Yaalepelinwaaya Afilipi 2:1-30
2 Vano asinna, woona weera muri oowiiraana ni Kristu, woona weera munnaamaaliha ni waalipiha asinna akina mwaha woowaasivela wanyu, ni woona weera munnaakosoopa akina mwaasivelaka ni mwaamorelaka ikharari,
2 nto, wakhala weera munoopaka eyo, munookihakalaliha vantxipale. Nto mpakeke eyo weera mukihakalalihe vantxipale mooniheraka weera murino yootthuna emoharu,* nsivelo nimoharu, ni weera muri oowiiraana ni munoolikana wuupuwela.
3 Muhipakeke itthu ni yootthuna ya okuphana naari wiisoona, mene moowiiyeviha nwooneke atthu akina okhala ootthuneya woopwahani nyuwo.
4 Muhaasaaseke sootthuna sanyuru paahi, mene mwaasaaseke sootthuna sa atthu akina.
5 Mweetteke ni mweettelo yoowo aaraaweno Kristu Yesu:
6 nnaamweera owo aarinono mikhalelo ntoko sa Muluku, owo khaatthuna omwaakha Muluku otokweene awe, eyo tiiyo, okhala oolikana ni Muluku.
7 Hooye, mene owo aahiya itthu sootheene aaraaweno ni aahaakhulela okhala kaporo ni aari ntoko atthu akina.
8 Opwaha mwa yeeyo, akhalakaru ntoko mutthu, owo aahoonihera wiiyeviha otokweene ni wiiwelela mpaka okhwa, aani, okhwa vamwirini wa nihaaxero.*
9 Tivawonto, Muluku omukhalinhaawe mutokweene ni onvanhaawe otokweene opwaha masina ootheene,
10 Muluku opanke eyo weera ootheene, ekhale ale eri wiirimu, ale eri elapo ya vathi ni eri vathi va elapo emuttittimiheke* Yesu.
11 Ni atthu ootheene ontthuneya waakhulela weera Yesu Kristu Pwiya, weera avuwihiwe Muluku Tiithi.
12 Asinna oosiveleya, emaara miyo kaaraaka weiwo, nyuwo mwanniiwelela ikwaha sootheene ni vano kihikhanlaaka iwo, nyuwo munnavirelela okhala oowiiwelela. Tivawonto, mutthu ti mutthu a nyuwo avirelele wiilipihera weera avuluxiwe ni Muluku amuttittimihaka ni omoova yoowo.
13 Muluku ti yoowo onoovahani nyuwo ikuru weera nwereke omuhakalaliha owo, ni owo onnoovahani otthuna ni owera woopaka eyo.
14 Mpakeke itthu sootheene muhikhupanyaka naari onyakulihana,
15 weera nyuwo mukhaleno murima wooreera ni mukhale oohittheka, ntoko anamwane a Muluku eri oohittheka variyari va atthu a nloko nna noonanara murima ni nihimpaka itthu sooreera. Nyuwo munnaara ntoko muthuko nnaamweera mukhalaka variyari va nloko nna.
16 Nvarexexeke nnene nsu na ekumi. Hiiho, miyo kinookhalano mathowa ookihakalaliha nihiku na Kristu, kisuwelaka weera otthimaka waka ni muteko kivanraaka moowiilipihera nkivanre vasiiyoni vene.
17 Mene nnaamweera kivahiwaka ntoko makeya a yoovaha ya eviinyu weera kikhavihere muteko wa Muluku, kinnahakalala vantxipale vamoha ni nyuwo woona weera ororomela wanyu wooweerihani opaka etthu emoharu.
18 Tivawonto miyo kinwoopereraakani weera nyuwo-tho muhakalaleke vamoha ni miyo.
19 Kinweherera weera moohipisa va, Apwiya Yesu Kristu ekaakhulele omurumiha Timotiyu iwo muraanyuwo weera miyo kikhale oolipa kaakhela vale mitthenka woohima sa nyuwo.
20 Nkimmoona mutthu mukina orinono yootthuna ni okhanle ookosoopa nnene sootthuna sanyu.
21 Woona weera atthu akina awo enaasaasa sootthuna saya paahi, ohiya sa Yesu Kristu.
22 Vano, Timotiyu ola, nyuwo moosuwela weera toororomeleya, owo oovara muteko ni miyo nlaleyaka mitthenka sooreera, ntoko mwaana onvara muteko moowiilipihera vamoha ni apapawe.
23 Nto, ti yoowo kinkelaaka woorumihelani kasuwela vale etthu enkela okeereela.
24 Mweekhaikhai, kinnaroromela weera moohipisa va Apwiya enookaakhulela owa iwo.
25 Mene mwa viinaano va, kinkela woorumihelani Epafrodito, munnaka, yoowo kinvaraakano muteko ni-tho ori nakhotto a Kristu. Yoowo mwaamuruminhaanyu ntoko namitthenka anyu ni onkikhavihera mwa itthu saka sinkithowa.
26 Vano va, owo ohinkheliwa ni* ootheene nyuwo, owo ooxupeya vantxipale mwaha wooweera oosuwela weera nyuwo mohiiwa weera owo anvoreiwa.
27 Mweekhaikhai, owo aavoreiwa mpaka aahalenle vakhaaniini okhwa, mene Muluku ommorela ikharari, ohiya paahi ommorenle ikharari yooworu, mene-tho, ookimorela ikharari miyo weera kihimakeleke oriipiwa murima.
28 Tivanto kineeraaka kimurumihe owo owa wa nyuwo moohipisa va, weera mwamoona vale mukhale oohakalala ni weera oxupeya waka woohima sa nyuwo ovukuwe.
29 Mmwaakhele moohakalala ni matata meeli ntoko munwaakhelaanyu atthareli Aapwiya, ni moonihereke weera atthu ntoko owo nyuwo munnaasivela.
30 Owo aahanle vakhaaniini okhwa mwaha woovara muteko wa Kristu,* ni aahela ekumi awe veerisani weera akikhavihere miyo, woona weera nyuwo khavaawereya okhala nno kiraakawo weera mukikhavihere.
