1, 2. Kotea te fetogi neʼe fai ki Te Tule Leʼo ʼo te mahina ʼo Sanualio 1895, pea neʼe feafeaʼi te ʼu tehina ʼi te fetogi ʼaia?

 NEʼE fiafia ʼaupito ia te tehina ko John A. Bohnet ʼi te temi ʼae neʼe ina maʼu ai tana nusipepa Te Tule Leʼo ʼo te mahina ʼo Sanualio 1895. Neʼe ina tokagaʼi ia te meʼa foʼou ʼi tona takafi, neʼe ko te pakī ʼo te tule ʼe ina fakamalamagia te lagi ʼe afasia pea mo te tai ʼe tokakovi. Neʼe fakaha ʼi te nusipepa ia te fetogi ʼaia ʼi te kupu tafitō ʼae “Tatatou Takafi Foʼou.”

² ʼI tana fiafia ʼaia, neʼe faitohi ia te tehina ko Bohnet ki te tehina ko Russell. Neʼe ina tohi fenei: “ ʼE au fiafia ʼi taku sio ʼae ki te matalelei ʼo TE TULE LEʼO.” Ko te tahi tehina agatonu ko John H. Brown, neʼe ina tohi fenei ʼo ʼuhiga mo te pakī ʼaia: “Neʼe au fiafia ʼaupito ʼi taku sio ʼae ki te pakī, ia te tuʼu malohi ʼo te tule leʼo, logo la te ʼu peau pea mo te afā.” Ko te takafi foʼou ʼaia neʼe ko te ʼuluaki fetogi ʼae neʼe sio ki ai te ʼu tehina ʼi te taʼu ʼaia, pea neʼe mole gata ai. ʼI te mahina ʼo Novepeli, neʼe fakaha age kia natou te tahi fetogi maʼuhiga ka fai.

3, 4. Kotea te fihifihia neʼe talanoa ki ai ʼi Te Tule Leʼo ʼo te ʼaho 15 ʼo Novepeli 1895, pea kotea te fetogi maʼuhiga neʼe fakaha ai?

³ Ko te alatike loaloaga neʼe ta ʼi Te Tule Leʼo ʼo te ʼaho 15 ʼo Novepeli 1895, neʼe talanoa ai ki te fihifihia. ʼI te kokelekasio ʼo te Kau Ako ʼo Te Tohi-Tapu, neʼe hoko ai ni maveuveu he neʼe tautau fihi te ʼu tehina ʼi tanatou fia iloʼi pe ko ai ʼae ʼe tonu ke ina takitaki ia te kokelekasio. Moʼo tokoni ki te ʼu tehina ke mole natou maʼu ia te manatu fakataupiepie ʼaia ʼae ʼe fakatupu maveuveu, neʼe fakatatau ʼi te alatike ʼaia ia te kokelekasio ki he vaka. Pea neʼe fakaha lelei ai ko te ʼu tehina takitaki neʼe mole natou teuteuʼi te kokelekasio ki te temi ʼae ka hoko ai he ʼu faigataʼaia. Kotea ʼae neʼe tonu ke fai?

⁴ Neʼe ui ʼi te alatike, ko te kapiteni ʼo te vaka ʼe tonu ke ina vakaʼi pe ʼe maʼu ai ia meʼa fuli ki te haofaki pea mo iloʼi e te kauvaka ia te meʼa ʼe tonu ke natou fai moka hoko he afā. ʼO toe feia, ko te ʼu tehina takitaki ʼo te kautahi neʼe ʼaoga ke natou vakaʼi pe ʼe feala ki te ʼu kokelekasio fuli hanatou fakatokatoka ni aluʼaga faigataʼa ka hoko. Koia, ʼo ʼuhiga mo te faʼahi ʼaia, neʼe fakaha ʼi te alatike ia he fetogi lahi. Neʼe ui fenei ai: “ ʼO kamata  atu ʼi te temi nei, ʼi te ʼu kokelekasio fuli, ʼe tonu ke filifili he ʼu tagata ʼafeā ke natou ‘leoleo’ te faga ovi.”—Gaue 20:28.

5. (1) He ko ʼe ko te ʼuluaki fakatuʼutuʼu ʼo ʼuhiga mo te kau tagata ʼafeā neʼe hoko ʼi tona temi totonu? (2) Kotea te ʼu fehuʼi ʼae ka tou vakaʼi anai?

