Aalepelinwaawe Tito 2:1-15
2 Menento, nyuwo nvireleleke wuuluma moovarihana ni sooxuttiha sa ekhaikhai.
2 Asilopwana oowuuluvala entthuneya weera yeettiheke nnene omutthu aya, ekhaleke a miruku, oolipa munroromeloni, a nsivelo ni oovilela.
3 Emoha-moharu-tho, asithiyana oowuuluvala entthuneya weera ekhalekeno mikhalelo sooreera, ekhaleke oohaapa, ehikhaleke akaporo a eviinyu ni exuttiheke itthu sooreera,
4 weera ewereke waavaha miruku asithiyana oohuuluvala weera yaasiveleke asiiyaya ni yaasiveleke anamwane aya,
5 ekhaleke a miruku, oowiisuumaaliha, weera yiilipihereke ovara miteko sa vaate vaya mwa nthiti, ekhaleke ooreera murima, ewiiweleleke asiiyaya ni yootthuna yooweera ehuulummwe moonanara masu a Muluku.
6 Emoha-moharu-tho, nvireleleke waavaha miruku amiravo weera yuupuweleke nnene,
7 evaheke ntakihero nooreera mwa itthu sootheene. Exuttiheke itthu sooreera mwa nthiti,
8 evarelaka muteko masu a ekhaikhai weera muhithorihiwe, mpakeke eyo weera anamavaanyiha yuuliwe muru ehiniphwanyanakano mathowa oonoothera itthu soonanara.
9 Akaporo ewiiweleleke mapatarawu aya* mwa itthu sootheene, yaasaaseraka moota woowaasiveliha ehaavirikanyaka.
10 Mene yoonihereke weera toororomeleya vantxipale ehiwiiyeraka, ni yootthuna weera mwa itthu sootheene weera moonihere oreera waya sooxuttiha sa Muluku Nvuluxa ahu.
11 Mweekhaikhai, oreera murima otokweene wa Muluku wohooniheriwa, weiwo onaaphwanyiha ovuluwa atthu a mikhalelo sootheene.
12 Oreera murima iwo onnanixuttiha osepa itthu sootheene soonanara sootthuna sa elapo ni weera nikhale atthu enuupuwela nnene, a exariya,* atthu emmukokhorela Muluku variyari va elapo ela.*
13 Vaavo ninwehereraahu yooweherera yoohakalaliha, yeeyo eri wooniheriwa wa ovuwa wa Muluku mutokweene ni wa Nvuluxa ahu Yesu Kristu,
14 yoowo iivaherenre wa hiyo weera anivuluxe mwa itthu sootheene sinvirikanyiha nlamulo, weera anikhalihe atthu awe oothanleya enwera ovara miteko sooreera mwa nthiti.
15 Tivawonto, nvireleleke oxuttiha itthu iya weera siwoonihereke atthu itthu soonanara moovarihana ni owera woopaka itthu iyo nyuwo mwaakhenlaanyu. Muhimuhiye mutthu ooramusakani mwaha wookhala mmiravo.
Footnotes
^ Naari: “asipwiyaya; ale enaavarelaaya muteko.”
^ Nwehe masu oowiiwanyeihiwa.
^ Nwehe masu oowiiwanyeihiwa.
