutanda kumlumba Mlungu. Sambano ndaŵi jijojo ŵakucingaŵa akuwutuka kukumlola Yesu. Ni sambano apano amsimene.

Ana akumanyilila ligongo lyakwe Yesu ali jwapajika? Ana akumanyilila kuti jwalakwe kusyesyene ali nduni? Akumbucile kuti mungani jandanda m’buku ajino ŵatusalile ya Mwanace jwandanda jwa Mlungu. Mwanaceju ŵakamulaga masengo yimpepe ni Yehofa gakupanganya kwinani ni cilambo capasi, soni yine yosope. Mwanace jula ni Yesuju!

Yehofa ŵasamisye umi wa Mwanagwe kwinani nikuwuŵika m’citumbo ca Maliya. Ndaŵi jijojo kamwanace katandite kukula m’matumbo mwa Maliya mpela mwakusakulila ŵanace ŵane wosope m’matumbo mwa mama ŵawo. Nambo kamwanaceka kaliji Mwanace jwa Mlungu. Kumbesi kwakwe Yesu ŵapagwile amuno mu licinga ku Betelehemu. Ana sambano akupikanicisya ligongo lyakwe malayika galiji gakusangalala mnope kwasalila ŵandu kuti Yesu apagwile?