KAPITE 21
ʼE Fakamafola Feafeaʼi Te Logo Lelei?
Kua vave fakatokatoka pe ʼe Sehova ʼotatou fihifihia fuli ʼaki pe tona Puleʼaga. Pea ʼe ko he logo lelei ʼaia koia ʼe ʼaoga ai ke iloʼi e te hahaʼi fuli. Neʼe fakatotonu e Sesu ki ʼana tisipulo ke natou tala te logo ʼaia ki te hahaʼi fuli. (Mateo 28:19, 20) ʼE fakalogo koa te kau Fakamoʼoni ʼa Sehova ki te fakatotonu ʼaia? Kotea ʼe natou fai?
1. ʼE hoko feafeaʼi ia ʼaho nei te lea fakapolofeta ʼae ia Mateo 24:14?
Neʼe fakakikite e Sesu: “Ko te logo lelei ʼaeni ʼo te Puleʼaga ʼe fakamafola anai ʼi te kele katoa.” (Mateo 24:14) ʼE fiafia te kau Fakamoʼoni ʼa Sehova ʼi te kau ki te gaue maʼuhiga ʼaia. ʼE natou fakamafola te logo lelei ʼi te kele katoa, ia lea ʼe 1000 tupu. ʼE ʼaoga ni faiga ki te fakahoko ʼo te toe gaue ʼaia pea ke fakatuʼutuʼu lelei. Pea ʼe lava fakahoko anai ʼaki pe te tokoni ʼa Sehova.
2. Kotea ʼae ʼe natou fai?
ʼE faifakamafola te kau Fakamoʼoni ʼa Sehova ʼi te ʼu koga meʼa fuli ʼe natou maʼu ai te hahaʼi. Ohage pe ko te kau Kilisitiano ʼo te ʼuluaki sekulo, ʼe natou faifakamafola ʼi “te ʼu ʼapi.” (Gaue 5:42) ʼAki te faʼahiga fai ʼaia, ʼe natou palalau mo he toko lauʼi miliona hahaʼi ʼi te taʼu fuli. ʼE natou toe faifakamafola ʼi te ʼu koga meʼa ʼae ʼe hahaʼi ai he ʼe mole natou maʼu te hahaʼi kio natou. Koia, ʼe natou kumi ia faigamalie fuli ke natou palalau ai kia Sehova mo ʼana fakatuʼutuʼu.
3. Ko ai ʼe tonu ke ina tala te logo lelei?
ʼE tonu ki te kau Kilisitiano moʼoni fuli ke natou tala te logo lelei. ʼE natou toʼo fakamalotoloto te gaue ʼaia. ʼE natou fai ia meʼa fuli ke natou tala te logo he ʼe natou iloʼi ʼe tonu ke haofaki te maʼuli ʼa te tokolahi. (Lau ia 1 Timoteo 4:16.) ʼE mole totogi tanatou fai te gaue ʼaia, he ʼe ui fenei ʼi te Tohi-Tapu: “Neʼe kotou maʼu noa, kotou foaki noa.” (Mateo 10:7, 8) ʼE mole tali tuʼumaʼu e te hahaʼi te logo. Kae ʼe natou haga faifakamafola he ʼe kau te gaue ʼaia ki tanatou tauhi kia Sehova pea ʼe natou fakafiafiaʼi tona loto.
TA FAKALOLOTO
Ta vakaʼi te ʼu faiga ʼa te kau Fakamoʼoni ʼa Sehova ke natou faifakamafola ʼi te malamanei katoa pea mo te faʼahiga tokoni mai ʼa Sehova.
4. ʼE natou fai ia meʼa fuli ke natou maʼu te hahaʼi fuli
ʼE faiga malohi te kau Fakamoʼoni ʼa Sehova ke natou tala te logo lelei ki te hahaʼi fuli. Vakaʼi te ʼATA VITEO, pea fai te fehuʼi ʼae ʼe hoa mai.
-
Kotea ʼae ʼe malave kia koe ʼi tau sio ki te ʼu faiga ʼa te kau Fakamoʼoni ʼa Sehova ke natou fakamafola ki te hahaʼi fuli?
Lau ia Mateo 22:39 pea mo Loma 10:13-15, pea fai te ʼu fehuʼi ʼaeni:
-
ʼE tou fakaha feafeaʼi ʼe tou ʼofa ki ʼotatou tatau?