⁵ Neʼe hoko te ʼuluaki fakatuʼutuʼu ʼaia ʼi tona temi totonu he neʼe tokoni ai ke tuʼu malohi te ʼu kokelekasio. Neʼe tokoni ai ki te ʼu tehina ke natou fakalaka ʼi te ʼu faigataʼaia ʼae neʼe hoko ʼi te ʼUluaki Tau Fakamalamanei. ʼI te ʼu taʼu ki muli age, ko te tahi age ʼu fetogi ʼi te kautahi neʼe tokoni ai ki te hahaʼi ʼa te ʼAtua ke lelei age tanatou tauhi ʼae kia Sehova. Ko te lea fakapolofeta fea ʼae neʼe ina fakakikite ia te ʼu fetogi ʼaia? Kotea te ʼu fetogi ʼae neʼe ke sio ki ai? Neʼe fua lelei feafeaʼi kia koe?

6, 7. (1) Kotea te fakaʼuhiga ʼo te vaega Tohi-Tapu ʼo Esaia 60:17? (2) Kotea ʼae ʼe ha ʼaki te talanoa ʼae ki te ʼu “tagata taupau” pea mo te ʼu “hahaʼi tufa gaue”?

⁶ Ohage ko tatatou vakaʼi ʼi te Kapite 9, neʼe fakakikite e Esaia ʼe tapuakiʼi anai e Sehova tana hahaʼi ʼaki tana fakaliliu natou ʼo kaugā malie. (Esa. 60:22) Kaʼe neʼe fakapapau e Sehova te tahi age ʼu tapuakina. Neʼe ina fakakikite fenei: “ ʼE mole au ʼaumai anai te kapa, kaʼe ko te ʼaulo, ʼe mole au ʼaumai anai te ukamea kaʼe ko te siliva, ʼe mole au ʼaumai anai te ʼakau kaʼe ko te kapa, ʼe mole au ʼaumai anai te maka, kaʼe ko te ukamea; pea ʼe au fakatuʼu anai te tokalelei ohage ko ʼau tagata taupau, pea ko te faitotonu ohage ko tau hahaʼi tufa gaue.” (Esa. 60:17, MN) Kotea te fakaʼuhiga ʼo te lea fakapolofeta ʼaia? ʼE hoko feafeaʼi kia tatou ia ʼaho nei?

⁷ ʼE talanoa ia te lea fakapolofeta ʼaia ki te fetogi ʼo he meʼa ʼe lelei ʼaki he meʼa ʼe toe lelei age. Ohage ko te fetogi ʼo te kapa ʼaki te ʼaulo, ʼe liliu ko he meʼa ʼe lelei age. ʼE toe feia mo te ʼu fetogi ʼae ʼe fakaha ʼi te vaega. Koia, ʼaki he palalau fakata, neʼe fakakikite e Sehova ʼe fetogi mamalie pe anai te aluʼaga ʼo tana hahaʼi, ʼo lelei age. Ko te ʼu fetogi ʼi te faʼahi fea ʼae ʼe talanoa ki ai te lea fakapolofeta ʼaia? ʼI te vaega ʼaia, ʼe talanoa ki te ʼu “tagata taupau” pea mo te ʼu “hahaʼi tufa gaue.” Koia neʼe fakaha ai e Sehova ʼe hoko ia te ʼu fetogi ʼi te faʼahiga tokaga ʼae ki tana hahaʼi pea mo te fakatuʼutuʼu ʼo tana kautahi.

8. (1) Ko ai ʼae neʼe ina fakahoko ia te ʼu fetogi ʼae ʼe talanoa ki ai ia te lea fakapolofeta ʼa Esaia? (2) Kotea te ʼu lelei ʼe tou maʼu mai te ʼu fetogi ʼaia? (Vakaʼi mo te fakamatala ʼae ʼi te ʼa takai “ Neʼe Ina Tali ʼAki He Agavaivai Tona Fakatonutonuʼi.”)

