Ekaarta yanaaveeli ya Pedru 1:1-21
1 Miyo Pedru, kaporo ni murummwa a Yesu Kristu, kinoolepelani ekaarta ela nyuwo murino nroromelo nimoha-moharu ntoko hiyo nraahuno nootepa otthuneya moorweela mwa exariya ya Muluku ahu, ni ya Nvuluxa ahu Yesu Kristu:
2 Ninnanvekela Muluku weera awoonihereni vantxipale oreera wawe murima otokweene ni ookhavihereni okhalano murettele woowaatta, mwaha woomusuwela wanyu nnene Muluku ni Yesu Pwiya ahu.
3 Mwaha wa ikuru sa Muluku, noovahiwa itthu sootheene ninhaawelaahu weera nikhaleno ekumi ni weera nimukokhorele Muluku, naakhenle itthu iya mwa mahala, mwaha wooweera noomusuwela mweekhaikhai ole oniitthanne mwaha wookhala Muluku oovuwa ni a exariya.*
4 Moorweela mwa itthu sene seiya, Muluku oonivaha* masu awe yaawo eri ootepa otthuneya ni ooreera, ni moorweela mwa yaawo nyuwo pooti okhalano mikhalelo sa Muluku. Owo opanke eyo mwaha wooweera nootthawa mikhalelo soonanara sa elapo ela sinkumihera sootthuna soonanara.
5 Tivawonto, mwiilipihereke weera mpakeke itthu sootheene munweraanyu weera mwaatxeerere nroromelo nanyu, ni nroromelo nanyu mwaatxeerere exariya;* ni exariya anyu* mwaatxeerere osuwela wanyu ekhaikhai;
6 osuwela wanyu ekhaikhai, mwaatxeerere wiihiiha, ni wiihiiha wanyu, mwaatxeerere ovilela; ovilela wanyu, mwaatxeerere omukokhorela wanyu Muluku;
7 omukokhorela wanyu Muluku, mwaatxeerere waasivela wanyu asinna; waasivela wanyu asinna, mwaatxeerere waasivela wanyu atthu ootheene.
8 Mwaha wooweera, wakhala weera itthu iya sinookhala mwa nyuwo ni soosareya, nyuwo muneereke opaka itthu moovarihana ni osuwela wa ekhaikhai wa Pwiya ahu Yesu Kristu, ni muneereke ovirelela okela vahoolo ni okumihera mikhalelo* sooreera.
9 Mutthu ohikhanleno mikhalelo iya, owo khanoona, ooputiha maitho awe weera ahooneke waara,* ni oottiwala moota Muluku otteelinhaawe soottheka sawe sa khalayi.
10 Tivawonto asinna, mpake ele munweraanyu weera mukhale moovarihana ni wiitthaniwa wanyu ni yoothanlaanyu, mwavirelela okhalano mikhalelo* iya, nroromelo nanyu khaniwa ntthikela ottuli.
11 Mweekhaikhai, nyuwo mwapaka eyo, munimwaakhela mareeliho mantxipale, naari neere, munimwaakhuleliwa ovolowa Moomweneni woohimala wa Pwiya ahu ni Nvuluxa ahu Yesu Kristu.
12 Tivawonto, nnaamweera nyuwo musuwenleene nnene sene itthu iya ni mweettelaka ekhaikhai eri mwa nyuwo, yootthuna aka owuupuxerani ikwaha sootheene itthu iya.
13 Nto, vaava kiraakano erutthu ela erino makhuva ni ephome,* kinnoona okhala wooreera owuupuxerani-tho itthu iya.
14 Koosuwela weera erutthu ela* kiraakano, khenkela okhala mahiku mantxipale, ntoko hiiho Apwiya ahu Yesu Kristu ekilenlaaya* nnene sene.
15 Kinoopaka ele kinweraaka weera kapwaha vale, muhaleke muupuwelelaka asineene anyu itthu iya.
16 Emaara yeeyo noosuwelihaahuni owera ni owa wa Apwiya ahu Yesu Kristu, khanoosuwelihani nivarelaka muteko sooweereya soowootha sinkumiheriwa mwa miruku ni atthu, mene noolenleni itthu nonnaahu* sa otokweene awe.
17 Owo ohaakhela nttittimiho ni ovuwa onkhuma wa Muluku, Tiithi, emaara yeeyo ovuwa otokweene wa Muluku waamulenlaaya masu ala:* “Ola Mwanaka, oosiveleyaxa, mwa yoowo kinnahakalala.”
18 Aani, hiyo naahiiwa masu ala ekhumaka wiirimu emaara naaraahu vamoha ni yoowo vamwaako woothanliwa ni Muluku.
19 Tivawonto, ninroromelaahu ni murima ahu wootheene weera itthu sootheene Muluku ohimmaawe sinookwanela. Munnapaka nnene wiiwelela itthu iya. Ni vamurimani vanyu, masu ala entthuneya weera ekhaleke ntoko muthuko onaara nipuro nri epiphi, (nvireleleke opaka eyo mpaka oxa ni mpaka okhuma ethenyeeri enkhuma oyaaka nooxa).
20 Opwaha mwa yeeyo, musuwele weera khiyaavovo eprofesiya ya Soolepa ekumiherinwe ni muupuwelo wa atthu.
21 Mwaha wooweera eprofesiya khetonko okumiheriwa ni atthu, mene atthu yuulumme masu a Muluku, moovarihana ni moota yeettihiwaaya ni munepa wootteela.
Footnotes
^ Naari: “mikhalelo sooreera.”
^ Naari: “oonivaha mwa mahala.”
^ Naari: “mikhalelo sooreera.”
^ Naari: “mikhalelo sanyu sooreera.”
^ Naari: “soowiima.”
^ Apaale: “toohoona naari teevaasi.”
^ Naari: “opaka itthu.”
^ Ni Ekereku: “etenta, naari mukottha.”
^ Ni Ekereku: “etenta, naari mukottha ola.”
^ Naari: “ekisuwelinhaaya.”
^ Naari: “nihelenlaahu onamoona.”
^ Ni Ekereku: “nsu nna aaleeliwa.”
