ʼE matou mulimuli ki te ʼu pelesepeto ʼo te Tohi-Tapu ʼo ʼuhiga mo te nofo ʼohoana mo te mavete ʼohoana ʼi muʼa ʼo te puleʼaga. Neʼe fakatuʼutuʼu e Sehova ia te nofo ʼohoana. Neʼe ina loto ke fakatahi he tagata mo he fafine ʼo talu ai. ʼE ui ʼi te Tohi-Tapu, ʼe feala pe ke mavete he taumatuʼa mo kapau neʼe fai e he tahi ia naua he ʼu felaveʼi fakasino heʼe ʼaoga.​—Mateo 19:​5, 6, 9.

ʼE tokoni koa te kau Fakamoʼoni ʼa Sehova ki te ʼu taumatuʼa ʼae ʼe maʼuli tokakovi?

ʼEi, ʼaki he ʼu tokoni kehekehe:

• Te ʼu tohi. ʼE tou tau maʼu ai he ʼu tokoni e ʼaoga moʼo fakamalohi te nofo ʼohoana. ʼE toe ʼaoga ki te ʼu taumatuʼa ʼae ʼe mole kei felogoi lelei. ʼE feala ke ke vakaʼi te ʼu alatike “Tenir son engagement envers son conjoint,” “Comment pardonner,” mo te alatike “Comment rétablir la confiance entre conjoints.”

• Te ʼu fono. ʼE talanoa ʼi te ʼu fono mo te ʼu fakatahi lalahi ki te ʼu tokoni ʼe tou maʼu ʼi te Tohi-Tapu ʼo ʼuhiga mo te nofo ʼohoana.

• Te ʼu tagata ʼafeā. ʼE tokoni te kau tagata ʼafeā ʼo te kokelekasio ki te ʼu taumatuʼa fuli. ʼE natou fakamaʼuhigaʼi te ʼu tokoni Fakatohi-tapu ohage la ko Efeso 5:​22-​25.

Moka fia mavete he tahi, ʼe tonu koa ke fakagafua age muʼa e te ʼu tagata ʼafeā tana mavete?

Kailoa. Ka tokoni te kau tagata ʼafeā ki he taumatuʼa ʼo ʼuhiga mo tona maʼuli fakataumatuʼa, ʼe mole tonu ke natou ui age te ʼu faʼahi ʼae ʼe tonu ke nā fai. (Kalate 6:5) Ohage pe ki te ui ʼi te Tohi-Tapu, kapau filifili e he tahi ke mavete mo tona ʼohoana kaʼe mole hona tupuʼaga Fakatohi-tapu, ʼe mole feala hana toe ʼohoanaʼi he tahi.​—1 Timoteo 3:​1, 5, 12.

Kotea te manatu ʼa te kau Fakamoʼoni ʼa Sehova ki te tahi nofo ʼa he taumatuʼa?

ʼE fakalotomalohiʼi e te Tohi-Tapu ke nonofo fakatahi ia he taumatuʼa logo la te ʼu faigataʼaʼia ʼae e feala ke tau mo naua. (1 Kolonito 7:​10-​16) ʼE feala pe ke tou fakatokatoka he ʼu toe fihifihia lahi, mo kapau ʼe tou faikole fakamalotoloto, mo maʼuliʼi te ʼu pelesepeto Fakatohi-tapu pea mo tou fakaha te ʼofa.​—1 Kolonito 13:​4-8; Kalate 5:​22.

Kaʼe, neʼe tahi nofo ʼihi Kilisitiano mo ʼonatou ʼohoana ʼuhi ko te ʼu aluʼaga ʼaeni:

• ʼE mole tokaga he tahi ki tona famili ʼi te faʼahi fakasino.​—1 Timoteo 5:8.

• Te lahi fau ʼo te agamalohi.​—Pesalemo 11:5.

• Moka fakatupu kovi ki te maʼuli fakalaumalie. Ohage la, e feala ke fakamalohiʼi e he tahi tona ʼohoana ʼae ʼe tauhi kia Sehova, ke talagataʼa ki he lao ʼa te ʼAtua. Pea ʼe feala ke filifili e te Fakamoʼoni ʼaia ke mavae mai mo tona ʼohoana ʼo ina fakaha ai tana “fakalogo ki te ʼAtua ʼi tona ʼuhiga pule” ʼi “te tagata.”​—Gaue 5:​29.