Moovirikana ni atthu akina, Yesu apattuxiwe ni mwaneene Muluku. Ahinakuve owa elapo ya vathi, owo aari nlaika naakhala wirimu. (Yohani 8:23) Yesu aahakhavihera atithawe opattuxa itthu ikina. Mbiblyani, Yesu oonitthaniwa okhala mwana “mmoohiru” a Muluku. Eyo enthonyihera weera yooworu topattuxinwe ni muneene Muluku. (Yohani 1:14) MBiblyani Yesu onnitthaniwa okhala “nsu”, mwaha woowera owo karumeya a Muluku. — Mmusome Miruku 8:22, 23, 30; Akolosi 1:15, 16.

Yesu aahoowa elapo ya vathi mwaha wa mathowa mararu: (1) oxuttiha ekhaikhai ya Muluku, (2) woonihera moota woopaka yootthuna ya Muluku naari nikumanakano sooxupa ni (3) oveleela ekumaawe weera awoopole atthu mwa soottheka. Vano aawiiye moota heeni elapo ya vathi? Muluku aapanke mwiriira ni muthiyaana mmoha eeriwa Maria, yoowo voottharela aarupanle erukulu ni aamuyanre mwaana eeriwa Yesu. — Luka 1:30-35. — Mmusome Matheyo 20:28.

Onnatthuneya weera noopoliwe mwaaha wooweera noottheka nave ninnakhwa. Vaavo Muluku ampattuxawe Adamu, owo ampattunxe ni mukhalelo woohittheka, nave-tho khaatthuna weera owo akhwiyene. Nto aatthuna weera aakhanle owiiwelela. Mene Adamu khamwiiwelenle  Muluku. (Ephattuwelo 2:16, 17; 5:5) Atthu ootheene ekhumme wa Adamu, aakhalano yoottheka nave ennakhwa. Mweekhaikhai waannathuneya yoowopola. Mwa yeeyo yoowopola eri ntoko mutthu owaleliwe mukaliposo, evinyaka mutthu mukina anavelela musurukhu weera amoopole mukwaawe.— Ottimula 21:29, 30. — Mmusome Aroma 5:12; 6:23.

Vaano, taani eera awere onoopola mookhwani? Aatthuneya mutthu oohittheka weera anoopole. — Mmusome Nsalmu 49:7-9.

Yesu akhwenle mwaha wa nsivelo araaweno naatthu. Oowo khaapwanenle okhwa mwaha woowera aari oomalela eyo tiyo, kharinono yootheka. Naamwi varene hiho, owo amwiiwelela tiithawe, avelelaka ekumaawe mookhwani weera anoopole wa soottheka. Mwaha wa yoowopola ya Yesu, Muluku onolevelela soottheka saatthu. Mene Muluku, ohonihera nsivelo mwaha woomurumiha mwanawe, owa elapo ela ya vathi weera anoopole. — Mmusome Yohani 3:16; Aroma 5:18, 19.

Yesu mwene onlamulela wirimu. Emara aarawe elapo ya vathi, anavinyereriha atthu ookhwa, annalamiha alipa oovoreiwa nave anakurunuxa ohaawa wa atthu antxipale. (Matheyo 15:30, 31; Yohani 5:28) Yesu akhwakaru, Muluku onvinyereriha weera akhaleke wirimu. (1 Pedru 3:18) Aphiyakaru, owo anweherera Yehova weera anvahe owera woolamulela. (Aheberi 10:12, 13) Atthu antxipale a elapo yootheene, ennimwiiwelela Yesu, ni olaleya omwene awe. Itthu sooreera Yesu apankawe, sinthonyihera itthu sinrowa weereya muhoolo. — Mmusome Daniyeli 7:13, 14; Matheyo 24:14.

Atthu oororomela ni oowiiwelela, anokhala mparadiso mahiku oohimala, mene ale ahiniiwelela ni oonanara murima, animwiviwa ni Yesu. — Mmusome Nsalmu 37:9-11.