⁸ Ko ai ʼae ʼe ina fakahoko ia te ʼu fetogi ʼaia? ʼE ui ʼi te vaega, ʼe ko Sehova ʼae ʼe ina ʼaumai anai te ʼaulo, mo te siliva pea mo ina fakatuʼu anai te tokalelei. Koia, ko te ʼu fetogi ʼaia ʼi te fakatuʼutuʼu ʼo te ʼu kokelekasio neʼe mole fakahoko ia e te tagata, kaʼe neʼe ko Sehova totonu. Pea talu mai te fakanofo Hau ʼo Sesu, neʼe fakaʼaogaʼi e Sehova ia tona Alo moʼo fakahoko ia te ʼu fetogi ʼaia. Kotea te ʼu lelei ʼe tou maʼu mai te ʼu fetogi ʼaia? ʼE ui ʼi te vaega pe ʼaia, ʼaki te ʼu fetogi ʼaia, ʼe maʼu anai ia “te tokalelei” mo “te faitotonu.” Ka tou tali ke takitaki tatou e te ʼAtua pea mo fai ni fetogi, ʼe tou maʼu ai te tokalelei. Pea ko  totatou ʼofa ki te faitotonu, ʼe ina uga tatou ke tou tauhi kia Sehova, ʼae ʼe ui e Paulo ʼe ko “te Atua o te tokalelei.”—Filp. 4:9.

9. Ke fakatuʼutuʼu lelei pea mo logo tahi te ʼu kokelekasio, kotea ʼae ʼe tonu ke fakatafito ki ai, pea kotea tona tupuʼaga?

⁹ ʼO ʼuhiga mo Sehova, neʼe tohi fenei e Paulo: “Ko te Atua e mole ko he Atua o te maveuveu, kae ko te Atua o te tokalelei.” (1 Ko. 14:33) ʼE feala ke tou tokagaʼi neʼe mole ui e Paulo ko te fakafeagai ʼo te maveuveu ʼe ko te fakatuʼutuʼu lelei, kaʼe ko te tokalelei. Kotea tona tupuʼaga? Koteʼuhi ko he ʼu meʼa kua fakatuʼutuʼu lelei ʼe mole fakaʼuhiga leva ʼe maʼu tuʼumaʼu pe anai te tokalelei. Ohage la, ko he kau solia, ʼi te temi tau, ʼe fakatuʼutuʼu lelei tanatou haʼele ki te tau kaʼe mole ki te tokalelei. Koia, ko tatou kau Kilisitiano, ʼe tou manatuʼi ia te faʼahi maʼuhiga ʼaeni: Ko he faʼahi kua fakatuʼutuʼu lelei, ʼe mole fualoa anai mo kapau ʼe mole fakatafito ki te tokalelei. Kaʼe ʼaki te tokalelei ʼae ʼe foaki mai e te ʼAtua, ʼe fakatuʼutuʼu lelei ai ia meʼa fuli pea mo fualoa anai. Koia, ʼe tou fiafia he ʼe takitaki tatatou kautahi e “te Atua o te tokalelei”! (Loma 15:33) ʼE feala ke fakatuʼutuʼu lelei pea mo logo tahi te ʼu kokelekasio ʼi te malamanei ʼuhi ko te tokalelei ʼae ʼe foaki mai e te ʼAtua.—Pes. 29:11.

10. (1) Kotea te ʼu fetogi neʼe fai ʼi tatatou kautahi ʼi te kamataʼaga? (Vakaʼi te fakamatala ʼae ʼi te ʼa takai “ Te ʼu Fetogi ʼi Te Faʼahiga Fakanofo ʼo Te Kau Tagata ʼAfeā.”) (2) Kotea te ʼu fehuʼi ʼae ka tou vakaʼi anai?

¹⁰ ʼI te fakamatala ʼae ʼi te ʼa takai “ Te ʼu Fetogi ʼi Te Faʼahiga Fakanofo ʼo Te Kau Tagata ʼAfeā,” ʼe fakaha ai te ʼu fetogi neʼe fai e tatatou kautahi ʼi te kamata mai. Kotea te tahi ʼu fetogi neʼe fai e Sehova ʼaki totatou Hau, ʼo ina fetogi te kapa ʼaki te ʼaulo? Ko te ʼu fetogi ʼo ʼuhiga mo te faʼahiga taupau ʼo te ʼu kokelekasio. Neʼe tokoni feafeaʼi te ʼu fetogi ʼaia ki te maʼu ʼo te tokalelei pea mo te logo tahi? Pea neʼe tokoni feafeaʼi atu ke ke tauhi ki “te Atua o te tokalelei”?

11. (1) Kotea ʼae neʼe mahino ki ai te ʼu tehina ʼi tanatou ako ia te Tohi-Tapu? (2) Kotea ʼae neʼe fakatotonu e te ʼu tehina ʼo te kolesi pule ke natou fai?

