He Koʼe ʼe Mole Tatau Te Faʼahiga Fai ʼa Te Kau Fakamoʼoni ʼa Sehova Te Taumafa ʼa Te ʼAliki Pea Mo Te ʼu Lotu ʼAe?
ʼE matou mulimuli lelei ki te Tohi-Tapu ʼo ʼuhiga mo te faʼahiga fai ʼa te Taumafa ʼa Te ʼAliki, ʼae ʼe toe fakahigoaʼi ko te Fakamanatu ʼo Te Mate ʼa Sesu. (1 Kolonito 11:20) Kae, ʼe mole fakatafito ia ki te Tohi-Tapu te ʼu akonaki pea mo te ʼu faʼahiga fai ʼae ʼa te ʼu lotu ʼae.
Te fakatuʼutuʼu
Ko te fakatuʼutuʼu ʼo te Taumafa ʼa Te ʼAliki ke tou manatuʼi ia Sesu, pea tou fakaha totatou fakafetaʼi ki te sakilifisio neʼe ina fai maʼa tatou. (Mateo 20:28; 1 Kolonito 11:24) Ko te fakamanatu ʼaia ʼe mole ko he “sakalameta,”, peʼe ko he toʼotoʼoga fakalotu ʼe foaki ai he ʼu kalasia, peʼe fakamolemole ai te ʼu ʼagahala. a ʼE ui i te Tohi-Tapu ʼe feala ke fakamolemole ʼatatou ʼagahala, ʼo mole ʼaki he toʼotoʼoga, kae ʼaki pe te tui kia Sesu.—Loma 3:25; 1 Soane 2:1, 2.
Ke fai tuʼa fia?
Neʼe fakatotonu e Sesu ki tana kau tisipulo ke natou fakamanatu te Taumafa ʼa Te ʼAliki, kae neʼe mole ina ui peʼe tonu ke fai tuʼa fia. (Luka 22:19) ʼE manatu ʼihi ʼe tonu ke fai ʼi te mahina fuli, ki ʼihi ʼe tonu ke fai ʼi te vahaʼa fuli, ʼi te ʼaho fuli, ke fai liuliuga ʼi te ʼaho fuli, peʼe fakalogo ki te loto ʼo te takitokotahi. b Kae, koʼeni te ʼu aluʼaga ʼe tonu ke tou tokagaʼi.
Neʼe fakatuʼutuʼu e Sesu te Taumafa ʼa Te ʼAliki ʼi te ʼaho ʼo te Pasikate Sutea, pea neʼe mate ki muli age ʼi te ʼaho pe ʼaia. (Mateo 26:1, 2) Neʼe mole ko aluʼaga neʼe hoko feia pe. ʼE fakatatau ʼi te Tohi-Tapu te sakilifisio ʼa Sesu ki ʼae ʼa te akeno ʼo te Pasikate. (1 Kolonito 5:7, 8) Neʼe fakamanatu te Pasikate ʼo tuʼa tahi ʼi te taʼu. (Ekesote 12:1-6; Levitiko 23:5) ʼO toe feia pe, neʼe fakamanatu e te kau Kilisitiano ʼo te ʼuluaki sekulo te Mate ʼa Sesu ʼo tuʼa tahi ʼi te taʼu, c pea ʼe mulimuli te kau Fakamoʼoni ʼa Sehova ki tona faʼahiga fai ʼaia.
Te ʼaho mo te hola
ʼE mole tokoni mai pe te faʼahiga fai ʼae neʼe fakatuʼutuʼu e Sesu ke tou iloʼi peʼe tonu ke fai tuʼa fia, kae ke tou iloʼi te ʼaho mo te hola ʼae ʼe tonu ke fai ai te Fakamanatu. Neʼe ina fakatuʼutuʼu te fakamanatu ʼaia hili te to ʼo te laʼa, ʼi te ʼaho 14 ʼo Nisani ʼo te taʼu 33 H.T.S, ʼo te kaletalio ʼi te Tohi-Tapu. (Mateo 26:18-20, 26) ʼE hoko atu te fai e te kau Fakamoʼoni ʼa Sehova te Fakamanatu ʼi te ʼaho ʼaia ʼi te taʼu fuli, ohage ko tona fai e te kau ʼuluaki Kilisitiano. d
Logo la neʼe to te ʼaho 14 ʼo Nisani 33 H.T.S. ʼi he feliaono, kae ʼe feala pe ke to te ʼaho ʼo te Fakamanatu ʼi he ʼaho pe ʼo te vahaʼa. ʼE matou fakafuafua ʼi te taʼu fuli te ʼaho 14 ʼo Nisasi ʼo mulimuli ki tona faʼahiga fai ʼi te temi ʼo Sesu, kae mole ko ʼae ʼe fakaʼaogaʼi e te kau Sutea ʼi te temi nei. e
Te pane mo te vino
Neʼe fakaʼaogaʼi e Sesu ki te fakamanatu te pane hala fakatupu pea mo te vino kula ʼae neʼe toe ʼi te kai ʼo te Pasikate. (Mateo 26:26-28) ʼO toe feia pe, ʼe matou fakaʼaoga he pane hala fakatupu neʼe mole fio mo he tahi age meʼa pea mo he vino kula neʼe mole huʼi mo he tahi age meʼa, kae mole fakaʼoaga he huʼa vite, peʼe ko he vino neʼe fakamalie peʼe fakamagoni.
