Ko He Kau Pelepitelō Hau Moʼo Foaki He ʼu Lelei Ki Te Mālamanei
Ko He Kau Pelepitelō Hau Moʼo Foaki He ʼu Lelei Ki Te Mālamanei
“Ko kotou, ko ‘he lanu filifiliia, ko he kau hau faisakilifisio, ko he puleaga maonioni, ko he hahai kua totogi.’ ”—1 PET. 2:9.
ʼE FEALA KOA HAKOTOU FAKAMAHINO?
․․․․․
Ko te temi fea ʼaē neʼe ʼuluaki fai ai te fakapapau ʼo ʼuhiga mo he kau pelepitelō hau?
․․․․․
ʼE fakatupu feafeaʼi e te fuakava foʼou he kau pelepitelō hau?
․․․․․
Koteā te ʼu lelei ʼaē kā foaki anai e te kau pelepitelō hau ki te mālamanei?
1. He koʼē ʼe toe fakahigoa ia “te kai a te Aliki” ko te Fakamanatu, pea he koʼē ʼe fai ia te ʼaho ʼaia?
ʼI TE pō ʼo te ʼaho 14 ʼo Nisani ʼi te taʼu 33 ʼo totatou temi, ko Sesu Kilisito pea mo tana toko 12 kau ʼapositolo neʼe natou fai fakaʼosi te Pāsikate Fakasutea. ʼI te ʼosi fakamavae ʼaē e Sesu ia Sutasi Isikaliote ʼaē ki muli age neʼe ina lavakiʼi ia ia, neʼe fakatuʼu e Sesu te meʼa foʼou, neʼe fakahigoa ki muli age ko “te kai a te Aliki.” (1 Ko. 11:20) Neʼe tuʼa lua te ʼui fēnei e Sesu: “Kotou fai te mea aeni o fakamanatu kia au.” ʼE toe fakahigoaʼi foki ko te Fakamanatu, pea ko te fakamanatu ʼo Kilisito ʼe ina fakamaʼuhigaʼi tāfito tana mate. (1 Ko. 11:24, 25) Moʼo fakalogo ki te fakatotonu ʼaia, ʼe fai ʼi te taʼu fuli e te kau Fakamoʼoni ʼa Sehova ia te Fakamanatu ʼi te mālamanei kātoa. ʼI te taʼu 2012, ko te ʼaho 14 ʼo Nisani ʼi te kaletalio ʼo te Tohi-Tapu, ʼe kamata ʼi te Felianima, ʼaho 5 ʼo ʼApelili, ʼi te ʼosi tō ʼo te laʼā.
2. Koteā ʼaē neʼe ʼui e Sesu ʼo ʼuhiga mo te pane pea mo te vino ʼaē neʼe ina fakaʼaogaʼi?
2 ʼE fakamatala fakanounou e te tisipulo ko Luka ʼi te ʼu vaega e lua, te ʼu meʼa ʼaē neʼe fai pea mo ʼui e Sesu ʼi te lakaga ʼaia. ʼE ina ʼui fēnei: “Neʼe ina toe toʼo . . . [leva] mo te pane, pea ina fai te fakafetaʼi, pea ina tofitofi, pea mo ina foaki age kiā nātou, ʼo ʼui māʼana: ‘Ko te fakatātā ʼaenī ʼo toku sino ʼaē kā foaki maʼa koutou. Kotou haga fai te meʼa ʼaenī moʼo fakamanatu kiā te au.’ Pea neʼe ina toe fai fēia aipē ki te ʼipu, ʼi tanatou ʼosi kai te ōmoe, ʼo ʼui māʼana: ‘Ko te ʼipu ʼaenī ʼe ina fakatātā te fuakava foʼou ʼo ʼuhiga mo toku taʼataʼa, ʼaē ʼe tonu ke liligi maʼa koutou.’ ” (Luka 22:19, 20, MN) Koteā ʼaē neʼe mahino kiai te kau ʼapositolo ʼi te ʼu palalau ʼaia ʼa Sesu?
