KAPITE 28
Fakafetaʼi Kia Sehova Mo Sesu
Kotea ʼe ke logoʼi moka foaki atu e hou kaumeʼa hau meʼa ʼofa? ʼE mahino ia, ʼe ke fiafia anai pea mo fia fakaha tou lotofakafetaʼi ki tou kaumeʼa. ʼO feia pe mo Sehova mo Sesu, neʼe nā foaki mai he meʼa ʼofa taulekaleka. ʼE ko te totogi. Koia, ʼe feafeaʼi hau lotofakafetaʼi kia naua?
1. Kotea te aluʼaga ʼae ʼe feala ke ke fai?
ʼE fakapapau mai ʼi te Tohi-Tapu “ko ʼae ʼe tui kia [Sesu]” ʼe ina maʼu anai te maʼuli heʼe gata. (Soane 3:16) ʼO feafeaʼi? ʼE tonu ke tou fakaha tatatou tui ʼi te ʼu tonu ʼae ʼe tou toʼo pea mo ʼatatou gaue. (Sakopo 2:17) Kapau ʼe ha ʼi ʼatatou gaue mo ʼatatou palalau tatatou tui, pea ʼe malohi anai ʼatatou felogoi mo Sesu pea mo tana Tamai ko Sehova.—Lau ia Soane 14:21.
2. Kotea te toʼotoʼoga makehe ʼe feala tau kau ki ai?
Neʼe fakatahi ia Sesu mo ʼana tisipulo ʼi te po fakaʼosi ʼi muʼa ʼo tana mate. Neʼe ina fakaha age he tahi aluʼaga ke natou fakaha ai tanatou lotofakafetaʼi ki tana sakilifisio. Neʼe ina ui age ke natou fakatahitahi ʼo fai he toʼotoʼoga makehe. ʼE ui ʼi te Tohi-Tapu ko “te Taumafa ʼa Te ʼAliki” peʼe ko te Fakamanatu ʼa Te Mate ʼo Kilisito. (1 Kolonito 11:20) Neʼe loto e Sesu ke manatuʼi e ʼana apositolo pea mo te kau Kilisitiano moʼoni fuli neʼe ina foaki tona maʼuli maʼa tatou. Koia ʼi te po ʼaia, neʼe fakatotonu fenei e Sesu: “Kotou haga fai te faʼahi ʼaeni moʼoku fakamanatu.” (Luka 22:19) Ka ke kau ki te ʼAho Fakamanatu, ʼe ke fakaha ai tau lotofakafetaʼi ki te ʼofa lahi ʼo Sehova mo Sesu kia koe.
TA FAKALOLOTO
Ta vakaʼi he tahi ʼu aluʼaga ke kita fakaha ai takita lotofakafetaʼi kia Sehova mo Sesu. Pea ʼe ta toe vakaʼi anai pe koʼe ʼe maʼuhiga te Fakamanatu ʼa Te Mate ʼo Kilisito.
3. Tou fakaha ʼi ʼatatou gaue
Fakakaukauʼi age muʼa neʼe meʼa ke ke malemo pea haʼu he tahi ʼo haofaki koe. ʼE mahino ia, ʼe mole ke galoʼi anai te meʼa ʼae neʼe ina fai maʼa koe. ʼE ke fai anai he meʼa moʼo fakaha tau lotofakafetaʼi ki tana haofaki koe.
Neʼe haofaki tatou e Sehova ʼi tana momoli mai tona ʼAlo. Lau ia 1 Soane 4:8-10, pea fai te ʼu fehuʼi ʼaeni:
-
He koʼe ko te sakilifisio ʼa Sesu ʼe ko he meʼa ʼofa makehe?
-
Kotea ʼe ke logoʼi moka ke fakakaukauʼi te meʼa neʼe fai e Sehova mo Sesu kia koe?
