Aalepelinwaawe Tito 3:1-15
3 Nvireleleke owuupuxera asinna weera emwiiweleleke kuvernu ni anamahoolela ni weera ekhaleke oolikaneene ovara miteko sootheene sooreera,
2 weera ehiwuulumeke moohireerela atthu akina, ehinyakulihaneke menento ekhaleke oopixa murima ni yaareereleke murima atthu ootheene.
3 Woona weera hiyo-tho khalayi naari atthu oohikhalano miruku ni oohimwiiwelela Muluku, nannawokiwa ni atthu ni naari akaporo a sootthuna sintxipale ni naapaka itthu sinnisivela paahi, nannapaka itthu soonanara ni naari ananrima, naari oothanyeya nave nanniittana mukina ni mukhwaawe.
4 Menento Muluku Nvuluxa ahu, oowoonihera atthu oreera murima ni nsivelo,
5 owo oonivuluxa (ohiya mwaha wa miteko sahu sa exariya, mene mwaha wa omoriwa wawe ikharari) owo oonitteeliha anivahaka ekumi enyowani avarelaka muteko munepa awe wootteela.
6 Anvarelaka muteko Yesu Nvuluxa ahu, Muluku oonivaha munepa wootteela woowaatta,
7 owo oopaka eyo weera nikhaleno yooweherera yoowaakhela ekumi yoohimala owo olaihenraawe, hiyo nnoowera ophwanya ekumi eyo mwaha wa oreera wawe murima otokweene, weiwo ommweeriha oniitthana anaxariya.
8 Masu ala teekhaikhai ni oororomeleya, miyo kintthuna weera nyuwo nvireleleke oxuttiha itthu iya weera ale emmuroromela Muluku yuupuweleleke ovara miteko sooreera, itthu iya, ti sooreera ni ti sookhavihera wa atthu.
9 Tivawonto, muhiivoleihereke ovaanyihana woololo naari woohima sa makholo anyu, onyakulihana, naari waakhulana woohima sa Nlamulo, woona weera itthu iya khasinvareleya muteko ni khasinkhavihera etthu.
10 Akhala mutthu onxuttiha sooxuttiha soovirikana,* munvahe miruku mooluluwanya ekwaha yoopatxera, avinyaka munvahe ekwaha yanaaveeli, akhootta wiiwelela mmukumiheke mmulokoni,
11 musuwelaka weera oohiya weettela ephiro yeekhaikhai, vano onthorihiwa mwaha wa soopaka sawe.
12 Koorumihelani vale Artema naari Tikhiko, mpake ele munweraanyu weera nwe mukixekure oNikopoli, woona weera ti weiwo kithanliyaaka ovirihawo eyiita.
13 Mmukhavihere Zena ni itthu sootheene sintthuneya mmukwahani mwawe, yoowo ori oosuwela nnene sene Nlamulo, vamoha ni Apolo weera awosa ehaathowe etthu.
14 Ni asinnihu-tho entthuneya ovirelela oxuttera ovara miteko sooreera weera yaakhavihereke atthu akina enthoiwa weera awo ehikhale anooreesi.
15 Atthu ootheene eri ni miyo ennoorumihelani isalaamu. Mwaavahe isalaamu saka ale ennisivela munroromeloni.
Oreera murima otokweene wa Muluku okhale ni nyuwosa.
Footnotes
^ Naari: “soowootha.”