3. Koteā ʼaē neʼe mahino kiai te kau ʼapositolo ʼo ʼuhiga mo te pane pea mo te vino?
3 Ko te kau ʼapositolo, ʼaē neʼe ko te kau Sutea, neʼe natou mahino lelei ki te ʼu sākilifisio manu ʼaē neʼe momoli ki te ʼAtua ʼe te kau pelepitelō, ʼi te fale lotu ʼo Selusalemi. Neʼe fai te ʼu mōlaga ʼaia ke maʼu ia te ʼofa ʼo Sehova, pea neʼe lahi te ʼu sākilifisio neʼe fai moʼo fakamolemole te ʼu agahala. (Lev. 1:4; 22:17-29) Koia ʼi te ʼui ʼaē ʼa Sesu ko tona sino pea mo tona taʼataʼa neʼe ina ‘foaki pea mo liligi maʼa nātou,’ neʼe feala ke mahino ai te kau ʼapositolo neʼe tonu ke ina foaki tona maʼuli haohaoa ko he sākilifisio. Ko te sākilifisio ʼaia neʼe maʼuhiga ʼaupitō age ʼi te ʼu sākilifisio manu.
4. Koteā te fakaʼuhiga ʼo te ʼui fēnei ʼa Sesu: “Ko te ʼipu ʼaenī ʼe ina fakatātā te fuakava foʼou ʼo ʼuhiga mo toku taʼataʼa”?
4 Pea koteā te fakaʼuhiga ʼo te ʼui ʼaē ʼa Sesu “ko te ʼipu ʼaenī ʼe ina fakatātā te fuakava foʼou ʼo ʼuhiga mo toku taʼataʼa”? Neʼe kua ʼiloʼi e te kau ʼapositolo te lea fakapolofetā ʼo ʼuhiga mo te fuakava foʼou, ʼaē ʼe tuʼu iā Selemia 31:31-33. (Lau.) Neʼe fakahā ʼi te ʼu folafola ʼa Sesu ʼe ina fakatuʼu anai he fuakava foʼou, ʼaē ʼe ina fetogi ia te fuakava ʼo te Lao ʼaē neʼe fakatuʼu e Sehova mo Iselaele ʼaki ia Moisese. Neʼe ʼi ai koa he pikipikiga ʼo te ʼu fuakava ʼaia e lua?
5. ʼAki te fuakava ʼo te Lao, ko te fealagia fea ʼaē neʼe foaki ki Iselaele?
5 ʼEī, neʼe ʼi ai te pikipikiga ʼo te fakatuʼutuʼu ʼo te ʼu fuakava ʼaia. ʼI te fakatuʼu e Sehova te fuakava ʼo te Lao, neʼe ina ʼui fēnei ki te puleʼaga: “Kapau e koutou tauhi taku fakapapau, e kotou liliu anai kia au ko he hahai mauhiga kehe age i te hahai fuli, koteuhi ko te kele katoa aaku; e kotou liliu anai kia au ko he puleaga o te u tagata faisakilifisio, ko he puleaga maonioni.” (Eke. 19:5, 6) Neʼe koteā te fakaʼuhiga ʼo te ʼu folafola ʼaia maʼa te kau Iselaele?
TE FAKAPAPAU ʼO HE KAU PELEPITELŌ HAU
6. Koteā te fakapapau ʼaē neʼe tonu ke fakahoko ʼaki te fuakava ʼo te Lao?
6 Neʼe mahino te kau Iselaele ki te kupu “fuakava,” he neʼe kua fai e Sehova te ʼu fuakava mo tanatou ʼu kui ʼaē ko Noe pea mo Apalahamo. (Sen. 6:18; 9:8-17; 15:18; 17:1-9) ʼI tana fai te fuakava mo Apalahamo, neʼe fakapapau fēnei e Sehova: “E tapuakina anai te u puleaga fuli o te kele i tou hakoga.” (Sen. 22:18) Ko te fuakava ʼo te Lao neʼe tonu ke ina fakahoko ia te fakapapau ʼaia. ʼO fakatafito kiai, neʼe feala ke liliu ia Iselaele ko he “hahai mauhiga kehe age i te hahai fuli” ʼa Sehova. Koteā tona tupuʼaga? Ke ‘liliu maʼa Sehova ko he puleʼaga, ʼo te u tagata fai sākilifisio.’
