Ekaarta yoopatxera ya Pedru 2:1-25
2 Tivawonto, muhiye owoka, wootha, nrima, waapa ni itthu sootheene soonanara.
2 Hiihaale ntoko anamwane ooyariwa viinaanoru entthuneyaaya waamwa nipele, nyuwo-tho, munnuwihereke mukhalelo anyu woosiveliwa ni masu a Muluku weera moorweela mwa yaawo mwavuluwe. Masu a Muluku eri ntoko eleite yoohipwexeereriwa etthu.
3 Woona weera mookhalano mathowa enoonihera weera Apwiya tooreera murima.
4 Mwaha wooweera nyuwo moomwaattamela owo ori nluku nrino ekumi, nenno atthu yaakhonttaaya, mene Muluku oomuthanla ni owo tootthuneya vamaithoni va Muluku.
5 Nyuwo ntoko maluku makumi, munimweera olipihiwa ntoko empa yoomunepani weera mwakhale anamakeya ootteela, ni yootthuna weera munvaheke makeya oomunepani onaakhuleliwa ni Muluku moorweela mwa Yesu Kristu.
6 Yoolepa enhima weera: “Nkoonani! oSiyoni kinoohiyawo nluku naka noothanliwa, nluku nootthuneya nenno ninkela omulipiha alserse,* yoole ori mutthu onkela ororomela nluku nno, khawa uuliwa muru.”
7 Nto, owo tootthuneya wa nyuwo muri atthu oororomela. Mene wa atthu ale oohiroromela, “nluku anamateka yaakhonttaaya, naakhalihiwa nluku noolipiha empa”,
8 ni “nri nluku nookwattuliha ni mwala wootthekiha”. Awosa ennakwattuliwa mwaha wooweera kheniiwelela nsu. Awo ethanliwe weera ekhaleno emalihero ene yeeyo.
9 Nyuwosa nloko noothanliwa, anamakeya eekhaikhai, “nloko nootteela, atthu oothanleya, weera mulaleye mikhalelo sootepa oreera” sa Ole owiitthanneni weepiphini ooroihakani moowaarani Mwawe.
10 Mwaha wooweera khalayi, nyuwo khamwaakhanle nloko nawe, menento vano, nyuwo nloko na Muluku. Khalayi nyuwo khamwaakosoopiwa moomoreliwa ikharari, menento vano, nyuwo moomoreliwa ikharari.
11 Asinna oosiveleya, kinnawoopererani ntoko anamawa ni atthu muneera ovira elapo ela weera nvireleleke okhootta sootthuna sa erutthu anyu seiyo sinwana ni nyuwo.
12 Nvireleleke woonihera mikhalelo sooreera variyari vaatthu a mulaponi weera nnaamweera awo ewootherakani okhala atthu oowuuma murima, yooheleleni onamoona wooreera mwaha wa miteko sanyu sooreera, ni yookhumelela aya, awo envuwihe Muluku etempu onkelaawe owa weera athorihe.
13 Mene mwaha wa nsivelo muraanyuno ni Apwiya, nwiiweleleke anamalamulela ootheene, mwene ntoko mutokweene anyu,
14 nwooneke anamalamulela ntoko atthu erumihinwe weera yaattaruxeke atthu empaka itthu soonanara ni waattittimiha atthu empaka itthu sooreera.
15 Yootthuna ya Muluku ti yooweera ni mapakelo anyu itthu mooreera, nyuwo nwere waamaaliha* atthu oohikhalano miruku ni enuuluma itthu soohireera.
16 Mukhaleke atthu ootaphuwa, muhivarelaka muteko otaphuwa wanyu iwo weera mpakeke etthu yoonanara, mene nvarelaka weera mukhale akaporo a Muluku.
17 Mwaattittimiheke atthu a mikhalelo sootheene, mwaasiveleke asinna a elapo yootheene ni murima wootheene, mmooveke Muluku, mwaattittimiheke amwene.
18 Akaporo ewiiweleleke mapatarawu aya* ni yaattittimiheke moota awo emphwanelaaya, ohiya paahi ooreera murima ni enookosoopani nnene, mene mpaka ale ooxupa.
19 Muluku onnahakalala ni atthu ale eniilipihera okhalano yoosuweliha ya murima yooreera ohoolo wawe, envilela maxupo envirihaaya nnaamweera awo ehitthenke etthu.
20 Nyuwo mummaniwa mwaha woottheka ni munavilela, mumphwanya eheeni? Mene, wakhala weera nyuwo munvilela ohaawa mwaha wooweera mumpaka itthu sooreera, eyo ennamuhakalaliha Muluku.
21 Mweekhaikhai, Muluku ohoothanlani weera mukhaleno ekumi moota ene yoola, woona weera Kristu mwaneene oohaawa mwaha wa nyuwo ni owo oohiya ntakihero nooreera weera hiyo ntthareke moororomeleya mavalo awe.
22 Owo khaatthenke naari mmwaanoni mwawe khayaaphwanyinwe masu oowootha.
23 Emaara aaruwaniwaawe, owo khaakhula ni oruwana. Emaara aahasuliwaawe, owo khaawoopopiha atthu mene aahiya mmatatani mwa Ole onthoriha mwa exariya.
24 Mweerutthuni mwawe owo ookuxa soottheka sahu emaara yeeyo aakhomelinwaawe vamwirini, opanke eyo weera anivuluxe mwa soottheka weera nikhale akumi nipakaka itthu sooreera. “Ni ohaawa owo ovirinhaawe, nyuwo moolamihiwa.”
25 Mwaha wooweera nyuwo mwaari ntoko iputtiputthi soothweelela, menento vano, mutthikele wa mukukhuli anyu ni wa ole onwehaweha ikumi sanyu.
