Ekaarta yanaaveeli ya Pedru 2:1-22
2 Hiiho ntoko yaakhanlaaya maprofeta oowootha variyari va muloko, enookhala-tho anamaxuttiha oowootha variyari vanyu, awo enookumihera mweelavilavi ittiini sineera sinanarihe nroromelo nanyu, mpaka awo enoomukhootta ole aavulunxe. Nto mwaha woopaka eyo, awo enoonyaanyiwa moowaakuveya.
2 Ni atthu antxipale enoorowa otthara mukhalelo aya woonanara woohoona wuuliha muru.* Ni mwaha wa yaawo, atthu eneereke wuuluma moohireerela ephiro ya ekhaikhai.*
3 Nave-tho, mwaha wa ohikwaneya waya, awo enookela oweererani nyuwo ni masu oowootha. Mene othorihiwa waya olamulinwe khalayi ene, khompisa ophiya. Moohihovela, onyaanyiwa waya onimweereya.
4 Mweekhaikhai, Muluku khoovelenle* ottaruxa malaika yaatthenke, menento owo atthunkeene* mweepiphini aavonyera mukateya yiitthaniwa Tartaro,* ewehereraka othorihiwa.
5 Nave-tho, owo khoovelenle* ottaruxa elapo ya khalayi, mene anvuluxa Nowa namalaleera a exariya vamoha ni atthu seete, emaara yeeyo aarupihenlaawe epula ya mirupi elapo ya vathi aanyaanyaka atthu oonanara murima.
6 Nave-tho, owo aattaruxa esidade ya oSodoma ni oGomora atatuxaka okhala ettuura, hiiho oohelela ethoonyero etthu enkela oweereela atthu empaka itthu soonanara woohima sa itthu sinkela weereya muhoolo.
7 Menento owo, anvuluxa Loti naxariya, yoowo aathanana mwaha wa mikhalelo soonanara sinoonihera ohoona wuuliha muru* sa anamattheka.
8 (Aani, mulopwana ole a exariya, emaara aakhalaawe variyari va atthu ale oonanara murima, annoona moota awo yaakhalaaya ni anniiwa itthu awo yuulumaaya. Hiiho, owo wannamuriipa murima mahiku ootheene.)
9 Tivawonto, Yehova* oosuwela waavuluxa mmaxuponi* atthu ale emmukokhorela, mene atthu ale ehikhanle anaxariya owo oowiiyaathera weera yanyaanyiwe* nihiku noothoriha,
10 otepaxa wene ale enaasaasa onanariha irutthu sa atthu akina ni khenaattittimiha ale enlamulela.
Atthu awo, toohoova, oowiisoona ni khenoova owuuluma moonanara atthu ale enttittimihiwa ni Muluku.
11 Mene, nnaamweera malaika ereeneno ikuru ni owera otokotoko waapwaha awo, khenwoothera ni khenaaveeha atthu awo enxuttiha itthu soowoothiwa, mwaha wooweera malaika awo ennamuttittimiha Yehova.*
12 Atthu ala ennuuluma moohireerela itthu ehisuwenlaaya, enkhala ntoko asinama ehinuupuwela, yaawo empaka itthu mwaha wa epakeliwo aya, eñyareliwa ovariwa ni wiiviwa. Itthu soonanara awo empakaaya sinooweeriha onyaanyiwa.
13 Ni awo enoottaruxiwa mwaha wa itthu soonanara empakaaya.
Awo ennoona okhala wooreera okwanihera sootthuna saya sa erutthu nsuwa nreene vamuru, eri ntoko malepa yaawo ennanariha maloko, ni onnaasivela vantxipale oxuttiha itthu soowoothiwa etempu entxaaya efeesta ni nyuwo.
14 Awo ennatthuna vantxipale oraruwa.* Awosa khenhiya opaka soottheka ni ennaawoka atthu oohilipa. Murima aya woosareya ohikwaneya.* Awosa enoottaruxiwa ni Muluku.
15 Awo aahiya weetta mphiro wooreera ni aahapuxiwa. Ettharaka mphiro wa mwaana a Beyori, eyo tiiyo, Balamu, owo aapaka etthu yoonanara mwaha wooweera annatthuna waakhela nlivo moorweela mwa opaka itthu soohixariya,
16 mene aattaruxiwa mwaha wootupha nlamulo wa etthu ele yaari yooreera. Mwaamunama onteexa miritti ni ohinuuluma, aahuuluma ni nsu na mutthu, amuhiihaka hiiho, profeta ole otthara ephiro yoonanara.
17 Awo enlikana ni ihime soohikhalano maahi, ni mahutte eneettihiwa ni epheyo yoowuupa, ni awo ahiiyaatheriwa nipuro nootepa oriipa.
18 Wuuluma waya woowiisoona khonvareleya muteko ennatetheerela sootthuna sa erutthu ni soopaka soohoona wuuliha muru.* Eweerihaka hiiho atthu otthikela otthuna itthu soonanara. Ni ennaawoka weera epakeke itthu soonanara, seiyo ehiñyaaya.
19 Anamaxuttiha oowootha ennaalaihera atthu awo weera enimwaavuluxa, mene awosa asineene aya akaporo a itthu soonanara. Woona weera, wakhala weera mutthu onnanwina mutthu mukina, mutthu owo owininwe onnakhala kaporo a mutthu ole owinne.
20 Vano, waari weera awo ekhaviheriwaka ni osuwela wa ekhaikhai wa Apwiya ni Nvuluxa ahu Yesu Kristu, aahiya opaka itthu soonanara sa elapo, mene eniivoleihera veeli opaka itthu sene seiya, itthu iyo, sinnaalamulela awo, mwa hiiho, mamalihero aya tootepa oxupa opwaha woopatxerani.
21 Waarowa okhala wooreera awo ohisuwela nnene ephiro ya exariya ni ohaakhela nlamulo na Muluku. Ohiya osuwela avinyaka ohiya weettela.
22 Wa yaawo, nookwanela nxiripulo nna nneera: “Mwalapwa orapheñye, ootthikela otxa marapheyo awe, ni ekuluwe erapihiwakaru, yootthikela wiisirikela matope.”
Footnotes
^ Ni Ekereku: “asélgeia.” Nwehe masu oowiiwanyeihiwa.
^ Naari: “Muluku.”
^ Naari: “khuurenle.”
^ Apaale: “ahenleene mulittini mwa.”
^ Nwehe masu oowiiwanyeihiwa.
^ Naari: “khuurenle.”
^ Ni Ekereku: “asélgeia.” Nwehe masu oowiiwanyeihiwa.
^ Naari: “mooweereriwani mwaya.”
^ Ni Ekereku: “yathikiliwe.”
^ Naari: “Awosa aakhalano maitho oosareya otthuna oraruwa.”
^ Naari: “ennaxuttiha mirima saya weera sikhaleke soohikwaneya.” eyo tiiyo, nrima.
^ Ni Ekereku: “asélgeia.” Nwehe masu oowiiwanyeihiwa.
