Ekaarta yoopatxera ya Pedru 4:1-19
4 Woona weera Kristu aahaawa weerutthuni, nyuwo-tho mwiireherere weera muupuweleke ntoko Kristu, mwaha wooweera mutthu onhaawa oohiya opaka soottheka,
2 ni yootthuna weera mukhaleke mpakaka yootthuna ya Muluku etempu yootheene muraanyuno ekumi, aani, ohikhala moovarihana ni sootthuna sa atthu.
3 Khalayi mooviriha etempu yintxipale mpakaka sootthuna sa mulaponi, emaara yeeyo mwaakhalaanyu mpakaka itthu soowuuliha muru,* mpakaka itthu soonanara, muhapaliwaka, mutxaaka ifeesta soohireerela, owuraxa ni okokhorela miluku seethiru.
4 Vano awo eri ootikhiniheya ni nyuwo, mwaha wooweera khamuneettela mukhalelo woonanara vamoha naawo, tivawonto awo, enwuulumaayani moohireerela.
5 Menento atthu awo enoorowa othorihiwa ni yoole ori oolikaneene waathoriha atthu akumi ni atthu ookhwa.
6 Tivawonto mitthenka sooreera elaleerinwaaya-tho atthu ookhwa, weera nnaamweera ethorihiwaka ntoko enthorihiwaayano atthu, awo ewere okhala ni ekumi yeettihiwaka ni Muluku.*
7 Mene wohaattamela omala wa itthu sootheene. Tivawonto, mukhale a miruku ni mukhale oowehaweha mpakaka mavekelo.
8 Nto, opwaha mwa itthu sootheene, musivelaneke mukina ni mukhwaawe, woona weera nsivelo ninnakhuneela soottheka sintxipale.
9 Mwaakhelaneke mukina ni mukhwaawe woohikhupanya.*
10 Moovarihana ni mukhalelo mutthu aakhenlaawe, avareleke muteko mukhalelo owo weera aakhavihereke atthu akina ottottela mureerelo oreera murima otokweene wa Muluku.
11 Waari weera mutthu onnuuluma, uulumeke ntoko mutthu onlaleya mitthenka sa Muluku; waari weera mutthu murumeyi, opakeke ntoko mutthu onlipa paahi ni ikuru sa Muluku owo onvahaawe, weera mwa itthu sootheene Muluku avuwihiwe moorweela mwa Kristu Yesu. Ovuwa ni owera ti wawawe wa mahiku ootheene. Amem.
12 Oosiveleya, muhitikhiniheye ni sooweereriwa sooxupa munvirihaanyu ntoko enweereelani etthu muhisuwenlaanyu.
13 Woona weera munviriha maxupo mamoha-moharu a Kristu, nyuwo muntthuneya weera nvireleleke okhala oohakalala weera emaara owo onkelaawe ovuwihiwa muhakalale ni mutteeliwe murima vantxipale.
14 Wakhala weera nyuwo munveehiwa* mwaha wa nsina na Kristu, nyuwo mutthu oohakalala, mwaha wooweera eyo ennoonihera weera nyuwo mookhalano munepa wa ovuwa, eyo tiiyo, munepa wa Muluku.
15 Menento nkintthuna weera naari mmoha a nyuwo ahaaweke mwaha wooweera namwiiva, namwiiya naari ompaka itthu soonanara naari onsiveliwa wiivoleihera nyaha sa atthu akina.
16 Mene wakhala weera mutthu onnahaawa mwaha wookhala mukristu, ahuuliweke muru, mene avireleleke onvuwiha Muluku avirelelaka okhala ntoko mukristu.
17 Woona weera ela, etempu yaathanlelinwe weera othoriha opatxere mmulokoni.* Vanonto, waari weera onkela opatxera ni hiyo, enkela oweereela eheeni atthu ale ehiniiwelela mitthenka sa Muluku?
18 Wakhala weera mutthu axariya ontthuneya wiilipihera weera avuluxiwe ni Muluku, etthu heeni enkela weereya ni atthu ale oonanara murima ni anamattheka?
19 Tivawonto, ale enhaawa mwaha woopaka yootthuna ya Muluku, evireleleke opaka nnene sene, eyo tiiyo, opaka itthu sooreera. Ni ehiyeke ekumi aya yeettihiwaka ni Mpattuxa yoowo ori oororomeleya.