¹¹ ʼO kamata mai te taʼu 1964 ki te taʼu 1971, neʼe takitaki e te kolesi pule ia te ako loloto ʼo te Tohi-Tapu, moʼo vakaʼi pe neʼe fakatuʼutuʼu feafeaʼi ia te ʼu ʼuluaki kokelekasio Fakakilisitiano. a Neʼe fakaha e te ako ʼaia neʼe ko te ʼu tagata ʼafeā ʼae neʼe natou taupau ia te ʼu kokelekasio, kaʼe neʼe mole ko he tagata ʼafeā pe ʼe tahi. (Lau ia Filipe 1:1; 1 Timoteo 4:14.) ʼI tanatou kua mahino lelei age ki te faʼahi ʼaia, neʼe iloʼi ai e te kolesi pule neʼe takitaki natou e tonatou Hau, ia Sesu, ke natou fai he fetogi ʼo ʼuhiga mo te fakatuʼutuʼu ʼo te hahaʼi ʼa te ʼAtua. Neʼe fakatotonu e te ʼu tehina ʼo te kolesi pule ke natou mulimuli ki te takitaki ʼa te Hau. Neʼe natou fakahoko atu aipe te ʼu fetogi ke natou faʼifaʼitakiʼi te ʼu ʼuluaki Kilisitiano, ʼo ʼuhiga mo te fakanofo ʼo te ʼu tagata ʼafeā. Kotea ʼihi fetogi neʼe fai ʼi te kamata ʼo te ʼu taʼu 1970?

12. (1) Kotea te ʼu fetogi neʼe fai ʼi te kolesi pule? (2) Fakamatala peʼe fakatuʼutuʼu feafeaʼi ia ʼaho nei ia te Kolesi Pule. (Vakaʼi te fakamatala ʼae ʼi te ʼa takai “  ʼE Tokaga Feafeaʼi Te Kolesi Pule Ki Te ʼu Gaue ʼo Te Puleʼaga?” ʼi te pasina 130.)

¹² Neʼe kamata pe te ʼu fetogi ʼi te kolesi pule. ʼO kaku ki te temi ʼaia, neʼe faʼufaʼu e te ʼu tehina ʼe toko 7 ia te kolesi pule pea  mo te Komite Takitaki ʼo te Sosiete. Kaʼe ʼi te taʼu 1971, neʼe liliu te kolesi pule ʼo toko 11 pea neʼe mole kei pipiki ki te komite takitaki. Neʼe mole he tahi neʼe fia maʼoluga ʼi te ʼu tehina ʼaia pea neʼe natou fefakahoahoaʼaki ʼi te taʼu fuli ʼi te tuʼulaga pelesita.

13. (1) ʼO kamata mai te taʼu 1932 ki te taʼu 1972, neʼe taupau feafeaʼi ia te ʼu kokelekasio? (2) Kotea ʼae neʼe fai e te Kolesi Pule ʼi te taʼu 1972?

¹³ Neʼe hoa mai ki ai te ʼu fetogi ʼi te ʼu kokelekasio. Kotea te ʼu fetogi ʼaia? ʼO kamata mai te taʼu 1932 ki te taʼu 1972, neʼe ko te tehina pe ʼe tahi ʼae neʼe taupau ki te kokelekasio. ʼO kaku ki te taʼu 1936, ko te tehina ʼaia neʼe higoa ko te tehina takitaki gaue. Hili ʼaia, neʼe fetogi ʼo fakahigoa ko te tehina takitaki ʼo te kokelekasio pea ki muli age leva neʼe fakahigoa ko te taupau ʼo te kokelekasio. Ko te tehina ʼaia neʼe tokaga lelei ki te aluʼaga fakalaumalie ʼo te faga ovi. ʼI te agamahani, ko te tehina taupau ʼaia ʼo te kokelekasio neʼe ina fai tokotahi te ʼu tonu ʼo mole kau ki ai ʼihi tehina ʼo te kokelekasio. Kaʼe, ʼi te lolotoga ʼo te taʼu 1972, neʼe fakatuʼutuʼu e te Kolesi Pule ke fai he toe fetogi lahi. Kotea te fetogi ʼaia?

14. (1) Kotea te fetogi neʼe fai ʼi te ʼaho 1 ʼo Oketopeli 1972? (2) ʼE maʼuliʼi feafeaʼi e te kootinatea ʼo te kolesi ʼo te kau tagata ʼafeā ia te tokoni ʼae ʼe tuʼu ia Filipe 2:3?