Ko ʼihi lotu ʼe natou fakaʼaoga he pane neʼe fakatupu, kae ʼi te Tohi-Tapu, ko te meʼa fakatupu ʼe fakaʼuhiga tuʼumaʼu ki te ʼagaha pea mo te pala ʼo te sino. (Luka 12:1; 1 Kolonito 5:6-8; Kalate 5:7-9) Koia, ko te pane pe ʼae ʼe hala fakatupu, neʼe mole fio ʼaki he tahi age meʼa, ʼae ʼe ina fakata lelei te sino hala ʼagahala ʼa Sesu. (1 Petelo 2:22) Ko te tahi aluʼaga ʼe mole fakatafito ki te Tohi-Tapu ʼe ko te fetogi te vino ʼaki he huʼa vite neʼe heʼeki liliu ʼo vino. ʼE fai e ʼihi lotu te faʼahi ʼaia koteʼuhi ʼe natou tapuʼi te inu kava.—1 Timoteo 5:23.
Ko te pane mo te vino ʼe mole ko te sino mo te toto ʼa Kilisito
Ko te pane hala fakatupu pea mo te vino kula ʼe natou fakata te sino mo te toto ʼa Sesu. ʼE mole natou fetogi fakamilakulo ʼo kakano mo toto, ohage ko te manatu ʼa ʼihi. Tou vakaʼi te ʼu fakamoʼoni fakatohi-tapu ʼo te fakamahino ʼaia.
Kapau la neʼe fakatotonu e Sesu ki tana ʼu tisipulo ke natou inu tona toto, ko tona fakaʼuhiga neʼe ina kole age ke natou maumauʼi te lao ʼa te ʼAtua, ʼae ʼe ina tapuʼi te kai ʼo te toto. (Senesi 9:4; Gaue 15:28, 29) Kailoa ia, neʼe mole pe feala ke fakatotonu e Sesu ke natou maumauʼi te lao ʼa te ʼAtua ʼae ʼo ʼuhiga mo te ʼuhiga taputapu ʼo te toto.—Soane 8:28, 29.
Ka na neʼe inu moʼoni e te kau apositolo te toto ʼa Sesu, ka na ʼaua la neʼe mole feala ke ina ui ko “toku taʼataʼa […] ʼe tonu ke liligi,” ʼo fakaha ai ʼe ko he aluʼaga ka hoko anai.—Mateo 26:28.
Ko te sakilifisio ʼa Sesu neʼe fai “tuʼa tahi ʼo talu ai.” (Hepeleo 9:25, 26) Kae, kapau neʼe fetogi fakamilakulo te pane mo te vino ʼo kakano mo toto lolotoga te Taumafa ʼa te ʼAliki, pea neʼe tonu leva ke toe fai e natou ʼae ʼe kau ai te sakilifisio ʼaia ʼi te temi fuli ʼae ʼe natou fakamanatu ai.
Neʼe ui e Sesu: “Kotou haga fai te faʼahi ʼaeni moʼoku fakamanatu,” kae mole “moʼoku sakilifisioʼi.”—1 Kolonito 11:24.
ʼE fakatafito te tui ʼa ʼihi ki te fetogi fakamilakulo ʼo te pane mo te vino ʼo sino mo taʼataʼa ʼa Sesu, ki te ʼu palalau ʼe maʼu ʼi te ʼu vaega Tohi-Tapu. Ohage la, ʼe lahi te ʼu fakaliliu ʼo te Tohi-Tapu ʼe natou fakaliliu te ui ʼae ʼa Sesu ʼo ʼuhiga mo te vino: “He ʼe ko toku taʼataʼa ʼaeni.” (Mateo 26:28) Kae, ʼe toe feala ke fakaliliu fenei te ʼu palalau ʼa Sesu: “He ʼe ina fakata toku taʼataʼa.” f Ohage ko tana fai mahani, neʼe akonaki ia Sesu ʼi heni ʼo ina fakaʼaogaʼi he palalau fakata.—Mateo 13:34, 35.
Ko ai ʼae ʼe ina kai mo inu ki te pane mo te vino?
