Aalepelinwaawe Tito 1:1-16
1 Miyo Paulo, kaporo a Muluku ni murummwa a Yesu Kristu. Nroromelo naka ni miteko saka ntoko murummwa sinvarihana ni nroromelo na ale Muluku aathanliyaawe moovarihana ni osuwela weekhaikhai, weiwo onoonihera moota woomukokhorela Muluku,
2 weiwo onvarihana ni yooweherera ya ekumi yoohimala, yeeyo Muluku ohinootha olaihenraawe khalayi.
3 Mwa etempu yoophwanelela owo oosuweliha masu awe moorweela mwa muteko woolaleya mitthenka sooreera, miyo koothanliwa ovara muteko owo woolaleya mitthenka sooreera ni nlamulo na Muluku Nvuluxa ahu.
4 Kinoolepelani nyuwo Tito mwanaka eekhaikhai, nraahuno nroromelo nimoharu:
Oreera murima otokweene ni murettele onkhuma wa Muluku, Tiithi ni wa Kristu Yesu, Nvuluxa ahu, okhale ni nyuwo.
5 Miyo koohiñyeni oKreta weera mureherere itthu sintthuneya oreheriwa ni weera mwaathanle asitokweene a yeele eri esidade moovarihana ni miruku miyo koovanhaakani:
6 Mutokweene ontthuneya weera akhaleke mutthu oohikhalano nthowa, akhaleke mulopwana a muthiyana mmoha paahi ni anamwane awe ootheene entthuneya weera ekhaleke oowiiwelela ni erino mikhalelo sooreera, weera ehootheriweke mikhalelo soonanara ni ohiiwelela.
7 Ntoko oothanliwa ni Muluku, mutokweene ontthuneya weera ahikhalekeno mathowa, ahikhaleke mutthu oottiya maaru naari mutthu oowaakuva onyoonyiwa, naari namuhapaliwa, naari mutthu oowali naari ahikhaleke mutthu oopaka etthu weera awootothe atthu ni yootthuna ya owiiyera,
8 mene akhaleke oowaakhela aletto, oosiveliwa ni itthu sooreera, a miruku,* akhaleke mutthu a exariya, oororomeleya ni akhaleke mutthu oowiihiiha,
9 emaara onxuttihaawe, atthareke nnene masu oororomeleya a Muluku, weera awereke waalipiha* atthu akina avarelaka muteko sooxuttiha sooreera weera awereke waattaruxa ale envirikanyiha sooxuttiha sooreera.
10 Woona weera aakhala asilopwana antxipale oohiiwelela ni enuuluma ithiru, yaawo enaawoka asinkhwaaya, otepaxa wene ale ennyeserera weera atthu entthuneya wiineliwa.
11 Nyuwo muntthuneya omaaliha iyano sa atthu awo, woona weera ennavirelela onanariha imusi exuttihaka itthu soohireerela ni yootthuna weera ephwanyevo etthu.
12 Profeta mmoha a yaawo ohimme ha: “Akreta ekhalakaru anamootha, asinama ooluwa, anamatxa ni anooreesi.”
13 Tthiri onamoona ola ohimmwale ti weekhaikhai. Tivawonto nyuwo muntthuneyaanyu ovirelela waattaruxa mootepaxa weera yeetteke nnene sene munroromeloni,
14 ni muhiiweleleke ithale sa ayuda naari malamulo aatthu yaawo enhiya weettela ekhaikhai.
15 Itthu sootheene sinnaakhuleliwa wa atthu ale Muluku onwaakhulelaawe. Mene wa ale Muluku ohinwaakhulelaawe ni ehikhanleno nroromelo, khiyaavo etthu enaakhuleliwa, woona weera muupuwelo aya vamoha ni yoosuweliha ya murima aya yoonanarihiwa.
16 Awo ennahima ohoolo wa atthu ootheene weera aamusuwela Muluku, mene ni soopaka saya awo ennoonihera weera awo ennamukhootta, woona weera ti soonanara, kheniiwelela ni khemphwanela ovara muteko ori poothe wooreera.