¹⁴ Neʼe mole kei fakanofo he tehina pe ʼe tahi moʼo taupau ia te kokelekasio. Kaʼe ko ʼihi age tehina ʼae neʼe natou mulimuli ki te ʼu fakamaʼua ʼi te Tohi-Tapu, neʼe feala ke fakanofo ke natou tagata ʼafeā. Neʼe natou faʼufaʼu fuli ia te kolesi ʼo te kau tagata ʼafeā pea ʼe natou taupau ia te kokelekasio. Neʼe fai  ia te fetogi ʼaia ʼi te ʼaho 1 ʼo Oketopeli 1972. Ia ʼaho nei, ko te kootinatea ʼo te kolesi ʼo te kau tagata ʼafeā ʼe mole maʼuhiga age ia ʼi te tahi ʼu tagata ʼafeā, kaʼe ʼe ko ia “ae e veliveli.” (Luka 9:48) ʼE liliu te ʼu tehina agavaivai ʼaia ko he tapuakina ki te fale tau tehina ʼi te malamanei.—Filp. 2:3.

15. (1) Kotea te ʼu lelei neʼe maʼu ʼaki te fakatuʼutuʼu ke ʼi ai he kolesi ʼo te kau tagata ʼafeā ʼi te ʼu kokelekasio? (2) Kotea ʼae ʼe ha ai ʼe maʼu e totatou Hau ia te poto?

¹⁵ Ko te vaevae ʼaia ʼo te ʼu gaue ʼo te kokelekasio e te kolesi ʼo te kau tagata ʼafeā neʼe ko he meʼa lelei. Tou vakaʼi te ʼu lelei ʼaeni ʼe tolu: ʼUluaki, neʼe tokoni tafitō ia te fetogi ʼaia ke manatuʼi e te kau tagata ʼafeā, tatau aipe pe kotea tanatou gaue, kaʼe ʼe ko Sesu te Pule ʼo te kokelekasio. (Efe. 5:23) Lua, ʼe hage pe ko tona ui fenei ia Taaga Lea 11:14, MN: “ ʼE iku lelei mo kapau ʼe lahi te kau faitokoni.” Ka felogoʼi te kau tagata ʼafeā ʼo ʼuhiga mo te aluʼaga fakalaumalie ʼo te kokelekasio pea mo natou fetalaʼaki ʼanatou manatu, pea ʼe feala ai ke natou fai he ʼu tonu ʼe mulimuli ki te ʼu pelesepeto ʼo te Tohi-Tapu. (Taag. 27:17) ʼE tapuakiʼi e Sehova ia te ʼu tonu ʼaia, pea ʼe fua lelei ai. Tolu, ʼi te maʼu ʼo ʼihi age tehina ke natou tagata ʼafeā, ʼe feala ki te kautahi ke tali ki te ʼaoga lahi ʼo he ʼu tehina ke natou taupau pea mo tauhi te ʼu kokelekasio. (Esa. 60:3-5) Fakakaukauʼi muʼa, ʼi te taʼu 1971 neʼe ko kokelekasio ʼe 27 000 pea neʼe tuputupu ʼo 113 000 tupu ʼi te taʼu 2013. Koia, ʼaki tona poto, neʼe foaki e te  Hau ki ʼana tisipulo he ʼu tagata tauhi ovi ʼi tona temi totonu.—Mik. 5:4.

16. (1) Kotea te maʼua ʼa te kau tagata ʼafeā? (2) Kotea te manatu ʼae neʼe maʼu e te Kau Ako ʼo Te Tohi-Tapu ʼo ʼuhiga mo te fakatotonu ʼa Sesu ke ‘fafaga te ʼu ovi’?

¹⁶ ʼI te temi ʼo te Kau Ako ʼo Te Tohi-Tapu, neʼe kua mahino ki te kau tagata ʼafeā tonatou maʼua ʼae ke natou tokoni ki ʼonatou tehina ke natou haga tauhi ki te ʼAtua. (Lau ia Kalate 6:10.) ʼI te taʼu 1908, ʼi te alatike ʼi Te Tule Leʼo neʼe vakaʼi ai ia te fakatotonu ʼaeni neʼe fai e Sesu: “Fafaga aku ovi.” (Soa. 21:15-17) Neʼe ui fenei ʼi te alatike ki te kau tagata ʼafeā: “ ʼE tonu ke maʼuhiga ʼaupito kia tatou tatatou fakamuʼamuʼa ia te fakatotonu ʼo te Pule ʼo ʼuhiga mo te faga ovi, pea ke tou fakaʼuhiga ʼe ko he pilivilesio lahi tatatou fafaga pea mo tokakaga ki te ʼu tisipulo ʼa te ʼAliki.” ʼI te taʼu 1925, neʼe toe fakaha lelei ʼi Te Tule Leʼo ia te maʼuhiga ʼo te tauhi ʼo te ʼu ovi. Neʼe fakamanatuʼi ai ki te kau tagata ʼafeā, ko te kokelekasio ʼe ʼa te ʼAtua pea ʼe ina fakamaʼua ke natou fakahoko fuli ʼonatou pilivilesio ʼae ko te tokaga ki ʼonatou tehina.