7. Koteā te fakaʼuhiga ʼo te kupusiga palalau “he puleaga o te u tagata faisakilifisio”?
7 Neʼe kua māhani te kau Iselaele mo te ʼu hau pea mo te kau pelepitelō, kae ko Melekiseteke neʼe ko te tagata pē ʼaia ʼo te temi muʼa neʼe ina maʼu te ʼu tuʼulaga ʼaia e lua, pea neʼe fakagafua e Sehova. (Sen. 14:18) ʼI te temi leva ʼaia, neʼe foaki e Sehova ki te puleʼaga te fealagia ʼaē ke filifili ʼi tona lotolotoiga “he puleaga o te u tagata faisakilifisio.” Ohagē ko tona fakahā ʼi te ʼu tohi taputapu ki muli age, ko tona fakaʼuhiga ko nātou ʼaē neʼe filifili neʼe natou maʼu te faigamālie ʼaē ke liliu ko he kau pelepitelō hau, ko he ʼu hau pea mo he kau pelepitelō.—1 Pet. 2:9.
8. Koteā te ʼu gāue ʼe fai e te kau pelepitelō ʼaē neʼe fakanofo e te ʼAtua?
8 Ko he hau ʼe mahino ia ʼe pule. Kae koteā ʼaē ʼe fai e he pelepitelō? ʼE fakamahino fēnei iā Hepeleo 5:1: “Ko te pule faisakilifisio fuli, nee filifili ia mai te lotomalie o te hahai, pea nee fakanofo ia o uhiga mo te hahai i te fai o te gaue ki te Atua, pea ke ina momoli ni molaga mo ni sakilifisio o uhiga mo te u agahala.” Koia, ko he pelepitelō neʼe fakanofo e Sehova e ina fakafofoga te hahaʼi agahala iā muʼa ʼo te ʼAtua, ʼaki he ʼu mōlaga neʼe tonu ke ina momoli, ke fakamolemole age e Sehova ʼonatou agahala. Pea ʼe toe fakafofoga e te ʼu pelepitelō ʼaia ia Sehova ʼi muʼa ʼo te hahaʼi, ʼo ina akoʼi kiā nātou te ʼu lao ʼa te ʼAtua. (Lev. 10:8-11; Mala. 2:7) ʼI te ʼu faʼahi ʼaia, ʼe faiga te kau pelepitelō ʼaē neʼe fakanofo e te ʼAtua ke tokalelei te hahaʼi mo te ʼAtua.
9. (a) Koteā te fakamaʼua ʼaē neʼe tonu ke mulimuli kiai Iselaele, ke hoko te fakapapau ʼaē ke natou foaki “he puleaga o te u tagata faisakilifisio”? (b) He koʼē neʼe fakatuʼu e Sehova he kau pelepitelō ʼi te lotolotoiga ʼo Iselaele? (c) He koʼē neʼe mole feala ki Iselaele ke natou foaki “he puleaga o te u tagata faisakilifisio” ʼi te fuakava ʼo te Lao?
