Taani yelettidoy Dominikan Iripubilikiyan, Santo Domingo giyo katamaana gidishin, nu son oyddu naatuppe taani wurssetta. Nu so asay tamaarida asata, qassi eti bantta naati loˈˈo asatu giddon loˈˈo hanotan diccanaadan koyidosona. Taani yelettanaappe oyddu layttappe kasetidi tana yelidaageeti Mormone haymaanootiyaa misoonaawetuura gayttidosona. He woddallati huuphiyaa qanttan qanxxettidi geeshsha maayuwaa maayidanne loˈˈo eeshshay deˈiyoogeeta gidiyo gishshawu, ta aawaynne aayyiyaa nu so asay ufayttidi he haruuruwan deˈiya, Mormone haymaanootiyaa kaalliya koyro keettaa asa gidana giidi sohuwaara qofaa qachchidosona.

Taani gitaa gidada woosa keettan asaa maaddiyo oosuwaa ufayssan oottaas; qassi Mormone haymaanootee so asaanne kandduwaa xeelliyaagan tamaarissiyoobaa nashshaas. Taani he wode Mormone gidiyoogan ufayttays; ubba misoonaawe gidanawu halchchaas.

Tawu layttay 18 gidiyo wode, taani loˈˈo yunversitiyan tamaaranaadan nu so asay Amarkkaa biis. Issi laytta gidiyaagee aadhdhin, Yihoowa Markka gidida ta aayee michchiyaanne I keettaaway Filorida katamaa yiidi nuna oychchidosona. Eti Geeshsha Maxaafaa tamaariyo gita shiiquwaa nuna shoobbidosona. SHiiquwan deˈiya ubbay xiqisiyaa kessiyoogaanne masttooshaa oyqqiyoogaa beˈada garamettaas. Yaatiyo gishshawu, tawukka biiriyaanne woraqataa immanaadan oychchada hegaadan oottiyoogaa doommaas.

Taani misoonaawe gidanawu koyiyo gishshawu, he shiiquwaappe simmin, ta aayee michchiyaanne I keettaaway Geeshsha Maxaafaa loytta eranaadan tana maaddanaagaa yootidosona. He wode taani Geeshsha Maxaafaappe aaruwan Mormonetu Maxaafaa eriyo gishshawu, eti giidobay loˈˈo gaada qoppaas.

Nuuni Geeshsha Maxaafaa qofaa silkkiyan tobbiyo wode, ta aayee michchiyaanne I keettaaway taani ammaniyoobaa Geeshsha Maxaafaara geeddarssanaadan ubbatoo tana minttettoosona. Eti taani tawu tumaa shaakka eranaadan koyidosona.

Mormone haymaanootee tamaarissiyo darobaa ammanays; shin hegee Geeshsha Maxaafaara maayiyaakkonne erikke. Ta aayee michchiyaa Yihoowa Markkati attamissido Hidaare 8, 1995, Beegottite! maxeetiyaa tawu kiittaasu; hegan amarida huuphe yohoti Mormone ammanuwaabaa yootoosona. Taani Mormone haymaanootee tamaarissiyo darobaa erennaagaa akeekada garamettaas. Hegee taani Beegottite! maxeetiyan qonccidabay tumakkonne eranawu Mormone websaytiyaa pilgganaadan denttettiis. He websaytiyan he maxeetee yootiyoobay tuma gidiyoogaa akeekaas, qassi Yuta giyoosan deˈiya Mormone muuzeemiyaa xomoosido wode hegaa beˈaas.

Taani kase Mormone maxaafan deˈiya qofay Geeshsha Maxaafay yootiyoobaa phalqqennabadan qoppays. SHin Geeshsha Maxaafaa akeekan nabbabiyoogaa doomma simmada, Mormone ammanoy tamaarissiyoobaynne Geeshsha Maxaafay yootiyoobay maayettennaagaa akeekaas. Leemisuwawu, Geeshsha Maxaafay Hizqqeela 18:4n shemppoy hayqqiyoogaa yootees. SHin Mormone Maxaafay Alma 42:9n, “SHemppoy mule hayqqenna” yaagees.

Mormonetu timirttee dummatiyoogaa xalla gidennan, eti yelettido biittaa xoqqu ootti xeellanaadan tamaarissiyoobaakka siraas. Leemisuwawu, Mormone ammanuwaa kaalliyaageeti beni Edene gannatee Amarkkan Mizuri, Jaksen Kawunti giyoosan deˈiyaabadan ammanoosona. Qassi he woosa keettaa kaalettiyaageeti sinttappe Xoossaa Kawotettay Amarkkaa kawotettaa baggaara kumetta saˈaa haarana giidi tamaarissoosona.

Taani yelettido biittaa mala hara biittati waanana giidi Mormoneti tamaarissiyoonaa gaada qoppaas. Mormone haymaanootiyaa misoonawe gidanawu loohiiddi deˈiya issi yelagay issitoo omarssi tawu silkkiyaa dawalin ha qofaa awu denttaas. A biittaynne hara biittay olettiyaakko, I yan deˈiya Mormone haymaanootiyaa kaalliya asata woranawu olettanaakkonne qoncciyan oychchaas. I ee, olettana giidi zaarin garamettaas! Taani ta ammanuwaabaa loytta pilggaas; qassi Mormone Woosa Keettaa kaalettiya aawatettay deˈiyoogeeta issi issibaa oychchaas. Eti ta oyshay xuura yoho gidiyoogaanne ayyaanaabaa pooˈoy gujjiyo wode issi galla zaaroy beettanaagaa yootidosona.

Eti odidoban yiillotada, taani Mormone misoonaawe gidanawu koyido gaasuwaanne tabaa wotta yeggada qoppiyoogaa doommaas. Taani misoonaawe gidanawu koyidoy asa maaddanawu koyiyo gishshataassa gidiyoogaa akeekaas. Hara gaasoy qassi asay tana bonchchanaadan koyiyoogaa. SHin tumaa yootanawu, taani Xoossaabaa eriyoobay guutta. Taani kase Geeshsha Maxaafaa darotoo nabbabikkonne keehi koshshees gaada qoppabeykke. Xoossay saˈawu woy asawu halchchidobaakka kase erikke.

Yihoowa Markkatuura Geeshsha Maxaafaa xannaˈada, Xoossaa sunttay oonakko, asay hayqqiyo wode waaniyaakko, Xoossaa halchchoy polettanaadan maaddiyoogan Yesuusi oottiyoobaanne hara darobaa akeekaas. Wurssettan, ha loˈˈo maxaafan deˈiyaabaa akeekaas, qassi taani tamaarido tumaa haratuyyo yootiyoogaa doommaas. Taani Xoossay deˈiyoogaa kasekka erays; shin haˈˈi mata laggedan aara woosan haasayana danddayays. Taani Isiine 12, 2004n xammaqettada Yihoowa Markka gidaas; qassi usuppun aginappe guyyiyan ubba wode haggaaziyoogaa doommaas.

Taani ichchashu layttawu Niwu Yorken, Brukilinen deˈiya Yihoowa Markkatu waanna biiruwan oottaas. Kumetta saˈan deˈiya miilooniyan qoodettiya asaa maaddiya Geeshsha Maxaafaanne hegaara gayttida xuufeta attamiyo oosuwan maaddidoogeenne asay Xoossaabaa eranaadan maaddaydda deˈiyoogee tana keehi ufayssees.