Yaalepelinwaaya Afilipi 1:1-30
1 Miyo Paulo ni Timotiyu, akaporo a Kristu Yesu, ekaarta ela nnaalepela ale oororomeleya enkhala oFilipe yaawo eri atthareli a Kristu waahela mpuwa asitokweene enhoolela ni arumeyi ookhavihera:
2 Oreera murima otokweene wa Muluku ni murettele onkhuma wa Muluku, Tiithi ahu, ni wa Apwiya ahu Yesu Kristu, okhale ni nyuwo.
3 Ikwaha sootheene miyo kinwuupuwelaakani, kinnamuxukurela Muluku,
4 ikwaha sootheene kinoovekelelaakani ootheene nyuwo, kinnoovekelelani* moohakalala,
5 mwaha wa muteko anyu woolaleya mitthenka sooreera, ovinya nihiku noopatxera nyuwo mwiiwalaanyu woohima sa mitthenka iyo mpaka vano.
6 Miyo kinnaroromela weera Muluku onoomaliha muteko wooreera opatxenraawe ovara wa nyuwo ni onoovireleliha mpaka nihiku na Kristu Yesu ophiya.
7 Ti waxariya miyo wuupuwela moota ene yoowo woohima sa nyuwo, woona weera nyuwo muri vamurimani vaka ni ninttottela mureerelo vamoha oreera murima otokweene wa Muluku. Nyuwosa mwaakikhavihera emaara kaaraaka okateya ni emaara yoowaakiha weera naakhuleliwe olaleya mitthenka sooreera.
8 Mwaha wooweera Muluku oosuwela* moota kintthunaaka owoonani nyuwosa. Nsivelo kiraakano ni nyuwo, nnoolikana ni nsivelo Kristu Yesu onwooniheraaweni.
9 Ni kinnavirelela woovekelelani weera nsivelo nanyu neereke ovirelela waatxeerereya, vamoha ni osuwela weekhaikhai ni wiiwexexa nnene;
10 weera musuweleke othanla itthu siri sootepa otthuneya* weera muhikhaleno mulattu ni muhaakwattulihe atthu akina, mpaka nihiku na Kristu.
11 Kinnavekela-tho weera nyuwo, muttottele mureerelo miteko sootheene sooreera* Yesu Kristu onkumiheraawe anivarelaka muteko hiyo, ni eyo eneeriha ovuwihiwa Muluku ni ottottopeliwa.
12 Asinna, kintthuna weera musuwele weera mukhalelo aka woheeriha* weera mitthenka sooreera simwaramwareye vantxipale.
13 Makwaarta amwene a oRoma, nave-tho atthu akina, ahiiwa weera miyo kitthukinwe mwaha wookhala mutthareli a Kristu.
14 Vano, mwaha wa otthukiwa waka, asinna antxipale enaavarela muteko Apwiya ennalaleya masu a Muluku moolipa murima ni moohoova.
15 Ekhaikhai weera akina enlaleya woohima sa Kristu ni nrima ni otthuna ovirikanyiha. Menento atthu akina enlaleya woohima sa Kristu ni yootthuna yooreera.
16 Atthu ale emmulaleya Kristu ni yootthuna yooreera, empaka eyo mwaha wooweera awosa aasuwela weera miyo kithanlinwe weera kaakihereke mitthenka sooreera.
17 Mene atthu ale emmulaleya Kristu ni nrima ni otthuna ovirikanyiha, awosa khiyaanoono yootthuna yooreera. Etthu awo entthunaaya, waatxeerera maxupo aka va kiraaka okateya.
18 Teevi eri yookhumelelaaya? Mwa mikhalelo soomiili iya, okhale olaleya moovirikhanyiha naari olaleya ni yootthuna yooreera, onneeriha mitthenka sooreera woohima sa Kristu osuweliwa ni atthu. Etthu ela ennakihakalaliha ni kinoovirelela okhala oohakalala.
19 Mwaha wooweera koosuwela weera eyo enookumihera ovuluxiwa waka nnikhavihero na munepa wootteela wa Muluku ninvahiwaahu moorweela mwa Yesu Kristu ni mavekelo anyu ootxonttela.
20 Eyo ennavarihana ni yootthuna aka ni yooweherera aka weera nkinkela okhalano mathowa eneera ekeeriheke woona wuuliha muru. Ni kinnaroromela weera kineereke ovirelela wuuluma mootaphuwa weera miyo kinvuwihe Kristu vano, ntoko hiihaale keeraakano khalayi. Kinonvuwiha owo, naari kireene mukumi naari kikhwiiyeene.
21 Nto wa miyo, okhala mukumi kimmukhalela Kristu mene okhwa ntthuvelo* wa miyo.
22 Vano, okhala mukumi ni erutthu ela, entaphulela weera miyo kineereke ovirelela ovara muteko aka. Menento, nkisuwenle etthu yoothanla.
23 Miyo kiri ookawanyeya mwa soothanla iya piili, woona weera kinnatthuna ohiya erutthu ela weera kakhale ni Kristu, yeeyo eri etthu yootepa oreera.
24 Menento weera nyuwo muttottele mureerelo, ti wootthuneya weera miyo kivirelele okhala mukumi.
25 Tivawonto, koosuwela weera nkinkela okhwa viinaano vaava, aani, kinookhala ni nyuwo weera mwaatxeerere muteko munanvarelaanyu Muluku ni weera muhakalale mwaha wa ororomela wanyu.
26 Hiiho, miyo kakhala vamoha ni nyuwo iwo, ohakalala wanyu onimwaatxeerereya mwaha wooweera mwa atthareli a Kristu Yesu.
27 Mukhaleke moovarihana ni mitthenka sooreera woohima sa Kristu. Nto, mwa moota ene yoola, miyo kooxekureni, kihooxekureni, kineereke wiiwa weera muri oolipa ni oowiiraana ni yootthuna emoharu, weera nvirelele okhalano nroromelo woohima sa mitthenka sooreera.
28 Muhaatuthuweke* amwiittani anyu. Ohaatuthuwa wanyu* iwo, ethoonyero yoowera atthu awo enoonyaanyiwa, mene woohima sa nyuwo, etthu eyo* ethoonyero yooweera munoovuluxiwa. Ethoonyero eyo enkhuma wa Muluku.
29 Mwaha wooweera nyuwo mohaakhela eparakha, khaiyene paahi yoomuroromela Kristu, mene-tho ya ohaawa mwaha wa yoowo.
30 Nyuwosa munviriha maxupo mamoharu yaawo nyuwosa mukonnaanyu kivirihaka, ni mpaka vano yaawo nyuwo muniiwaanyu weera kinnaviriha.