9 Koia ʼaki te fuakava ʼo te Lao, neʼe foaki te fealagia ʼaē ke fakatupu e te puleʼaga ʼo Iselaele he kau pelepitelō hau ke fua lelei ki “te hahai fuli.” Kae ke natou maʼu ia te faigamālie taulekaleka ʼaia, neʼe tonu ke natou mulimuli ki te fakamaʼua ʼaenī: “Kapau e kotou fakalogo mai ki toku leo, pea kapau e kotou tauhi taku fakapapau.” Neʼe feala koa ki te kau Iselaele ke natou ‘fakalogo kātoa ki te leʼo ʼo Sehova’? Kailoa ia. (Loma 3:19, 20) Koia, neʼe fakatuʼu e Sehova he kau pelepitelō ʼi te lotolotoiga ʼo Iselaele, ke natou kehe age ʼi te ʼu hau, ke natou momoli te ʼu sākilifisio manu maʼa te ʼu agahala ʼa te kau Iselaele. (Lev. 4:1–6:7) Neʼe kau ki te ʼu agahala ʼaia te ʼu agahala ʼa te kau pelepitelō. (Hep. 5:1-3; 8:3) Neʼe tali e Sehova te ʼu sākilifisio ʼaia, kae neʼe mole natou pulihi fuli ia te ʼuhiga agahala ʼo nātou ʼaē neʼe natou foaki te ʼu sākilifisio. Ko te kau pelepitelō ʼi te fuakava ʼo te Lao neʼe mole feala ke natou fakatokatoka kātoa te kau Iselaele ʼaē ʼe tauhi fakamālotoloto mo te ʼAtua. Neʼe ʼui fēnei e te ʼapositolo ko Paulo: “E mole feala osi ke too te u agahala e te toto o te u pipi tagata pea mo te u tao.” (Hep. 10:1-4) Kae neʼe talagataʼa te kau Iselaele ki te Lao, ʼo natou malaʼia ai. (Kal. 3:10) ʼI te ʼaluʼaga ʼaia, neʼe faigataʼa ki te kau pelepitelō hau hanatou tokoni ki te mālamanei.
10. Neʼe koteā te fakatuʼutuʼu ʼo te fuakava ʼo te Lao?
10 Neʼe mole feala ai koa ke hoko te fakapapau ʼa Sehova ʼaē ke natou fakatupu “he puleaga o te u tagata faisakilifisio”? Kailoa ia. Kapau neʼe natou faiga moʼoni ke natou fakalogo, pea ʼe natou maʼu anai te fealagia ʼaia—kae mole ʼi te Lao. Koteā tona tupuʼaga? (Lau ia Kalate 3:19-25.) Kiā nātou ʼaē neʼe faiga ke natou mulimuli ki te Lao, neʼe liliu te Lao ʼo puipui ia te tauhi maʼa. Neʼe mahino ai ki te kau Sutea neʼe natou agahala pea mo ʼaoga he sākilifisio ʼe lahi age ʼi te ʼu sākilifisio ʼaē neʼe momoli e tanatou pelepitelō lahi. Ko te Lao neʼe ina taki nātou kiā Kilisito, peʼe ko te Mēsia, ko te ʼu higoa tuʼulaga ʼaia ko tona fakaʼuhiga “Fakanofo.” Kae ʼi te haʼu ʼo te Mēsia, neʼe ina fakatuʼu te fuakava foʼou ʼaē neʼe fakakikite e Selemia. Ko nātou ʼaē neʼe tali ia Kilisito neʼe fakaafe ke natou kau ki te fuakava foʼou pea mo liliu ko “he puleaga o te u tagata faisakilifisio.” Tou vakaʼi pe neʼe hoko feafeaʼi te faʼahi ʼaia.
ʼE FAKATUPU E TE FUAKAVA FOʼOU HE KAU PELEPITELŌ HAU
11. He koʼē, ʼaki ia Sesu, neʼe feala ai ki ʼihi atu ke natou kau ʼi te kau pelepitelō hau?
11 ʼI te taʼu 29 ʼo totatou temi, neʼe hā ai te Mēsia, neʼe ko Sesu ʼo Nasaleti. ʼI tona taʼu 30, neʼe ina fakahā tana fia fakahoko te gāue makehe ʼaē neʼe loto e Sehova ke ina fai, ʼo ina fakamoʼoni ʼaki tana papitema. Neʼe tala e Sehova ʼo ʼuhiga mo ia ko “toku Alo ofaina,” ʼo ina fakanofo ia ia ʼaki te laumālie māʼoniʼoni, kae mole ʼaki he moʼi lolo. (Mat. 3:13-17; Gaue 10:38) ʼI tona fakanofo ʼaia, neʼe liliu ia ko he Pelepitelō Lahi maʼa te hahaʼi tui ʼi te mālamanei kātoa pea ko honatou Hau ʼi te kā haʼu. (Hep. 1:8, 9; 5:5, 6) ʼE feala anai ki ihi atu ʼaki ia ia ke natou liliu ʼo kau ki te kau pelepitelō hau ʼaia.