ʼE feafeaʼi hatatou lotofakafetaʼi ki te meʼa ʼae neʼe fai e Sehova mo Sesu maʼa tatou? Lau ia 2 Kolonito 5:15 mo 1 Soane 4:11; 5:3. Hili te lau ʼo te ʼu vaega takitahi, fai te fehuʼi ʼaeni:
-
ʼE tou fakaha feafeaʼi totatou lotofakafetaʼi?
4. Tou faʼifaʼitakiʼi ia Sesu
ʼE feala ke tou toe fakaha totatou lotofakafetaʼi ʼaki hatatou faʼifaʼitakiʼi ia Sesu. Lau ia 1 Petelo 2:21, pea fai te fehuʼi ʼaeni:
-
ʼE feafeaʼi hau mulimuli fakalelei ki te faʼifaʼitaki ʼa Sesu?
5. Te maʼuhiga ʼo te kau ki te ʼAho Fakamanatu
Kapau ʼe tou fia iloʼi pe kotea neʼe hoko ʼi te Taumafa ʼa Te ʼAliki, lau ia Luka 22:14, 19, 20. Pea fai te ʼu fehuʼi ʼaeni:
-
Kotea ʼae neʼe fai ʼi te Taumafa ʼa Te ʼAliki?
-
Kotea ʼe ina fakata te pane mo te vino?—Vakaʼi te vaega 19 mo 20.
Neʼe loto e Sesu ke fai e ʼana tisipulo te ʼAho Fakamanatu tuʼa tahi ʼi te taʼu, ʼi te ʼaho ʼae neʼe mate ai. Koia, ʼe fakatahitahi te kau Fakamoʼoni ʼa Sehova ʼi te taʼu fuli ʼo fakamanatu te mate ʼo Sesu. ʼE fai te fono maʼuhiga ʼaia ʼo mulimuli pe ki tona fai e Sesu. Kapau ʼe tou fia iloʼi he tahi ʼu manatu, vakaʼi te ʼATA VITEO. Pea fai te fehuʼi ʼae ʼe hoa mai.
-
Kotea ʼae ʼe fai ʼi te ʼAho Fakamanatu?
ʼE fakata e te pane te sino haohaoa ʼo Sesu. Pea ʼe fakata e te vino tona taʼataʼa
ʼE UI E ʼIHI: “Tui pe kita kia Sesu pea haofaki ai pe kita.”
-
ʼE ke fakaʼaogaʼi feafeaʼi anai ia Soane 3:16 mo Sakopo 2:17 moʼo fakaha ʼe mole gata pe ki takita tui?
MANATU TAFITO
Ka tou tui kia Sesu pea mo kau ki te ʼAho Fakamanatu, pea ʼe tou lotofakafetaʼi ki te meʼa ʼae neʼe ina fai.
Fehuʼi Fakamanatu
-
Kotea te fakaʼuhiga ʼo te tui kia Sesu?
-
ʼE ke fakaha feafeaʼi tau lotofakafetaʼi ki te meʼa ʼae neʼe fai e Sehova mo Sesu kia koe?
-
He koʼe ʼe maʼuhiga ke ke kau ki te ʼAho Fakamanatu?
TE TAHI ʼU MANATU
Neʼe mate Sesu maʼa tatou, koia kotea ʼe ina uga tatou ke tou fai?
Neʼe Ina Fakaʼaogaʼi Tona Sino Moʼo Fakakololiaʼi Ia Sehova (9:28)
Te fakaʼuhiga ʼo te tui.
“Ke Ke Tui Ki Te ʼu Fakapapau ʼa Sehova” (Ko Te Tule Leʼo ʼo Oketopeli 2016)
Neʼe fetogi e he fafine tana faʼahiga manatu ʼo ʼuhiga mo ia ʼi tana fakakaukauʼi ia te totogi. Vakaʼi Biographie: “Je me sens pure et j’aime la vie.”
“La Bible transforme des vies” (Ko Te Tule Leʼo (Fakafalani) ʼaho 1 ʼo ʼAukusito 2011)
Vakaʼi pe koʼe ko ʼihi pe ʼe natou kai te pane mo inu te vino ʼi te ʼAho Fakamanatu.