-
Kotea te manatu ʼa Sehova ʼo ʼuhiga mo natou ʼae ʼe natou fakamafola te logo lelei?—Vakaʼi te vaega 15.
5. ʼE natou kaugā gaue mo te ʼAtua
ʼE lahi te ʼu talamanatu ʼe natou fakamoʼoni ʼe takitaki e Sehova tanatou gaue. Ohage la, ʼi Niusila, neʼe felaveʼi te tehina ko Paul mo he fafine ʼi tana faifakamafola ʼi te ʼu api, ʼi he hili hoata. Kae ʼi te ʼuhu ʼaia, neʼe faikole te fafine ki te ʼAtua ʼo ina toʼo tona huafa ko Sehova. Neʼe ina kole ke haʼu he tahi ki ai. ʼE fenei e Paul: “Hili ki ai hola ʼe tolu, pea neʼe au tukituki ki tona matapa.”
Lau ia 1 Kolonito 3:9, pea fai te fehuʼi ʼaeni:
-
Neʼe tou vakaʼi he aluʼaga neʼe hoko ki he tehina ʼi Niusila, koia kotea la ʼae ʼe ha mai ai ʼo mulimuli ki te vaega ʼaeni?
Lau ia Gaue 1:8, pea fai te fehuʼi ʼaeni:
-
He koʼe ʼe ʼaoga mai te tokoni ʼa Sehova ki te fakahoko ʼo te gaue ʼaia?
Kua ke ilo’i koa?
ʼI te ʼu fono ʼo te vahaʼa, ʼe akoako ai matou ki te faifakamafola. Kapau neʼe kua ke kau ki he fono, kotea tau manatu ki te ako ʼaia?
6. ʼE natou fakalogo ki te fakatotonu ʼa te ʼAtua
ʼI te ʼuluaki sekulo, neʼe faiga te kau fakafeagai ke natou taʼofi te faifakamafola ʼa te ʼu tisipulo ʼa Sesu. Kae neʼe hoko atu pe e te kau ʼuluaki Kilisitiano tanatou faifakamafola, ʼo natou ‘faiga ke fakamoʼoni te lao ki te logo lelei.’ (Filipe 1:7) Pea ʼe toe fai feia pe mo te kau Fakamoʼoni ʼa Sehova ia ʼaho nei. a
Lau ia Gaue 5:27-42, pea fai te fehuʼi ʼaeni:
-
He koʼe ʼe tonu ke tou haga faifakamafola?—Vakaʼi te vaega 29, mo 38 pea mo 39.
ʼE UI E ʼIHI: “He koʼe ʼe faifakamafola te kau Fakamoʼoni ʼa Sehova ʼi te ʼu ʼapi?”
-
Kotea anai tau tali?
MANATU TAFITO
Neʼe ui e Sesu ki ʼana tisipulo ke natou tala te logo lelei ʼi te kele katoa. ʼE tokoni ia Sehova ki ʼana kaugana ki tanatou fakahoko te gaue ʼaia.
Fehuʼi Fakamanatu
-
ʼE fakamafola feafeaʼi te logo lelei ʼi te malamanei katoa?
-
ʼE tou fakaha feafeaʼi ʼe tou ʼofa ki ʼotatou tatau?
-
ʼI tau manatu la, ʼe tou fiafia koa moka tou faifakamafola? Kotea tona tupuʼaga?
TE TAHI ʼU MANATU
ʼE feafeaʼi te faifakamafola ʼa te kau Fakamoʼoni ʼa Sehova ʼi te ʼu kolo lalahi?
Palesi: Faifakamafola Makehe ʼAki Te Laupapa ʼi Te ʼu Kolo Lalahi (5:11)
Kotea ʼe fai e te kau Fakamoʼoni ʼa Sehova ke natou faifakamafola ki te kau matapule?
ʼE Natou Tokoni Ki Te Hahaʼi Tagata Mo Fafine Matapule ʼi Te Faʼahi Fakalaumalie (5:59)
ʼE fakamatala e he tuagaʼane te fiafia ʼe ina maʼu ʼi tana pionie katoa.
He ʼu malo ʼi te ʼu telepinale neʼe fakagafua ai ke fakamafola te logo lelei.
a Ko te ʼAtua ʼae ʼe ina kole mai ke tou faifakamafola. Koia, ʼe mole ʼaoga ke maʼu e te kau Fakamoʼoni ʼa Sehova he fakagafua mai te kau taki ke natou tala te logo lelei.