Ka fakamanatu e te kau Fakamoʼoni ʼa Sehova te Taumafa ʼa te ʼAliki, ko te tokosiʼi pe ʼae ʼe natou kai mo inu ki te pane mo te vino. Kotea tona tupuʼaga?
Neʼe fakamoʼoni e te taʼataʼa ʼa Sesu neʼe liligi te “fuakava foʼou,” ʼae neʼe ina fetogi te fuakava ʼae neʼe fai e Sehova mo te Iselaele ʼafea. (Hepeleo 8:10-13) Ko natou ʼae ʼo te fuakava foʼou ʼaia ka natou kai mo inu ki te pane mo te vino. ʼE mole ko te kau Kilisitiano fuli, kae ko natou pe ʼae “ʼae neʼe pauʼi” e te ʼAtua ʼi hona aluʼaga makehe. (Hepeleo 9:15; Luka 22:20) Ko natou ʼaia ka natou kauga hau anai mo te Kilisito ʼi te lagi, pea ʼe ui ʼi te Tohi-Tapu ʼe ko te toko 144 000 hahaʼi pe ʼae ka maʼu anai te fealagia makehe ʼaia.—Luka 22:28-30; Fakaha 5:9, 10; 14:1, 3.
ʼO kehe ia mo te “kiʼi faga ovi” ʼae neʼe pauʼi ke kauga hau mo Kilisito, ko te tokolahi ʼo te kau Fakamoʼoni ʼa Sehova ʼe natou maʼu te ʼamanaki ʼae ke natou kau ki “te toe hahaʼi tokolahi” ʼae ka maʼuʼuli anai ʼo heʼe gata ʼi te kele. (Luka 12:32; Fakaha 7:9, 10) Logo la ko natou ʼae ʼe ʼamanaki ki te maʼuli ʼi te kele ʼe mole natou kai mo inu ki te pane mo te vino ʼi te Fakamanatu, kae ʼe natou olo ki te Fakamanatu ko tanatou fakaha ʼaia ʼo tonatou fakafetaʼi ki te sakilifisio neʼe fai e Sesu maʼa tatou.—1 Soane 2:2.
a ʼE ui fenei ʼi te tohi: “ʼE mole tuʼu te kupu sakalameta ʼi te Tauhi Foʼou; ʼe mole toe tuʼu ai te kupu Fakakeleka word μυστήριον [my·steʹri·on] ʼi te ʼu vaega ʼae ʼe palalau ai ki te papitema peʼe ko te Taumafa ʼa te ʼAliki, peʼe ko he tahi age toʼotoʼoga.” (Cyclopedia ʼa McClintock mo Strong, Vol. 9, p. 212).
b ʼE fakaʼaoga ʼi ʼihi fakaliliu ʼo Tohi-Tapu te kupu “ʼi te temi fuli” ʼo ʼuhiga mo te fai ʼo te Taumafa ʼa Te ʼAliki, pea ʼe iloʼi ai peʼe tonu ke tuʼa fia tona fai. Kae, ʼi te aluʼaga ʼaia, ʼe tonu ke fakaliliu te kupu fakakeleka ʼaia ʼaki te kupu “ʼi te temi pe ʼae” peʼe “ʼi te temi fuli pe ʼae.”—1 Kolonito 11:25, 26 Bible de Chouraqui.
c Vakaʼi The New Schaff-Herzog Encyclopedia of Religious Knowledge, vol. 4, p. 43-44, pea mo te Cyclopedia ʼa McClintock mo Strong, vol. 8, p. 836.
d Vakaʼi The New Cambridge History of the Bible, vol. 1, p. 841.
e ʼE fakafuafua te kamataʼaga ʼo te mahina ʼo Nisani ʼo te kaletalio Sutea ʼo te temi nei ki te tuʼu afiafi ʼo te mahina ʼi te lagi, kae neʼe mole fai feia ʼi te ʼuluaki sekulo. Neʼe kamata te mahina ʼi te temi ʼae neʼe ha ai te tuʼu afiafi ʼo te mahina ʼi Selusalemi, aluʼaga neʼe feala ke hoko hili he ʼaho peʼe laka atu ki te tuʼu afiafi ʼo te mahina ʼi te lagi. Ko te tahi ʼo te ʼu tupuaʼaga ʼae ʼe mole tatau ai te ʼaho ʼae ʼe fakamanatu ai e te kau Fakamoʼoni ʼa Sehova te Mate ʼa Sesu pea mo te ʼaho ʼae ʼe fakamanatu ai e te kau Sutea tanatou Pasikate.
f Vakaʼi A New Translation of the Bible ʼa James Moffatt, The New Testament—A Translation in the Language of the People ʼa Charles B. Williams pea mo The Original New Testament ʼa Hugh J. Schonfield.