12. Koteā ʼaē neʼe feala ke hoko ʼaki te sākilifisio ʼa Sesu?
12 ʼI tona ʼuhiga Pelepitelō Lahi, ko te sākilifisio fea ʼaē neʼe feala ke momoli e Sesu ke pulihi kātoa ai te ʼuhiga agahala ʼo te hahaʼi tui? Ohagē ko tona fakahā ʼi tana fakatuʼu ia te Fakamanatu ʼo tana mate, ko tona maʼuli haohaoa ʼaē neʼe ina sākilifisioʼi. (Lau ia Hepeleo 9:11, 12.) ʼO kamata ʼi te ʼaho ʼaē neʼe papitema ai, ʼi te taʼu 29 ʼo totatou temi, ko Sesu ʼi tona ʼuhiga Pelepitelō Lahi, neʼe ina tuku ia ia ke ʼahiʼahiʼi pea mo akoako ʼo aʼu ki tana mate. (Hep. 4:15; 5:7-10) ʼI tana ʼosi fakatuʼuake, neʼe hake ki selō pea mo ina momoli te maʼuhiga ʼo tana sākilifisio kiā Sehova. (Hep. 9:24) ʼI te temi leva ʼaia, neʼe feala ke kolekole e Sesu kiā Sehova maʼa nātou ʼaē ʼe natou tui ki tana sākilifisio pea mo tokoni kiā nātou ʼaia ke natou tauhi ki te ʼAtua ʼaki te ʼamanaki ki te maʼuli heʼegata. (Hep. 7:25) Neʼe toe ʼaoga tana sākilifisio ʼaia moʼo fakamoʼoni te fuakava foʼou.—Hep. 8:6; 9:15.
13. Koteā anai kā hoko kiā nātou ʼaē neʼe fakaafe ke natou kau ki te fuakava foʼou?
13 Ko nātou ʼaē neʼe fakaafe ke natou kau ki te fuakava foʼou neʼe toe fakanofo mo nātou ʼaki te laumālie māʼoniʼoni. (2 Ko. 1:21) Ko te kau Sutea agatonu pea mo te kau Senitile ki muli age neʼe natou kau ai. (Efe. 3:5, 6) Koteā anai kā hoko kiā nātou ʼaē ʼe kau ki te fuakava foʼou? ʼE fakamolemole ʼanatou agahala. Neʼe fakapapau fēnei e Sehova: “E au fakamolemole anai tanatou agakovi, pea e mole au toe manatui anai tanatou agahala.” (Sel. 31:34) ʼI te fakamolemole ʼaia e Sehova ʼanatou agahala, ʼe feala ke natou liliu ko “he puleaga o te u tagata faisakilifisio.” ʼI tana palalau ki te kau Kilisitiano fakanofo, neʼe tohi fēnei e Petelo: “Ko koutou, ‘ko he lanu filifiliia, ko he kau hau faisakilifisio, ko he puleaga maonioni, ko he hahai kua totogi, o tupu ke kotou fakaha te u naunau’ o ae kua ina paui ia koutou mai te fakapouli ki tona malama matalelei.” (1 Pet. 2:9) ʼE toe lagaʼi ʼi henī e Paulo te ʼu palalau ʼaē neʼe fai e Sehova ki Iselaele ʼi tana fakatuʼu te Lao, pea mo ina fakaʼuhiga te ʼu palalau ʼaia ki te kau Kilisitiano ʼi te fuakava foʼou.—Eke. 19:5, 6.
ʼE FOAKI ʼE TE KAU PELEPITELŌ HAU TE ʼU LELEI KI TE MĀLAMANEI
14. ʼE gāue anai ʼifea te kau pelepitelō hau?