17. Neʼe tokoni feafeaʼi ki te kau tagata ʼafeā ke lelei age tanatou tauhi te ʼu ovi?

¹⁷ Kotea ʼae neʼe fakatuʼutuʼu e te kautahi ʼa Sehova moʼo tokoni ki te kau tagata ʼafeā ke lelei age tanatou tauhi te ʼu ovi? Neʼe fakatuʼutuʼu te ʼu ako. ʼI te taʼu 1959, neʼe fai maʼa te ʼu tehina taupau ia te ʼuluaki Ako ʼo Te Minisitelio ʼo Te Puleʼaga. Neʼe fai ia te akonaki ko tona kupu tafitō “Tokaga Lelei Ki Te ʼu Ovi ʼo Te Kokelekasio.” Neʼe fakalotomalohiʼi ia te ʼu tehina taupau ʼaia ke natou “fai he polokalama ke natou ʼaʼahi te kau faifakamafola.” Neʼe foaki te ʼu tokoni ke feala ke fai e te kau tagata tauhi ovi he ʼu ʼaʼahi fakalotomalohi. ʼI te taʼu 1966, neʼe fai te ʼu fetogi ʼi te Ako ʼo Te Minisitelio ʼo Te Puleʼaga. Pea neʼe fai te akonaki ko tona kupu tafitō “Te Maʼuhiga ʼo Te Gaue  Tauhi Ovi.” Kotea te manatu ʼae neʼe vakaʼi tafitō ʼi te ako ʼaia? Neʼe ui ai ko te ʼu tehina ʼae ʼe takitaki “ ʼe tonu ke natou ʼoʼofa ki te faga ovi ʼa te ʼAtua, mo toe tokakaga lelei ki ʼonatou famili pea mo natou kau ki te faifakamafola.” Mole heʼeki faʼa fualoa, neʼe fai ʼihi age ako maʼa te kau tagata ʼafeā. Kotea te ʼu fua ʼo te ako hoholo ʼaia neʼe fai e te kautahi ʼa Sehova? Ia ʼaho nei, kua maʼu ʼi te ʼu kokelekasio te ʼu tehina ʼe toko lau ʼi afe ʼe natou manatu fakalaumalie pea mo natou fakahoko tanatou gaue ʼae ko te tauhi ʼo te ʼu ovi.

18. (1) Kotea te gaue maʼuhiga neʼe foaki ki te kau tagata ʼafeā? (2) He ko ʼe ko Sehova pea mo Sesu ʼe nā ʼoʼofa ʼi te ʼu tagata ʼafeā ʼae ʼe gaue kinakina?

¹⁸ ʼAki totatou Hau ko Sesu, neʼe fakatuʼutuʼu e Sehova ke ʼi ai he kau tagata ʼafeā, ke natou fakahoko he gaue maʼuhiga. Kotea te gaue ʼaia? Ke natou takitaki te ʼu ovi ʼa te ʼAtua ʼi te temi faigataʼa ʼaeni. (Efe. 4:11, 12; 2 Tim. 3:1) Ko Sehova pea mo Sesu ʼe nā ʼoʼofa ʼi te ʼu tagata ʼafeā ʼae ʼe gaue kinakina, koteʼuhi ʼe fakalogo te ʼu tehina ʼaia ki te fakatotonu ʼaeni ʼi te Tohi-Tapu: “Kotou fafaga te faga ovi a te Atua ae kua tuku atu ke kotou tauhi . . . i te lotolelei . . . i te faa fai o te ofa . . . ke kotou liliu ko ni faifaitakiaga ki te faga ovi.” (1 Pet. 5:2, 3) Tou vakaʼi ia faʼahi ʼe lua ʼe tuku ai e te kau tagata tauhi ovi ia he faʼifaʼitaki lelei ki te faga ovi pea mo lagolago ai ki te tokalelei mo te fiafia ʼo te kokelekasio.

