Ekaarta yanaaveeli ya Pedru 3:1-18
3 Asinna oosiveleya, ela ekaarta yanaaveeli kinoolepelaakani. Ntoko hiihaale ekaarta yoopatxera koolepenlaakani, mpuwa mwa ekaarta ela, miyo kinoovekelani weera nvareleke nnene muteko wuupuwela wanyu, ni kinwuupuxerani itthu nyuwo musuwenlaanyu.
2 Weera muupuweleleke masu yaahimmwale* woopatxerani ni maprofeta oororomeleya ni malamulo a Pwiya Nvuluxa, yaawo yaahimmwale moorweela mwa arummwa anyu.
3 Etthu muntthuneyaanyu osuwela ti yooweera: Mahiku oomalihera, enookhumelela atthu eneera eveeheke itthu sooreera ni eneereke opaka itthu soonanara entthunaaya mwaneene aya.
4 Awo eneereke okoha yeeraka: “Owo aalaihera weera aamoowa, vanonto ori woowi? Nnoona weera khiyaavo etthu etxentxale, ovinyera nihiku makholo ahu ekhwiiyaaya, itthu sinnavirelela okhala hiiho enexa ntoko saaraayano ovinyera elapo epattuxiwakaru.”
5 Moolakela, awosa khentthuna wuupuwelela ekhaikhai ela, weera: ovinyera khalayi, yaakhala erimu ni weera moorweela mwa masu a Muluku etthaya yaamwalanyihiwa ni maahi, variyari va maahi;
6 nto, itthu sene seiya saaweerinhe atthu a etempu ele onyaanyiwa, eyo yeereñye vaavo maahi yaakhunenlaaya* elapo yootheene ya vathi.
7 Mene, moorweela mwa masu mamoha-moharu, erimu ni elapo nnoonaahu vano, yohiiyaatheriwa weera yanyaanyiwe ni mooro nihiku noothorihiwa atthu oonanara murima ni onyaanyiwa waya.
8 Asinnaka oosiveleya, muhittiwale weera: vamaithoni va Yehova,* nihiku nimoha ninlikana ni iyaakha miili ni iyaakha miili, nihiku nimoha.
9 Yehova* khampisa okwanihera yoolaihera awe ntoko atthu akina enuupuwelaaya, mene owo onoopixerani murima nyuwo mwaha wooweera khantthuna weera naari mutthu mmoha mano anyaanyiwe, mene ontthuna weera atthu ootheene ettharuwe.
10 Nihiku na Yehova* ninkela owa ntoko namwiiya, nihiku nene nenno erimu enoolakaseya ni oruma otokweene, mene itthu sootheene wiirimu ni elapo ya vathi sinooviha ni sinootothowa, elapo ni itthu sootheene siri mwemmo sinimooniheriwa.*
11 Vano, woona weera itthu sootheene iya sinkela otoloxiwa, muupuwele: omutthu heeni nyuwo muntthuneya anyu okhalano? Muntthuneya weera mukhaleke mutthu ompaka itthu sooreera nave mpakeke itthu sinoonihera weera nyuwo toororomeleya wa Muluku,
12 nwehereraka ni muupuwelaka* nihiku na Yehova.* Nihiku nene nenno, erimu enkela onyaanyiwa ni mooro ni itthu siri mwemmo ni vathi sivinheene vantxipale sinkela otothowa.
13 Mene yookhala erimu enyowani ni elapo ya vathi enyowani yeeyo ninwehereraahu moovarihana ni yoolaihera awe, ni mmo enookhalamo exariya.
14 Vano asinnaka oosiveleya, woona weera munnaweherera itthu iya, mpakeke ele munweraanyu weera Muluku oophwanyeeni mureene ootteela, oohikhalano mikhalelo soonanara ni mureeneno onthamwene wooreera ni Muluku ni murettele.
15 Opwaha mwa yeeyo, mooneke opixa murima wa Apwiya ahu ntoko etthu entaphulela ovuluwa, ntoko hiiho munnihu oosiveleya Paulo oolepenlaaweni moovarihana ni osuwela aavahinwaawe ni Muluku.
16 Mweekhaikhai, ikaarta sawe sootheene oolepa itthu iya, mene itthu ikina olempaawe ti sooxupa wiiwexexa, ale ehinsuwela* nnene ni ale ehilimpe mmuupuweloni mwaya ennananariha itthu iyo ntoko hiihaale ennanarihaaya Soolepa ikina, yeerelaka onyaanyiwa.
17 Asinnaka oosiveleya, vanonto musuwenlaanyu itthu iya varaatxiru, mwiikosoopeke weera muhithweelelihiwe ni soopaka sa anamattheka ni weera muhimore nipuro noolipa mweemenlaanyu.
18 Moovirikana ni eyo, mukhaleke weera mwaakhele oreera murima otokweene ni osuwela wa Pwiya ahu ni Nvuluxa ahu Yesu Kristu. Owo avuwihiwe vano ni mahiku ootheene. Amem.
