АЙТИНГ-ЧИ, сиз Тангри Яҳовага ибодат қиласизми? ~ У жуда ҳам буни хоҳлайди. Ибодат — Худо билан гаплашиш дегани. Исо тез-тез осмондаги Отаси билан гаплашиб турарди. Бир марта Исо Худо билан гаплашиш учун ёлғиз қолишни хоҳлади. Муқаддас Китобда айтилишича, бир куни у «ибодат қилиш учун тоққа чиқди. Кечгача у ерда ёлғиз қолди» (Матто 14:23).

Сиз қаерда ёлғиз қолиб, Тангри Яҳова билан гаплашишингиз мумкин? ~ Балки сиз буни кечки пайт, ухлашдан олдин қила оларсиз. Исо ҳам шундай деган: «Сиз эса ибодат қилаётганингизда ўз хонангизга киринг ва эшикни ёпиб, яширин бўлган самовий Отангизга ибодат қилинг» (Матто 6:6). Сиз-чи, ҳар кеча ухлашдан олдин Яҳовага ибодат қиласизми? ~ Бундай қилишингиз зарур.

Шунингдек, Исо бошқа  одамлар билан бирга бўлганда ибодат қиларди. Дўсти Лазар ўлганда, Исо унинг қабри ёнида бошқалар билан бирга ибодат қилган (Юҳанно 11:41, 42). Бундан ташқари, Исо шогирдлари билан бирга йиғилганда ҳам ибодат қиларди. Сиз-чи, ибодат қилинадиган жойларга, яъни йиғилишларга борасизми? ~ Одатда у ерда катта кишилар ибодат қилишади. Уларнинг нима деяётганига диққат қилинг, чунки улар сизнинг номингиздан ҳам Худога гапиришади. Кейин сиз ибодатнинг охирида «омин» дейишингиз мумкин. «Омин» сўзи нимани англатишини биласизми? ~ Бу дегани, ибодат сизга ёқди ва сиз айтилган сўзларга розилик билдиряпсиз ҳамда ибодатингизда ҳам шуларни айтган бўлардингиз.

Яна Исо овқат ейишдан олдин ибодат қиларди. У овқат учун Яҳовага миннатдорлик билдирарди. Сиз-чи, овқат ейишдан олдин ибодат қиласизми? ~ Овқат ейишдан олдин ибодатда Яҳовага раҳмат айтиш яхши. Дастурхон олдида ҳаммаларингиз йиғилганингизда, катталардан бири ибодат қилса керак. Аммо ёлғиз овқатланганингизда-чи? Ёки сиз Яҳовага раҳмат демайдиганлар билан бирга тушлик қилаётган бўлсангиз-чи? ~ Шунда сиз ўзингиз ибодат қилишингизга тўғри келади.

Ҳар доим ҳам овоз чиқариб ибодат қилиш керакми? Ёки Худойимиз Яҳова ичимизда айтилган ибодатни ҳам эшитадими? ~ Бунга жавоб олиш учун келинг, Нахимиё пайғамбар  билан юз берган воқеани кўриб чиқайлик. У Яҳованинг хизматчиси бўлиб, Форс шоҳи Ахашвераш саройида ишларди. Бир куни Нахимиё роса хафа бўлди. Чунки у ўз халқи яшаган пойтахтнинг, яъни Қуддус шаҳрининг деворлари бузилганини эшитди.

Шоҳ Нахимиёдан нима учун хафа бўлганини сўраганда, Нахимиё жавоб беришдан олдин ичида ибодат қилди. Кейин Нахимиё шоҳга нимадан хафа бўлганини айтиб берди ва деворларни тиклаш учун Қуддусга боришга рухсат сўради. Хўш, бундан кейин нима бўлди? ~

Худо Нахимиёнинг ибодатига жавоб берди. Шоҳ унга боришга рухсат этди! Бунинг устига шоҳ Нахимиёга деворларни кўтариш учун кўпгина ёғоч берди. Бундан кўриниб турибдики, Худо ичимизда айтилган ибодатларга ҳам жавоб беради (Нахимиё 1:2, 3; 2:4–8).