14 ʼE gāue anai ʼifea ia nātou ʼaē ʼe kau ki te fuakava foʼou? ʼE natou gāue ʼi te kele ʼi tonatou ʼuhiga pelepitelō, ʼo natou fakafofoga ia Sehova ʼi muʼa ʼo te hahaʼi ʼaki tanatou ‘fakahā tana ʼu naunau’ pea mo foaki te meʼa kai fakalaumālie. (Mat. 24:45; 1 Pet. 2:4, 5) Hili tanatou mate pea mo tonatou fakatuʼuake, ʼe natou gāue anai mo Kilisito ʼi selō, ko he ʼu hau pea mo he kau pelepitelō, ʼo natou fakahoko kātoa te ʼu gāue ʼo te ʼu tuʼulaga ʼaia. (Luka 22:29; 1 Pet. 1:3-5; Apk. 1:6) Moʼo fakamoʼoni te faʼahi ʼaia, neʼe sio te ʼapositolo ko Soane ki te meʼa neʼe hā, ko te kau ʼāselo ʼe tuʼutuʼu ovi ki te hekaʼaga hau ʼa Sehova ʼi selō. ʼI tanatou hiva te “katiko foou” ki “te Akeno,” ʼe natou ʼui fēnei: “Nee ke totogi maa te Atua aki tou toto ni tagata mai te u faahiga fuli, mo te u lea fuli, mo te u hahai fuli, pea mo te u puleaga fuli; pea nee ke fakahoko natou ko he puleaga pea ko he kau tagata faisakilifisio ki totatou Atua, pea e natou hau anai ki te kele.” (Apk. 5:8-10) ʼI te meʼa neʼe hā ki muli age kiā ia, ʼe ʼui fēnei e Soane ʼo ʼuhiga mo te kau hau ʼaia: “E natou hoko anai ko te kau tagata faisakilifisio a te Atua mo Kilisito, pea e natou hau anai mo ia ia tau e afe.” (Apk. 20:6) ʼO fakatahi mo Kilisito, ʼe natou faʼufaʼu anai ia he kau pelepitelō hau moʼo foaki he ʼu lelei ki te mālamanei.
15, 16. Koteā te ʼu lelei ʼaē kā foaki anai e te kau pelepitelō hau ki te mālamanei?
15 Koteā te ʼu lelei ʼaē kā foaki anai e te toko 144 000 kiā nātou ʼaē ʼe māʼuʼuli ʼi te kele? Iā Apokalipisi kāpite 21, ʼe fakatā nātou ki he kolo ʼi selō, te Selusalemi Foʼou, pea ʼe fakahigoaʼi nātou ko “te ohoana a te Akeno.” (Apk. 21:9) ʼE ʼui fēnei ʼi te vaega 2 ki te 4: “Nee au sio leva e hifo mai te lagi, maia tafa o te Atua, te kolo maonioni, te Selusalemi foou, pea kua teuteu ia o hage ko he taahine ae kua teuteu ki tona ohoana. Pea nee au logo leva mai te hekaaga fakahau ki he leo malohi ae nee ui: Koeni te tapenakulo o te Atua mo te u tagata! E nofo anai ia mo natou, pea e natou liliu anai ko tana hahai, pea e nofo anai te Atua totonu mo natou. E ina holoholoi anai te u loimata fuli mai onatou mata, pea e mole toe mau anai te mate: e mole toe mau anai he tagi, mo he lauga, mo he mamahi, koteuhi kua puli leva te u uluaki mea.” ʼI ʼu tapuakina fakatalakitupua leva! ʼAki te pulihi ʼo te mate, ʼe pulihi ai te faʼahi tāfito ʼaē ʼe tupu mai ai te tagi, mo te putu, mo te ʼu lāuga, pea mo te mamahi. ʼE liliu anai te hahaʼi agatonu ʼo haohaoa, pea mo tokalelei kātoa mo te ʼAtua.