19. Kotea tatatou manatu ʼo ʼuhiga mo te kau tagata ʼafeā ʼae ʼe faifakamafola mo tatou?

¹⁹ ʼUluaki, ʼe gaue te kau tagata ʼafeā mo natou ʼo te kokelekasio. Neʼe ui fenei e te tagata faitohi Evaselio ko Luka ʼo ʼuhiga mo Sesu: “Nee alu leva ia . . . ki te u kolo lalahi mo te u kolo liliki, o akonaki te folafola pea mo fakaha te logo lelei o te puleaga o te Atua. Pea nee fakatahi mo ia te toko hogofulu ma  lua.” (Luka 8:1, 2) Ohage pe ko te faifakamafola ʼa Sesu mo ʼana apositolo, ʼe toe fai feia te kau tagata ʼafeā ia ʼaho nei. ʼE natou faifakamafola fakatahi mo te ʼu tehina mo tuagaʼane. ʼE natou tokagaʼi ai te fiafia ʼo te kokelekasio. Kotea te manatu ʼa te kokelekasio ʼo ʼuhiga mo te kau tagata ʼafeā? Ko Jeannine, te tuagaʼane kua taʼu 80 tupu, ʼe ina ui fenei: “Ka au faifakamafola mo he tagata ʼafeā, ʼe au maʼu ai te faigamalie ke au faipalalau mo ia pea mo au iloʼi lelei age ia ia.” Ko Steven, te tehina ʼe taʼu 30 tupu, ʼe ina ui fenei: “Ka au faifakamafola mo he tagata ʼafeā, ʼe au tokagaʼi ʼe fia tokoni moʼoni mai pea ʼe au fiafia ai.”

20, 21. ʼE lava faʼifaʼitakiʼi feafeaʼi e te kau tagata ʼafeā ia te tagata tauhi ovi ʼo te lea fakata ʼa Sesu? Tuku mai he faʼifaʼitaki. (Vakaʼi mo te fakamatala ʼae ʼi te ʼa takai “ Te ʼu Fua Lelei ʼo Te ʼu ʼAʼahi ʼi Te Vahaʼa Fuli.”)

²⁰ Lua, ʼe akoʼi e te kautahi ʼa Sehova ia te kau tagata ʼafeā ke natou tokoni kia natou ʼae ʼe mole kei fakatahi mo te kokelekasio. (Hep. 12:12) He ko ʼe ʼe tonu ke natou fai ia te faʼahi ʼaia, pea ʼe tonu ke feafeaʼi tanatou foaki ia te tokoni ʼaia? ʼE tali ki ai ia te lea fakata ʼa Sesu ʼo ʼuhiga mo te tagata tauhi ovi pea mo te ovi ʼae neʼe puli. (Lau ia Luka 15:4-7.) ʼI te tokagaʼi e te tagata tauhi ovi ia te puli ʼo tana ovi, ʼe ina kumikumi lelei, ohage neʼe ko tana ovi pe ʼaia ʼe tahi. Ia ʼaho nei, ʼe faʼifaʼitakiʼi feafeaʼi e te kau tagata ʼafeā ia te tagata tauhi ovi ʼaia? Ohage pe ko te maʼuhiga kia mata ʼo te tagata tauhi ovi ia te ovi ʼae neʼe puli, ʼe toe maʼuhiga ki te kau tagata ʼafeā ia natou ʼae ʼe mole kei fakatahi mo te hahaʼi ʼa te ʼAtua. ʼE mole ko he fakapuli temi maʼa te kau tagata ʼafeā ia te tokoni kia natou ʼaia. Pea ohage pe ko te tagata tauhi ovi ʼae ʼe “alu ia o kumi ae kua puli, o kaku ki tana mau,” ʼe toe faiga mo te kau tagata ʼafeā ke natou maʼu pea mo tokoni kia natou ʼae kua vaivai ʼi te faʼahi fakalaumalie.

