Yaalepelinwaaya Afilipi 4:1-23
4 Tivanto asinnaka, miyo kinnoosivelani ni kohinkheliwa vantxipale ni nyuwo. Nyuwo munnakihakalaliha, ni nyuwo mwa ntthuvelo naka.* Kinnawoopererani weera nvirelele okhala oororomeleya mwa Apwiya.
2 Kinnamooperera Evodia ni Sintikhe, weera ekhalekeno muupuwelo mmoharu eraayano Apwiya.*
3 Ni kinnoovekelani-tho nyuwo muri nthamwene aka oororomeleya kinvaraakano muteko vamoha, weera nvireleleke waakhavihera asithiyana ala eniilipihera ovara vamoha ni miyo muteko woolaleera mitthenka sooreera, vamoha ni Klemente ni atthu akina kinvaraakano muteko, yaawo masina aya elempwale muliivuruni ya ekumi.
4 Muhakalaleke etempu yootheene mwa Apwiya. Aani, kinnooleelani-tho: Muhakalaleke!
5 Nwoonihereke atthu ootheene weera nyuwo khaiyene mutthu munnyeserera weera itthu sipakiweke moota nyuwo muntthunaanyu.* Apwiya eri vakhiviru.
6 Muhixupeye ni etthu eri poothe. Opwaha mwa yeeyo, munvekeleke ikwaha sootheene Muluku, mmutxonttelaka weera oovaheeni miruku mwa itthu sootheene ni ikwaha sootheene mmuxukureleke.
7 Wakhala weera nyuwo munoopaka eyo, murettele wa Muluku yoowo ompwaha osuwela* wootheene wa atthu, onoosuka mirima sanyu ni minyuupuwelo sanyu mwa Kristu Yesu.
8 Vano asinna, minyuupuwelo sanyu siwehexexeke* itthu siri sa ekhaikhai, siri sootthuneya vantxipale, sa xariya, sooreera, soosiveleya, soottittimiheya, sooreera ni simphwanela ottottopeliwa.
9 Mpakeke itthu muxuttenraanyu ni miyo, mwaakhulenlaanyu, mwiiwalaanyu ni monnaanyu ni miyo. Ni Muluku a murettele onrowa okhala ni nyuwo.
10 Kinnahakalala vantxipale ni kinnaaxukurela Apwiya mwaha woowoonihera wanyu okipwattha miyo. Nnaamweera mwaakipwattha miyo, yannoothowani eparakha yoowoonihera eyo.
11 Miyo nkinhima masu ala mwaha wooweera kinhaawela nikhavihero, hooye. Kooxuttera okhala oohakalala mwa mikhalelo saka sootheene.
12 Miyo kinnawera okhala ni itthu vakhaaniini ni kinnawera okhala ni itthu sintxipale. Kooxuttera esiiri ya okhala oohakalala mwa itthu sootheene ni mwa mikhalelo sootheene, okhale okhalano yootxa naari ovoliwa etala, okhalano itthu sintxipale naari ohikhalano.
13 Miyo kookhalano ikuru soowina itthu sootheene mwaha wa ole onkivaha owera.
14 Mene, moopaka nnene mwaha wookikhavihera emaara kaathoiwalaaka.*
15 Mweekhaikhai, nyuwo afilipe moosuwela weera kikhumakaru oMasedonia nyuwo mwiiwakaru mitthenka sooreera, muloko anyu paahi okikhavihenre miyo.
16 Emaara kaaraaka oTesalonika, nyuwo mwaakirumihela itthu weera mukikhavihere mwa itthu saakithowa, khaiyene mwaapanke eyo ekwaha emoha, mene ikwaha piili.
17 Miyo, khaiyene weera kinaasaasa soovaha sanyu. Etthu kintthunaaka, ti yooweera nyuwo mwaakhele ntthuvelo ninkhumelela mwaha wa ovaha wanyu.
18 Menento, kookhalano itthu sintxipale opwaha iye kaahaawelaaka. Epafrodito akiwiiherakaru soovaha sanyu mwaakirumihenlaanyu miyo wookimalela othoiwa. Mukhalelo anyu ola, onkhala ntoko yoovaha yoowinkhela ni makeya ooreera ommusivela Muluku.
19 Nto Muluku aka, onoovarela muteko mihakhu sawe soovuwa weera oovaheeni itthu sootheene sinoothowani moorweela mwa Kristu Yesu.
20 Ovuwa wootheene avahiwe Muluku ahu ni Tiithi wa mahiku ootheene. Amem.
21 Mwaavaherere isalaamu saka ale eri oororomeleya a Muluku, eri atthareli a Kristu Yesu. Asinna eri vamoha ni miyo ennoorumihelani isalaamu.
22 Atthu ootheene oororomeleya otepaxa wene a vaate va Sesare, ennoorumihelani isalaamu.
23 Asinna, mukhalelo nyuwo munooniheraanyu, oreelihiwe ni oreera murima otokweene wa Apwiya Yesu Kristu.
