SHin issi issi aqo laggeti tekinolojiyaa bessenna ogiyan goˈettoosona. Hegee eta bolli kaallidi deˈiya metoti gakkanaadan oottana danddayees:

• eti issippe aattana wodiyaa wurssana danddayees.

• eti koshshennabaa oottiiddi bantta wodiyaa wurssanaadan oottana danddayees.

• eti issoy issuwaa cimmanaadan woy ubba qassi issoy issuwawu ammanettennaadan oottana danddayees.

ISSIPPE WODIYAA AATTITE

Maykil giyo azinay hagaadan giis: “Ta keettaayyiyaanne taani issi kifiliyan deˈiyaaba gidikkonne, issi issitoo taani deˈiyaabadankka qoppukku. A ba moobayliyaa karchchaydda hagaadan gawusu: ‘Ta koyiyoobaa hanno gakkanawu demmana danddayabeykke.’” Jonaatana giyo azinay hegaa mala hanotan ‘azinaynne machchiya issippe deˈikkonne, eti dumma dumma sohuwan deˈiyaabadan qoppana danddayiyoogaa’ yootiis.

QOPPANA KOSHSHIYAABAA: Neeni ne aqo laggiyaara haasayana danddayiyo wodiyaa hara uraara silkkiyaa haasayaydda woy kiitaa xaafaydda wurssay?—EFISOONA 5:33.

OOSUWAA

Qammikka silkkee dawalettiyo woy imeelee kiitettiyo wode zaarana bessiyo oosoy issi issi asatussi deˈees. SHin hegaa mala oosuwaa oottenna asatikka, oosuwaappe so simmiyo wode eti daro saatiyaa oottana danddayoosona. Lii giyo azinay hagaadan giis: “Taani ta keettaayeera wodiyaa aattanawu bazzido wodiyan, ooso sohuwaappe dawalettiya silkkiyaa denttennan woy kiitaa zaarennan agganawu metootays.” Joy giyo maccaasiyaa hagaadan gaasu: “Taani oosuwaa son uttada oottiyo gishshawu, oosuwaa essiyo wodiyaa eriyoogee tana keehi metees. Taani oosuwaa bessiyaagaadan oottanawu baaxetays.”

QOPPANA KOSHSHIYAABAA: Ne aqo laggee nena haasayissiyo wode loytta ezggay?—LUQAASA 8:18.

TEKINOLOJEE AQO DEˈUWAA WAATI QOHANA DANDDAYII?

Sooshal miidiyan wottidobaa xeelliyaagan aqo laggeti issoy issuwaa cimmiyo wode eti ooyettiyoogaa daro asay yootees. Ubba qassi amaridaageeti bantta aqo laggee eranaadan eti koyennabaa intternneetiyan wottiyoogaa yootoosona.

Sooshale miidee aqo oyqqidaageeta keehi qohana danddayiyoogaa, ubba qassi eti shaaramuxanaadan oottiyoogaa daro asay akeekiis. Daro aqo laggeti shaahettanaadan sooshal miidee oottidoogaa afkaatoti yootiyoogee maalaalissiyaaba gidenna.

QOPPANA KOSHSHIYAABAA: Mattuman neeppe dummatiya uraara haasayidobaa ne aqo laggiyaappe qosay?—LEEMISO 4:23.

KEEHI KOSHSHIYAABA KASEYA

Qumaa meenna uri payya gididi deˈana danddayenna. Hegaadankka, ba aqo laggiyaara wodiyaa aattenna uraa aqo deˈuwan metoy deˈanaagee qoncce.—Efisoona 5:28, 29.

Tekinolojee intte aqo deˈuwaa qohennaadan intte aqo laggiyaara zorettidi kaallidi deˈiyaabatuppe intte oottanawu koyido qofaa doorite, woy intte qofaa xaafite.

• Baa giishin gallassan issitoo qumaa issippe miite

• Moobayliyaa goˈettenna wodiyaa bazzite

• Ufayssiyaabaa issippe oottanawu wodiyaa bazzite

• Xiskkiyo wode intte moobayliyaa gorddite, qassi intteppe haassite

• Intte issoy issuwaara haasayiyo wode intte qofaa shaakkenna mala galla galla 15 daqiiqawu silkkiyaa gorddite

• Galla galla amarida wodiyawu Intternneetiyaa goˈettoppite