²¹ Kotea ʼae ʼe fai e te tagata tauhi ovi ʼi tana maʼu ia te ovi? ʼE ina hiki ake, mo “ina hili ia ki ona fugauma” pea ina toe ʼaumai ki te faga ovi. ʼO toe feia pe, ko te ʼu palalau agalelei ʼae ʼe fai e he tagata ʼafeā, ʼe feala ke ina fakalotomalohiʼi he tahi kua vaivai ʼi te faʼahi fakalaumalie pea mo tokoni ki ai ke toe fakatahi mo te kokelekasio. Neʼe hoko te faʼahi ʼaia kia Victor, ko te tehina ʼi Afelika. ʼE ina ui fenei: “Lolotoga te ʼu taʼu ʼe valu ʼae neʼe mole au fakatahi ai mo te kokelekasio, neʼe ʼaʼahi tuʼumaʼu pe au e te kau tagata ʼafeā.” Kotea ʼae neʼe malave tafitō kia ia? ʼE ina ui fenei: “ ʼI te tahi ʼaho, ko te tagata ʼafeā ko John, ʼae neʼe ma kau fakatahi ki te Ako ʼo Te Kau Pionie, neʼe ina ʼaʼahi au pea neʼe ina fakaha mai he ʼu pakī ʼo te ako ʼaia. ʼI taku sio ki te ʼu pakī, neʼe au toe logoʼi ia te fiafia ʼae neʼe au maʼu ʼi te temi ʼae neʼe au gaue ai kia Sehova.” Mole faʼa fualoa ki ai, neʼe toe kau ia Victor ki te kokelekasio. Ia ʼaho nei, kua toe liliu ʼo pionie. ʼE mahino ia, ʼe lahi tatatou fiafia ʼuhi ko te ʼu tagata ʼafeā lotoʼofa.—2 Ko. 1:24. b

22. ʼE tokoni feafeaʼi te faitotonu mo te tokalelei ke logo tahi te ʼu kokelekasio? (Vakaʼi mo te fakamatala ʼae ʼi te ʼa takai “ Neʼe Ma Punamaʼuli.”)

²² Ohage ko tatatou vakaʼi ʼi muʼa atu, neʼe fakakikite e Sehova ʼe tuputupu anai ia te faitotonu pea mo te tokalelei ʼi te hahaʼi ʼa te ʼAtua. (Esa. 60:17, MN) Ka maʼu te ʼu faʼahi ʼaia e lua ʼi te ʼu kokelekasio, pea ʼe natou logo tahi ai. ʼO feafeaʼi? ʼO ʼuhiga mo te faitotonu, ko “totatou Atua, ko te [Sehova] pe aia e tahi.” (Tet. 6:4) Ko ʼana lekula ʼo ʼuhiga mo te meʼa ʼae ʼe lelei mo ʼae ʼe kovi ʼe tatau, ʼi te ʼu kokelekasio fuli ʼi te malamanei. (1 Ko. 14:33) Koia, ʼe tuputupu pe anai he kokelekasio mo kapau ʼe mulimuli ki te ʼu lekula ʼa te ʼAtua. ʼO ʼuhiga leva mo te tokalelei, ʼe mole loto pe e totatou Hau ke maʼu te tokalelei ʼi te kokelekasio, kaʼe ke tou toe “ave te tokalelei.” (Mat. 5:9) ʼE tou kumi ai “te u mea ae e aoga ki te tokalelei.” Ka hoko he ʼu fihifihia, ʼe tou faiga ke tou fakatokatoka. (Loma 14:19) ʼI tatatou fai ʼaia, ʼe tou lagolago ai ki te tokalelei pea mo te logo tahi ʼo tatatou kokelekasio.—Esa. 60:18.

23. ʼE feafeaʼi te aluʼaga ʼo te ʼu kaugana ʼa Sehova ia ʼaho nei?

²³ ʼI Te Tule Leʼo ʼo te mahina ʼo Novepeli 1895, ʼae neʼe tohi ai te fakatuʼutuʼu ʼae ke ʼi ai he kau tagata ʼafeā, neʼe toe fakaha ai e te ʼu tehina takitaki ʼanatou fakaʼamuʼamu. Neʼe natou fakaʼamu pea mo faikole ke tokoni ia te fakatuʼutuʼu foʼou ʼaia ki te hahaʼi ʼa te ʼAtua ke natou “kaku fakavilivili ki te logo tahi ʼi te tui.” ʼI te temi nei, ʼe tou lotofakafetaʼi ʼi tatatou tokagaʼi ia te ʼu fetogi ʼae neʼe fai mamalie e Sehova ʼaki ia totatou Hau ʼo ʼuhiga mo te taupau ʼo te ʼu kokelekasio. Neʼe toe malohi ai tatatou logo tahi ʼi te tauhi ʼae kia Sehova. (Pes. 99:4) Koia, ia ʼaho nei, ko te hahaʼi ʼa Sehova ʼi te malamanei ʼe natou fiafia, he ʼe natou “haele i he laumalie e tahi,” mo mulimuli ʼi “he ala e tahi” pea mo tauhi ki te “Atua o te tokalelei” ʼaki “he loto e tahi.”—2 Ko. 12:18; lau ia Sofoni 3:9.