16 ʼI tana fakamatala ki muli age te ʼu lelei ʼaē kā foaki anai e te kau pelepitelō hau ʼaia, ʼe ʼui fēnei iā Apokalipisi 22:1, 2: “Nee ina fakaha mai leva kia au te vaitafe o te vai o te mauli, nee gigila o hage ko te kilisitale, ae nee mapuna mai te hekaaga fakahau o te Atua pea mo te Akeno, pea nee tafe i lotomalie o te ala lahi o te kolo [ʼo te Selusalemi Foʼou]. I ona kauvai e lua nee tuu ai te fuu akau o te mauli, ae nee fua tua hogofulu ma lua i te tau, o tua tahi i te mahina; pea nee fakaaoga ona lau ki te fakamauli o te atu puleaga.” ʼAki te ʼu fakatuʼutuʼu ʼaia, ko “te atu puleaga,” peʼe ko te ʼu fāmili fuli ʼi te kele, ʼe fakamālōlō kātoa anai nātou mai te agahala ʼaē neʼe natou maʼu mai iā Atama. ʼE moʼoni, ‘ko te ʼu meʼa ʼāfea kua puli ia.’
ʼE FAKAʼOSI E TE KAU PELEPITELŌ HAU TANATOU GĀUE
17. Koteā ʼaē kā fakahoko anai ki muli age e te kau pelepitelō hau?
17 Hili te ʼu taʼu e 1 000 ʼo tanatou gāue ʼaia, kua kaku ia te hahaʼi fakalogo ʼi te kele ki te maʼuli haohaoa ʼaki te tokoni ʼa te kau pelepitelō hau. ʼI tona ʼuhiga Pelepitelō Lahi pea mo Hau, ʼe fakahā anai e Kilisito ia te fāmili haohaoa kātoa fakamālamanei kiā Sehova. (Lau ia 1 Kolonito 15:22-26.) ʼE fakaʼosi anai e te kau pelepitelō hau tanatou gāue.
18. Hili te fakahoko kātoa e te kau pelepitelō hau tanatou gāue, ʼe fakaʼaogaʼi feafeaʼi anai e Sehova te ʼu kāuga gāue ʼaia ʼo Kilisito?
18 Hili ʼaia, ʼe fakaʼaogaʼi feafeaʼi anai e Sehova ia te ʼu kāuga gāue ʼaia ʼo Kilisito, ʼaē neʼe foaki kiā nātou te toe pilivilēsio lahi? Ohagē ko tona ʼui iā Apokalipisi 22:5, “e natou hau anai i te u sekulo mo te u sekulo.” ʼE natou pule anai kiā ai? ʼE mole talanoa te Tohi-Tapu ki te faʼahi ʼaia. Kae ʼaki tonatou faʼahiga maʼuli pea mo tanatou ʼiloʼi ʼaē peʼe feafeaʼi te tokoni ki te hahaʼi heʼe haohaoa, ʼe hoko atu anai tanatou pule pea mo te fakaʼaogaʼi ʼo nātou e Sehova moʼo fakahoko tana ʼu fakatuʼutuʼu ʼo talu ai.
19. Koteā ʼaē ʼe manatuʼi anai e nātou ʼaē kā ʼomai ki te ʼAho Fakamanatu?
19 Kā tou fakatahitahi anai ki te ʼAho Fakamanatu ʼo te mate ʼa Sesu, ʼi te Felianima, ʼaho 5 ʼo ʼApelili 2012, ʼe tou manatuʼi anai te ʼu akonaki Fakatohi-tapu ʼaenī. Ko te toega ʼo te kau Kilisitiano fakanofo ʼaē kei māʼuʼuli ʼi te kele, ʼe natou kai anai ki te pane pea mo ʼinu ki te vino, ʼo natou fakahā ai tanatou kau ki te fuakava foʼou. Ko te pane pea mo te vino ʼaē ʼe ina fakatā te sākilifisio ʼo Kilisito, ʼe fakamanatuʼi ai kiā nātou tanatou ʼu pilivilēsio mo maʼua taulekaleka ʼi te fakatuʼutuʼu heʼegata ʼa te ʼAtua. ʼOfa pē ke tou kau fuli ʼaki he loto fakafetaʼi lahi ki te fakatuʼutuʼu ʼaē e Sehova ʼAtua ia he kau pelepitelō hau ke natou foaki he ʼu lelei ki te mālamanei kātoa.
[ʼU fehuʼi ʼo te ako]
[Paki ʼo te pāsina 31]
ʼE foaki anai e te kau pelepitelō hau he ʼu lelei heʼegata ki te mālamanei
