ALOLE ciwulili cacilambo capasi cacili apanoci! Yindu yosope yikuwoneka yakusalala! Alole mopowo, maluŵago, soni yinyamayo. Ana ndembo ni masimba akuyiwona?

Ana mgunda wakusalalawu watyocele kwapi? Kwende tulole yaŵatesile Mlungu kuti tukomboleceje kutama pacilambo capasici.

Candanda, Mlungu ŵapanganyisye mopo kuti uŵe pacilambo cosope. Nambosoni ŵapanganyisye twakumela twamwanamwana ni matinji, soni yitela. Yakumelayi yikusakamucisya kuti cilamboci ciwoneceje cakusalala. Nambo yikusakamucisyasoni m’matala gane. Yakumela yejinji yikusatupa yakulya yakunong’a mnope.

Kaneko Mlungu ŵapanganyisye somba kuti sisujeje m’mesi, soni yijuni kuti yiguluceje mwinani. Ŵapanganyisyesoni mbwa, yome, mbunda, yinyama yekulungwakulungwa ni yamwanamwana. Ana kumangwawoko kwana yinyama yatuli? Ana ngatukusangalala kuti Mlungu ŵapanganyisye yinduyi ligongo lya m’weji?

Kumbesi kwakwe, Mlungu ŵapanganyisye mbali jine jacilambo capasi kuŵa malo gambone mnope. Ŵajikolasile mbaliji kuŵa mgunda wa Edeni. Jaliji jambone mnope. Yosope yayaliji mwelemo yaliji yambone. Mlungu ŵasakaga kuti cilambo cosopeci ciŵe mpela mgunda wakusalalawu.

Alolesoni mgundawu paciwulilipa. Ana akumanyilila yaŵayiweni Mlungu kuti mwangalimo? Kwende tulole.