Kalate 6:1-18
6 ʼU tehina, kapau ʼe faihala he tagata ʼo hehe ai kaʼe heʼeki ina iloʼi, ko koutou ʼae ʼe kotou maʼu te ʼu fealagia fakalaumalie, kotou faiga ke kotou fakatonutonuʼi te tagata ʼaia ʼaki he agamalū. Kaʼe ke ke tokaga kia koe, naʼa toe fakahalaʼi foki mo koe.
2 Kotou haga feʼamoʼaki ʼakotou kavega, pea ʼe kotou fakahoko ai anai te lao ʼa Kilisito.*
3 Koteʼuhi kapau ʼe manatu he tahi ʼe maʼuhiga kaʼe ʼe ko he meʼa noa ia, ʼe ina kakaʼi pe ia ia totonu.
4 Kaʼe ke tahi vakavakaʼi e te tagata ʼana gaue ʼa ia totonu, pea ʼe ina maʼu ai anai he tupuʼaga ke fiafia ʼo ʼuhiga mo ia totonu pe. ʼE mole tonu ke ina fakatatau ʼana gaue mo te ʼu gaue ʼa he tahi age.
5 Koteʼuhi ʼe tahi ʼamo pe anai e te tagata tana ʼamoga.*
6 Tahi ʼae meʼa, ko ʼae neʼe akoʼi* age ki ai te folafola, ke ina vaevae te ʼu lelei fuli mo ia ʼae neʼe ina akoʼi* ia ia.
7 ʼAua naʼa kotou faihala: ʼE mole feala ke manukiʼi ia te ʼAtua. Koteʼuhi ʼe utu pe anai e te tagata te meʼa ʼae neʼe ina to.
8 Koteʼuhi ko ʼae ʼe ina to ʼo manatu ki te kakano, ʼe ina utu anai mai tona kakano ia te mate, kaʼe ko ʼae ʼe ina to ʼo manatu ki te laumalie ʼo te ʼAtua ʼe ina utu anai mai te laumalie ia te maʼuli heʼe gata.
9 Koia ʼaua naʼa tou tuku te fai ʼo te meʼa ʼae ʼe lelei, he ʼe tou utu anai ʼi tona temi totonu, mo kapau ʼe mole tou fiu.*
10 Pea ʼi te kei maʼu ʼo te temi faigamalie, tou fai te meʼa ʼae ʼe lelei ki te hahaʼi fuli, kaʼe tafito ki ʼotatou kaiga ʼae ʼi te tui.
11 Neʼe au fai e au totonu ia te tohi ʼaeni kia koutou. Kotou sisio ki te lalahi ʼo te ʼu mataʼi tohi.
12 Ko natou fuli ʼae ʼe natou loto ke leleiʼia natou e te hahaʼi, ʼe ko natou ʼaia ʼe natou fakakinauʼi koutou ke kotou silikosisio. ʼE natou fai te faʼahi ʼaia he ʼe mole natou loto ke fakatagaʼi natou ʼuhi ko Kilisito.*
13 Koteʼuhi maʼiape la mo natou ʼae ʼe silikosisio, ʼe mole natou mulimuli ki te Lao, kaʼe ʼe natou loto ke kotou silikosisio ke feala hanatou fiameʼameʼa ʼo ʼuhiga mo te meʼa ʼae neʼe fai ki ʼokotou sino.
14 Kaʼe kia au, ke ʼaua naʼa au fiameʼameʼa, gata pe ʼo ʼuhiga mo totatou ʼAliki ko Sesu Kilisito ʼae neʼe mate ʼi te pou fakamamahi.* ʼI taku manatu, ʼaki ia ia neʼe tauteaʼi te malamanei ki te mate,* kaʼe ʼi te manatu ʼa te malamanei, ʼe ko au ʼae neʼe tauteaʼi ki te mate ʼaki ia ia.
15 Koteʼuhi ʼe mole he ʼuhiga ʼo te silikosisio pea mo te heʼe silikosisio, kaʼe ʼe ko te liliu ko he fakatupu foʼou ʼae ʼe maʼuhiga.
16 Ke nofo te tokalelei mo te manavaʼofa ia natou fuli ʼae ʼe haʼele ʼo mulimuli ki te manatu ʼaia,* ʼei, ia te Iselaele ʼa te ʼAtua.
17 ʼO kamata atu nei, ke ʼaua naʼa fakakinakinaʼi au e he tahi, koteʼuhi ʼe au maʼu ʼi toku sino te ʼu fakailoga ʼa he tagata kaugana ʼa Sesu.
18 ʼU tehina, ke tapuakinaʼi te faʼahiga manatu ʼae ʼe kotou fakaha ʼaki te ʼofa makehe ʼo totatou ʼAliki ko Sesu Kilisito. Ameni.
Nota ’i te lalo pasina
^ Vakaʼi Te ʼu Kupu Mo ʼOna Fakaʼuhiga.
^ Peʼe “tahi fakahoko pe anai e te tagata tona maʼua.”
^ Peʼe “akoʼi gutu.”
^ Peʼe “akoʼi gutu.”
^ Peʼe “fakafisi.”
^ ʼI te Fakakeleka, “te pou fakamamahi ʼo Kilisito.” Vakaʼi te kupuʼi palalau “Pou fakamamahi” ʼi Te ʼu Kupu Mo ʼOna Fakaʼuhiga.
^ Vakaʼi Te ʼu Kupu Mo ʼOna Fakaʼuhiga.
^ Peʼe “neʼe mate te malamanei ʼi te pou.”
^ Peʼe “ki te palalau ʼaia ʼae ʼe ina takitaki tatatou aga.”