 Нима деб ўйлайсиз, ибодат қилаётганингизда бош эгиш ёки тиз чўкиш шартми? ~ Баъзида Исо тиз чўкиб, бошқа сафар эса тикка туриб ибодат қилган. Шунақа ҳам бўлганки, масалан Лазар тўғрисида ибодат қилганда, Исо осмонга қараб гапирган.

Хўш, бундан қанақа хулоса чиқаришимиз мумкин? ~ Хулоса шуки, ибодат қилганимизда қай ҳолатда бўлишимиз ёки қанақа ҳаракат қилишимиз аҳамиятга эга эмас. Гоҳида ибодат қилганимизда бошимизни эгиб, кўзларимизни юмсак яхши бўларди. Баъзи маҳал, сиз Исога ўхшаб тиз чўкиб ибодат қилишни хоҳларсиз. Шуни унутмангки, биз Худога ҳар вақтда, кундузими, кечки пайтдами ибодат қилишимиз мумкин ва У бизни эшитади. Фақат ибодат қилганимизда, Яҳова ибодатларимизни тинглашига амин бўлишимиз муҳим. Яҳова сизнинг ибодатларингизни эшитишига ишонасизми? ~

Лекин Яҳовага нима ҳақда ибодат қилсак бўларкан? ~ Қани айтинг-чи, сиз ибодат қилганингизда, Худога нималарни гапирасиз? ~ Парвардигор Яҳова бизга кўп нарсаларни совға қилган ва булар учун Унга раҳмат айтишимиз мумкин, шундай эмасми? ~ Масалан, овқат учун раҳмат дейишимиз мумкин. Сиз қачондир Унга кўм-кўк осмон, ям-яшил дарахтлар ва бир-биридан чиройли гуллар учун раҳмат деганмисиз? ~ Ахир буларни ҳам Худо яратган-ку.

Бир марта Исонинг шогирдлари ундан ибодат қилишни ўргатишини сўрашган эди. Шунда Улуғ Устозимиз муҳим нарсалар тўғрисида ибодат  қилиш кераклигини айтган. Бу қандай муҳим нарсалар экан, биласизми? ~ Келинг, Муқаддас Китобимизни очиб, намунали ибодат ёзилган жойни, яъни Матто 6- боб, 9- дан 13- гача бўлган оятларни ўқийлик.

Бу ерда Исо Худонинг исми тўғрисида ибодат қилишимиз кераклигини кўрсатган. У, Худонинг исми муқаддас бўлиши ҳақида ибодат қилишимизни ўргатган. Хўш, Худонинг исми нима? ~ Баракалла, Унинг исми Яҳова. Биз бу исмни яхши кўришимиз керак.

Шунингдек, Исо Худонинг Шоҳлиги келиши тўғрисида ибодат қилишимизни ўргатган. Бу Шоҳлик муҳим аҳамиятга эга. Сабаби, у орқали ер юзида тинчлик ва жаннат бўлади.

Сўнгра, Улуғ Устозимиз айтганидек, биз Худонинг иродаси осмонда бўлгани каби, ерда ҳам бажо бўлиши ҳақида ҳам сўрашимиз керак. Агар биз бу ҳақда ибодат қилаётган бўлсак, демак бунга монанд йўл тутишимиз лозим.

Устозимиз Исо бизга Худодан ризқ-рўзимизни беришини сўраб, ибодат қилишни ўргатган. Шунингдек, биз ёмон иш қилиб қўйганимиз учун Худодан узр сўрашимиз керак. Аммо Худо бизни кечиришини хоҳласак, биз ҳам ўзимизни хафа қилганларни кечиришимиз даркор. Айтинг-чи, буни қилиш сиз учун осонми? ~

Охирида Исо, Тангри Яҳова бизни ёвуз Шайтондан ҳимоя қилсин, дея сўрашни ҳам ўргатган. Ҳа, буларнинг барчаси ҳақида ибодат қилиш даркор.

Биз, Яҳова ибодатларимизни эшитишига ишонишимиз керак. Келинг, фақат ёрдам сўрамасдан, Унга раҳмат ҳам айтайлик. Чин юракдан ибодат қилиб, тўғри нарсалар ҳақида Ундан сўрасак, Яҳовага бу жудаям ёқади. Ишонаверинг, шунда У ибодатларимизга жавоб беради. Сиз-чи, бунга ишонасизми? ~