Maika 6:1-16
6 Biko ovwan nyo oborẹ Jihova ta.
Ovwan vrẹn rere ovwan guẹdjọ rẹ ovwan vwẹ obaro rẹ igbenu na,E jẹ igbenu itete na nyo urhuru rẹ ovwan.
2 Ovwan nyo ẹdjọ ri Jihova, E igbenu,Ovwan ichivwo egangan rẹ otọrakpọ na,Kidie Jihova vẹ ihwo rọyen vwo ẹdjọ;Ọ vẹ Izrẹl yen che guẹdjọ na:
3 “Ihwo mẹ, die yen mi ru ovwan?
Die yen mi ruru rọ nẹrhẹ ofu mẹ dje ovwan?
Ovwan soseri hwe vwe.
4 Kidie me reyọ ovwan vwo nẹ otọ rẹ Ijipt rhe,Me tan ovwan vwo nẹ uwevwin rẹ ọviẹn;Mi ji Mosis, Erọn, kugbe Miriam kobaro kẹ ovwan.
5 Ihwo mẹ, biko, ovwan karophiyọ oborẹ Ovie Belak ri Moab jiroro rọyen,Kugbe oborẹ Belam ọmọ ri Biọ kpahen kẹ—Obo re phiare vwo nẹ Shitim re te Gilga—Rere ovwan sa vwọ riẹn iruo ọsoso ri Jihova.”
6 Die yen me cha ghwa rhe obaro ri Jihova?
Die yen me cha ghwa nene oma, rhe vwọ vwẹ uyovwin kpotọ vwẹ obaro rẹ Ọghẹnẹ rọhẹ obenu na?
Me cha rhe obaro rọyen vẹ izobo rẹ ẹtorhẹ,Vẹ emọ rẹ erhuẹn rẹ ẹgbukpe ọvo?
7 Kẹ oma cha vwerhen Jihova fikirẹ egbon uriorin buebun,Vẹ ovwanvwọ ride rẹ evwri uriorin ihwe buebun?
Me cha vwẹ ọmọkpako mẹ vwọ kpahotọ fikirẹ egbe vwọsua mẹ,Gbanẹ me cha vwẹ ọmọ robọ mẹ vwọ kpahotọ fikirẹ umwemwu mẹ?
8 Ọ vuẹ wẹ obo ri yoma nure, E ohwo.
Die yen Jihova guọnọ mie we?*
Ọyen wo vwo brorhiẹn ọsoso,* vwo ẹguọnọ rẹ evun-ẹfuọn,*Je vwomakpotọ yan nene Ọghẹnẹ wẹn!
9 Urhuru ri Jihova kperẹ se ihwo rehẹ orere na;Ihwo ri vwo aghwanre cha djoshọ rẹ odẹ rọyen.*
Ovwan kerhọ kẹ ọkpọ na vẹ ohwo ro vwiro mu.
10 Efe ra vwẹ ọghware koko na jehẹ evunrẹ uwevwin rẹ orumwemwu na?Ovwanvwọ rẹ ifah* rọ gbaree rọ dia emu rẹ ẹgua na jehẹ evun rọyen?
11 Abọ mẹ je sa fon ọ da dianẹ me reyọ ovwanvwọ rẹ ophiẹnvwe vwo ruiruo,Je reyọ ekpu rẹ ukuta rẹ ophiẹnvwe vwo ruiruo?
12 Kidie eshare rọyen ri feri inogbozighi,Ihwo re dia evun rọyen vwọrọ efian;Ophiẹnvwe hẹ ẹrẹnvwe rayen.
13 “Ọtiọyena mi che gboja kẹ wẹ gangan,Mi che ru we phiyọ ofefe fikirẹ imwemwu wẹn.
14 Wọ cha riemu jẹ evun cha vọn wẹẹ;Evun wẹn cha dia ofefe.
Wọ cha kua ekuakua vẹ ẹwẹn wọ vwọ sẹro rayen, ẹkẹvuọvo wọ cha sa sẹro rayeen,Obo wọ sẹro rọyen, me cha vwọ kpahotọ vwọ kẹ ọlọkọ.
15 Wọ cha kọn ubi ẹkẹvuọvo wo che vuun.
Wo che chiyin oliv ẹkẹvuọvo wọ cha reyọ evwri rọyen vwo ruiruoo;Wo che ru iwaini kpokpọ ẹkẹvuọvo wọ cha da iwaini vuọvoo.
16 Kidie wo ru nene irhi rẹ Ọmrai kugbe iruo rẹ uwevwin rẹ Ehab eje,Wo ru nene uchebro rayen.
Ọyensorọ mi che vwo ru we phiyọ obo ri muẹ ohwo oshọJi ru ihwo re dia evun rọyen phiyọ obo ra vwẹ fiki rọyen gbe ophiọrọ;Ihwo na ke cha reyọ owẹ vwọ jehwẹ.”
