Ekaarta yoopatxera ya Pedru 3:1-22
3 Vamoha-moharu, nyuwo asithiyana ootheliwa, nwiiweleleke asiiyanyu ni yootthuna weera asiiyanyu awo ehiniiwelela nsu na Muluku ekhale oowiiwelela nsu, nyuwo muhitthuneyaka wuuluma, mene yiiwelele nsu mwaha woowoona moota mumpakaanyu itthu.
2 Eyo enkela weereya wakhala weera enimoona mapakelo anyu itthu sooreera ni waattittimiha wanyu weekhaikhai.
3 Ophwaneliwa* wanyu, ohikhaleke ni itthu sa omokoni; ntoko otthava maihi, owara itthu sa ewooru naari ikuwo soorikaxa.
4 Mene oreera wanyu okhaleke wa ele eri vamurimani, tivawonto, mukhaleno* mukhalelo woomaala ni woowiiyeviha. Iya siri itthu sootepa otthuneya vamaithoni va Muluku. Opwaha mwa yeeyo, oreera moota nno khonuntta.
5 Ophwaneliwa* wene ti wenno yaaraayano athiyana oororomeleya akhalayi yanweherera Muluku ewiiwelelaka asiiyaya,
6 ntoko Sara, yoowo aamwiiwelela Abrahamu, amwiitthanaka apwiya. Nyuwo-tho, munookhala mwaana mwaamuthiyana a Sara wakhala weera munoovirelela opaka itthu sooreera ni ohiihiya nwiniwaka ni woova.
7 Vamoha-moharu, nyuwo mulopwana oothela, mwaakosoopeke* amwaarinyu nwiiwexexaka* awo, mwaattittimiheke ntoko hiihaale mwaakelaanyu okosoopa mwaapu woowaakuva ophweeya, mwaha wooweera awo enkela waakhela ekumi vamoha ni nyuwo mwaha wa oreera murima otokweene wa Muluku. Mpakeke eyo weera Muluku ahihiye wiiwa mavekelo anyu.
8 Tivanto, mukhaleke oowiiraana mmuupuweloni,* mwiiheleke nipuro naatthu akina, musivelaneke ntoko asinna, mmorelaneke ikharari ni mwiiyeviheke.
9 Muhiliveke yoonanara ni yoonanara, naari mwaruwaniwa muhitthikiheke ni oruwana. Opwaha mwa yeeyo, mweereke omureeliha mutthu owo, woona weera mwiitthanelinwe weera mpakeke itthu sene seiyo ni yootthuna weera muhiyeriwe mareeliho.
10 “Ole onsivela ekumi awe ni ontthuna okhala oohakalala, ontthuneya weera akosoopeke nlumi ni itthu soonanara ni eyano ehuulumeke itthu soowootha.
11 Mutthu owo asepeke opaka itthu soonanara ni apakeke itthu sooreera. Owo aasaaseke murettele ni iilipihereke okhalano murettele ni atthu akina.
12 Maitho a Yehova* eri ni anaxariya ni maaru awe enniiwa mavekelo ootxonttela aanaxariya awo, mene Yehova* onnaarera ettuli atthu ale empaka itthu soonanara.”
13 Vanonto, taani onkela woopakelani itthu soonanara, wakhala weera nyuwo munniilipihera opaka itthu sooreera?
14 Mene, nnaamweera nyuwo muhaawaka mwaha wa exariya nyuwo munrowa okhala oohakalala. Tivawonto, muhoove ele awo enoovaaya* naari muhikhale ooxupeya.
15 Musuwele vamurimani vanyu weera Kristu Pwiya ni owo tootteela. Mukhaleke oolikaneene weera mwiisaakihe ohoolo wa mutthu ori poothe oneera ookoheeni woohima sa yooweherera anyu, mene mpakeke eyo moomaaleleya ni mwa nttittimiho.
16 Mukhaleno yoosuweliha ya murima yooreera vamaithoni va Muluku, weera mwa moota woonanara ori poothe atthu eneeraaya ewuulumekeni, awo yooneke wuuliha muru mwaha wa mikhalelo sanyu sooreera ntoko atthareli a Kristu.
17 Nto wakhala weera ti yootthuna ya Muluku ni owo onnaakhulela, ti wooreera ohaawa mwaha woopaka itthu sooreera, ohikhanle ohaawa mwaha woopaka itthu soonanara.
18 Tthiri Kristu yoowo ori naxariya ohookhwa ekwaha emoha wa mahiku ootheene mwaha wa soottheka sa atthu ehikhanle anaxariya weera aaroihe wa Muluku. Owo ohiiviwa ntoko namattheka, mene ookhalihiwa mukumi ni erutthu ya omunepani.
19 Ni erutthu ya omunepani, owo aarowa wiirimu olaleera mitthenka soothoriha, malaika yaari ootthukiwa.
20 Malaika awo, khayaamwiiwelenle Muluku emaara yeeyo owo anwehereraawe moopixa murima Nowa apakaka nikula nenno naavulunxe atthu vakhaaniini, eyo tiiyo, atthu 8 va epula ya mirupi.
21 Etthu enlikanaaya eyo-tho, ennoovuluxani nyuwo, naari neere, opatiso moorweela mwa ovinyererihiwa wa Yesu Kristu, (opatiso khaiyene orapiha itthu soonanara sa erutthu mene onoonihera onvekela Muluku ni yoosuweliha ya murima yooreera).
22 Arookaru wiirimu, owo okilanthi moono woolopwana wa Muluku ni malaika, anamalamulela ni owera ennamwiiwelela.
Footnotes
^ Naari: “Oreera.”
^ Ni Ekereku: “mwiireerihe.”
^ Naari: “oreera.”
^ Naari: “nvireleleke okhala ni.”
^ Naari: “moovarihana ni osuwela ni wiiwexexa.” Naari mwaapwatthaka ni mooniheraka weera munnawiiwexexa.
^ Naari: “ootheene nyuwo muupuweleke moota mmoha.”
^ Apaale: “muhooveke soowoopopiha saya.”
